Galatia 4

Faŋ nsiŋ lùu vaŋ Nwi, kee baa lùu vəbuꞌ me

1Mə baa kəə twelə vənu vɔ́ tɨ́ viŋ, viŋ zɔ! Ŋkə lùu yaa nu weembwa faŋ ŋwə ndɔ zɨ tɔ tii wi, kìi vətɔ və tii wi. Yighee njyə faŋ ŋwə kɨ bii weembwa, ŋwə kee luu nɨŋkwiŋ fɨ ghɔ buꞌ me, faŋ bee kɔlə kìi ŋwə kìi vətɔ və tii wi vənshə nə. 2Yighee njyə faŋ ŋwə kɨ bii weembwa, vɨɨ shɔ faŋ vəŋ fàꞌ vənu maa yizii yi, gə ziꞌ maa yighee njyə faŋ tii wi nə tə̀. 3Luu sheꞌ nɨndɨŋ tɨ́ nsiŋ nɨzi, yighee vɨsɨ wutə shɨ nsi nəə sɔꞌ nsiŋ, faŋ ŋkɔꞌnə Nwi yɔ́ nə kee ta fùu ntee me. Nsiŋ nə luu vəbuꞌ tɨ́ vəwutə vɔ́. 4Luu nə, Nwi kɨ nii tɔ̀ŋ ŋwiŋ wi taa mbi maa yighee njyə faŋ Nwi nə tə. Wəzwi mɔ́ꞌ gɔ ŋwə, bì ŋwə. Ŋwə nəə beꞌsə ntɨsə nsɨə faŋ Nwi nə kɔ̀ tɨ́ vɨɨ Jus nə nɨzi. 5Nɨniŋ laa ŋwə ndɔ bweysə vɨɨ mbɨə faŋ ntɨsə sɔ́ sɔꞌ vəŋ nə. Ŋwə yɨ̀ laa nsiŋ luu vaŋ Nwi ndwə. 6Faŋ viŋ lùu vaŋ Nwi, Nwi tɔ̀ŋ Zwitə ŋwiŋ wi, ŋkə jwi ŋìi taa fwisə nsiŋ. Zwitə ki kɔ́ yɨsə laa nsiŋ tii Nwi laa, «Tii wia, tɨta.» 7Nɨniŋ, ŋkə də̀ laa a kee baa lùu buꞌ me, a luu ŋkee wee Nwi bi. Nwi ndì ghɔ yaa ŋwiŋ wi. Nɨniŋ, a ndɔ kii fɨ maa vətɔ mbɨə faŋ Nwi nùŋsə tɨ́ vaŋ vi nə.

Faŋ ŋkə bàw laa kɨ viŋ bəŋ yiba, kɨ toꞌ yaa vɨɨ məmanə Nwi me

8Yighee vɨsɨ faŋ viŋ nə kee ta kɨ̀ɨ nə Nwi me, viŋ nəə feꞌ vənwi faŋ kee lùu Nwi yinsəŋ me. Viŋ nə luu yaa vəbuꞌ tɨ́ vətɔ mbɨə faŋ kee lùu mbə Nwi me. 9Luu nə, viŋ duꞌtə viŋ kɨ̀ɨ nə Nwi ndwə. Bàw mə bee kii gì laa, Nwi kɨ̀ɨ nə viŋ. Faŋ ŋkə lùu nɨniŋ, sii yɨ̀ kə viŋ kəə bəŋ nə yiba, baa beꞌsə vəwutə və shɨ nsi? Sii yɨ̀ kə viŋ kəə kɨ bəŋ yiba, laa viŋ baa gu vəbuꞌ tɨ́ vəwutə vɔ́? 10Sii yɨ̀ kə viŋ kəə kɨ bawsə too Nwi nə nu mənuŋsə vəshi vəmɔ́ꞌ laa lùu vəshi vəkwalə, tɨꞌnə me təŋuu təmɔ́ꞌ, nə təghee təmɔ́ꞌ nə ŋuꞌsə? 11Vənu mbɨə faŋ viŋ yɨ̀sə nə, ghaysə mə ŋkee dɨdɨꞌ. Kɨ ŋkə lùu laa faꞌ ŋgwə faŋ mə nə faꞌ taa ŋwaa viŋ nə, fùu maa nu dayday me.

12Vaŋ-nshwi vaŋ, mə nə jwi yɨ viŋ, gù yaa viŋ, kee kɨ toꞌ yaa wuu Jus me. Nɨniŋ, mə buꞌ ghɔ tɨ́ viŋ laa viŋ beꞌsə ghuu yitoꞌ kaŋ, kee kɨ nuŋ fwi siŋ maa nuŋsə vɨɨ Jus me. Maa viŋ nə kee ta yɨ̀ nu bwə maa mə me. 13Viŋ kɨ lumə laa, maa mfɔŋ yighee, faŋ mə nə bɨ jwì maa məfɨꞌtə nu Nwi tɨ́ viŋ, mə nə kee lùu taa me. 14Faŋ viŋ nə kɔlə yè ŋɨꞌ tɔ mə maa za kaŋ nə, viŋ nə kee twèy mə me, kee shìasə mə me, yaa vɨɨ yaa kɨ yɨsə maa vɨɨ vəza. Viŋ nə bee kii jìa mə jəə, sheꞌ yaa viŋ jia nshiiŋii Nwi. Viŋ nə jìa mə yaa nshɨ-tɔ Yeso Kristo. 15Yighee yɔ́ viŋ nə ŋàytə dɨdɨꞌ buꞌ mə. Sii yɨ̀ kə ŋkə kee baa lùu nɨniŋ me? Mə kɔꞌ kɨɨ ŋkee yinsəŋ laa, maa yighee yɔ́, nə kaꞌ viŋ shòꞌtə ŋkee sɨ ghiŋ, kɔ̀ shee, faŋ viŋ nə yè jɨɨ gaŋtə mə nɨniŋ. 16Viŋ nə kìasə ndwə, ndì mə yaa wuu mbeenə wiŋ, buꞌ faŋ mə fɨꞌtə ntɔŋ Nwi yinsəŋ tɨ́ viŋ mu? 17Vɨɨ vɔ́ faŋ vəŋ kəə bweꞌsə viŋ nə, nu vəŋ kee lùu kəjəə me. Vəŋ kəə laa viŋ gaasə yiŋwaa yiŋ fɨ maa mə, tɨ́ kaꞌ viŋ kɨ zɔnə vəŋ. Vəŋ kəə ndì fwi siŋ maa vəŋ. 18Lùu nu jəə faŋ vɨɨ beꞌsə nshinə vɨɨ mɔ́ꞌ, faŋ nshinə yɔ́ lùu yijəə. Lùu nu yinsəŋ nɨniŋ. Bàw viŋ beꞌsə nshinə yijəə ghee nshə, faŋ nsiŋ lúu mɔ́ꞌ, tɨꞌnə me faŋ nsiŋ kee lùu mɔ́ꞌ me. 19Vaŋ vaŋ faŋ mə kàw, mə lùu yaa wəzwi faŋ ŋwə kɨ bii bi, mə baa ye ŋɨꞌ buꞌ viŋ, gə ziꞌ tɨ́ yighee njyə faŋ nshinə Kristo ndɔ ŋii taa ŋwaa viŋ. 20Mə kàw laa nsiŋ lùu mɔ́ꞌ sheꞌ ndwə ndwə, tɨ́ kaꞌ mə kɨ̀ɨ maa mənaysə vənu və̀ tɨ́ viŋ maa jɨɨ yijəə, buꞌ laa mə kee kɨ̀ɨ nə tɔ kaŋ maa vənu viŋ me.

Faŋ Pɔɔl nə fɨ̀ꞌ nu məbiŋ Kristo nə vaŋ Abraham vəbɔɔ

21Viŋ kəə laa ntɨsə sɔꞌ viŋ mu? Bàw viŋ zɔ nu ŋkɨə faŋ ŋkə lùu taa ŋwaꞌlə ntɨsə sɔ́. 22Vɨ nə nyɔ̀ꞌ taa ŋwaꞌlə ntɨsə Nwi sɔ́ laa Abraham nə kìi vaŋ vi vəbɔɔ, bì ŋgwə muꞌ ghɔ buꞌ, bì wuu mɔ́ꞌ ghɔ zu wi, wəzwi shɨ. 23Wee ŋgwə faŋ ŋwə nə bì ghɔ wəzwi ŋgwə faŋ lùu buꞌ nə, luu sheꞌ wee fənshi fə ŋwaa fi. Wee ŋgwə faŋ nə bì zu wi, wəzwi shɨ, faŋ ŋwə nə luu dɔŋ nə, lùu maa ŋkɔꞌnə Nwi, faŋ Nwi nə kɔ̀ꞌnə tɨ́ Abraham nə. 24Lùu yigisə tii nə, vəki vɔ́ vəbɔɔ, faŋ nə luu Hagar ghɔ Sara, lùu məkee məmbɔɔ faŋ Nwi nə gwìa. Hagar, wəzwi buꞌ wì, lùu shwenə məkee mbɨə faŋ Nwi nə gwìa tɨ́ Mose fuu baŋ Sinai. Kɨ lumə laa vaŋ wəzwi buꞌ ghɔ́, vɨ bi vəŋ yaa vəbuꞌ. Sheꞌ nee, vɨɨ lùu vəbuꞌ tɨ́ ntɨsə nsɨə faŋ Mose nə kɔ̀ tɨ́ vɨɨ Jus fuu baŋ Sinai. 25Sheꞌ faŋ Hagar lùu maa məkee mbɨə faŋ vɨɨ nə gwìa fuu baŋ Sinai shɨ Areybia, ŋwə baa kɨ luu maa yizii Jerusalem ndee, buꞌ laa vɨɨ Jerusalem nɨzi lùu vəbuꞌ tɨ́ ntɨsə nsɨə faŋ Nwi nə kɔ̀ tɨ́ vɨɨ Jus nə.

26Luu nə, shɨ Jerusalem mɔ́ꞌ lùu shɔ. Lùu ŋkɨə faŋ ŋkə lùu yizɔ, shɨ Nwi. Shɨ yiŋkii lùu yaa Sara, wəzwi shɨ. Vɨɨ shɨ yiŋkii kee lùu vəbuꞌ me. Nsiŋ lùu vaŋ shɨ yiŋkii kɔ́. 27Ŋkə lùu faŋ vɨ nə nyɔ̀ꞌ taa ŋwaꞌlə Nwi laa,

«Ghɔ, wəzwi faŋ a kee bì wee me, fwi yə kɨ ŋaytə!

Ghɔ, wəzwi faŋ a kee ta zɔ̀ məza wəzwi

faŋ ŋwə kəə bi me, kɨ shɨꞌ nə məŋaytə,

buꞌ laa wəzwi ŋgwə faŋ ŋwə lùu nɨnɔŋ,

ndɔ kii vaŋ vəyaŋ, shɔ̀ɔ wəzwi

ŋgwə faŋ ŋwə lùu ghɔ wəndɔŋ.» #Aysaya 54.1.

28Vaŋ-nshwi vaŋ, gə fɨ maa viŋ, viŋ lùu vaŋ yinsəŋ Nwi, buꞌ ŋkɔꞌnə njyə faŋ Nwi nə kɔ̀ꞌnə fɨshi nə. Viŋ lùu yaa Isak, wee Sara, faŋ luu wee wə shɨ nə, faŋ Nwi nə kɔ̀ꞌnə ghɔ Abraham. 29Ŋkee fɨshi maa yighee yɔ́, wee ŋgwə faŋ Hagar nə bì sheꞌ faŋ vɨɨ bi vaŋ nə, ŋwə nəə kɔ ŋɨꞌ tɨ́ wee ŋgwə faŋ vɨ nə bì ŋwə maa wutə Zwitə Nwi. Ŋkə luu sheꞌ nɨniŋ ndee. Vɨɨ Jus faŋ vəŋ lùu vəbuꞌ tɨ́ nuŋsə vəŋ yɔ́, vəŋ kɔ ŋɨꞌ tɨ́ viŋ, faŋ vɨ nə bì viŋ maa wutə Zwitə Nwi nə. 30Luu nə, vɨ nə baa nyɔ̀ꞌ taa ŋwaꞌlə Nwi laa, «Vɨ jɔŋ wəzwi buꞌ wì, ghɔ ŋwiŋ wi. Ŋkə kee yikuꞌnə laa wee buꞌ ndɔ zɨ vətɔ və tii wi me. Lùu wee wəzwi shɨ faŋ ŋwə ndɔ zɨ vətɔ və tii wi.» #Jenesis 21.10. 31Nɨniŋ, van-nshwi vaŋ, ŋkə deesə tɨ́ nsiŋ laa, nsiŋ kee lùu vaŋ wəzwi buꞌ me, nsiŋ lùu vaŋ wəzwi shɨ.

Currently Selected:

Galatia 4: bav

Highlight

Copy

Compare