2 Kɔrintian 13

Faŋ Pɔɔl nəə kəə gə ye vɨɨ Kɔrint, mètə nsɔꞌsə vəŋ sənshə

1Mə taa jwi ye viŋ ndwə, lwesə ghee tia, nsiŋ shoꞌmə vənu vənshə faŋ vɨɨ nə gù shɔ nə. Vɨ taa tii vɨɨ məye nə sɨ vəbɔɔ, tɨꞌnə me vətia, buu shia nsɔꞌsə sənshə, nsə me. 2Maa yighee njyə faŋ nsiŋ nə luu mɔ́ꞌ maa ghuu yitoꞌ kaŋ lwesə ghee bɔɔ, mə yaa duꞌtə mə gi tɨ́ vɨɨ mbɨə faŋ vəŋ nəə yɨsə vənu vəbwəvə yighee vɨsɨ nə, nə tɨ́ vɨɨ vənshə, laa mə ndɔ baa bəŋ jwi, kee baa kɨ gay buꞌ nu bwə wə mɔ́ꞌ me. Mə baa bəŋsə gì ndwə, faŋ mə kɨ bii ntaŋ nə, laa ŋkə ndɔ luu nɨniŋ. 3Viŋ kəə laa mə də tɨ́ viŋ laa gisə Kristo gisə fɨ shuu mə tɨ́ viŋ. Nɨniŋ, Kristo kee bee yɨsə nu faŋ ŋkə bwa tɨ́ viŋ me, ŋwə yɨ nu faŋ ŋkə weꞌ taa ŋwaa viŋ. 4Vɨ nə kɨ bey ŋwə fuu fəŋkɔꞌ fə ŋkɨꞌsə, tɨ́ ŋwə bwa. Luu nə, ŋwə baa bwey buꞌ wutə Nwi. Luu sheꞌ faŋ yia toꞌ nɨniŋ nɨzi: yia bəə ŋay fɨ yiba ŋwə, luu nə, yia ndɔ bwey taa ŋwaa viŋ, yia ŋwə, wèꞌ tɨ́ viŋ buꞌ wutə Nwi kɔ́. 5Nɨniŋ, bàw viŋ kwaꞌtə nu kiŋ laa fwi yiŋ lùu ghɔ Kristo mu? Viŋ fɨꞌnə nu kiŋ maa nshɨ-tɔ wiŋ. Maa viŋ kɨɨ nə yiŋwaa laa Yeso lùu taa fwisə viŋ? Ŋwə nii toꞌ kee lùu shɔ me, buu nu kiŋ kee yikuꞌnə me. 6Mə bɨꞌtə laa viŋ taa kɨɨ laa yia kee bee gù nu me. 7Yia buꞌ ghɔ tɨ́ Nwi laa kɨ viŋ yɨ tuu nu bwə me. Kɨ mə kee gì nɨniŋ, tɨ́ kaꞌ yia ndɔ fuu yaa vɨɨ faꞌ jəə tɨ́ Nwi me. Mə kəə sheꞌ laa viŋ yɨ nu ŋkɨə faŋ ŋkə lùu kəloomə, faŋ ŋkə kɔlə ghɨɨ yaa yia gù nu. 8Kɨ kaꞌ yia kee yɨ̀ nu faŋ ŋkə fə̀ŋ nu yinsəŋ me. Kaꞌ yia yɨsə sheꞌ nu yinsəŋ. 9Yia ŋaytə faŋ yia bəə ŋay, viŋ weꞌ nə. Lùu nu ŋkɨə faŋ yia shɔꞌtə Nwi shɔ, laa Nwi bɔŋsə viŋ. 10Mə nyɔ̀ꞌ nee faŋ mə kee lùu yɨ viŋ me, tɨ́ kaꞌ mə taa kɨ jwi yɨ viŋ, kee baa kìi nu maa mədə wutə kaŋ tɨ́ viŋ me. Wutə ŋkɨə faŋ Mɔꞌmbi kɔ̀ shee nə, lùu wutə maa məfianə, kee lùu wutə maa məsɔꞌ me.

Shɔꞌtə fɨ ghɔ Pɔɔl tɨ́ vɨɨ Nwi fɨ shɨ Kɔrint

11Maa məndwə, vaŋ-nshwi vaŋ, viŋ bwey jəə. Viŋ biŋ laa vɨ bɔŋsə viŋ, bwàsə fwi yiŋ. Viŋ bɨꞌtə nu kiŋ kəmuꞌ, dùꞌ nə mənɔŋ-bwaŋnə viŋ viŋ. Nwi faŋ lùu Nwi məkaw vɨɨ, baa lùu Nwi mənɔŋ-bwaŋnə nɨzi, dùꞌ viŋ vɨ vəŋ. 12Viŋ kɨ shɔꞌtə viŋ, viŋ viŋ, nə ŋkawnə, faŋ ŋkə bàw tɨ́ Nwi. Vɨɨ ley Nwi vənshə shɔꞌtə viŋ. 13Mənɔŋ-bwaŋnə fɨ ghɔ tɨta Yeso Kristo, nə ŋkawnə Nwi, nə Zwitə Ley Nwi kɨ shi taa ŋwaa viŋ vənshə.

Currently Selected:

2 Kɔrintian 13: bav

Highlight

Copy

Compare