Matiu 26
26
B ka kre Yesu be kemɔ be nia be asheŋ
(Maak 14:1-2; Luuk 22:1-2; Jɔn 11:45-53)
1Yesu ka malga asheŋ ere kikɛ n loge nɛ e kaŋɛ mbe bebɛsopo le: 2“Men nyi fanɛ a ka nchɛnnyɔ nɛ Kebansonchoŋ be kejigboŋ na e fo, kumo be saŋɛ na so baaŋ ta ma, Nyiŋgbasa Pibinyɛn m bɔɔ basa enɔ nɛ b gbir ma m mata kedibi largato so m mɔ.” 3Kumo be jemanɛ na so nɛ bɔrɛmatapowuraana nɛ basa na be benimuana shɛr bɔrɛmatapo nimuso nɛ baa tre Kayafas na be lambu na to 4ŋ kre bumo nia fanɛ b ŋana m pɛ Yesu m mɔ. 5Ama le nɛ b daŋ kaŋɛ bumo be amu: “Men sa maŋ shin nɛ an wora loŋ Kejigboŋ ere be saŋɛ ere to, nɛ mannɛ aloŋ kebagato beeŋ koso basa ere to.”
B ka chulgi tulale n wurge Yesu so be asheŋ
(Maak 14:3-9; Jɔn 12:1-8)
6Yesu ka daa wɔ Bɛtani a tase Saimɔn botipo pe a ji 7nɛ kache ko keta amansherbi damta be tulale dufɛso ko be kɔlba lelabi m ba luri. Ndoŋ nna nɛ e ta tulale na n chulgi n wurge Yesu be kumu so. 8Bebɛsopo na ka wu kusɔ nɛ kache na wora na nɛ bumo be ŋgbene kaa bumo nɛ b bishi: “Cha, tulale ere be kejija loŋ ere be kifito e la nuso?” 9B yɛ: “Ŋkpal manɛ so, esa daa beeŋ tiŋ n ta tulale ere n fa n nya amansherbi damta n ta amo n sa betirpo.” 10Ama Yesu daŋ pin kesheŋ nɛ b daa malga na nseŋ bishi bumo le: “Manɛ e ba nɛ menyee tɔrɔ kache na? Kusɔ lela nɛ e wora ma na. 11Saŋkama menyi nɛ betirpo e naaŋ baa la, ama ma ere nɛ menyi maaŋ baa la saŋkama. 12E chulgi tulale ere nna n wurge ma eyur so nɛ e lɔŋɛ kumo n yili kepuliachɛ. 13Ma e kaŋɛ menyi kashenteŋto na fanɛ kaplɛkama nɛ b bɔ baru lela na durnya ere kikɛ to, baaŋ malga kusɔ nɛ e wora ere be asheŋ n nyiŋi mo.”
Judas ka shuli kedebɔr Yesu be asheŋ
(Maak 14:10-11; Luuk 22:3-6)
14Ndoŋ nna nɛ bebɛsopo kuduanyɔ na to be eko, emo nɛ baa tre Judas Iskareɔt na, yɔ bɔrɛmatapowuraana kutɔ 15n ya bishi bumo le: “Nɛ n nya mo m bɔɔ menyi enɔ, manɛ nɛ menyeeŋ sa ma?” Ndoŋ nna nɛ b karga egbiti be ndarbi adesa n sa mo. 16Yili kumo be jemanɛ na so a yɔ nɛ Judas fara a fin ekpa nɛ e beeŋ bɔla so n debɔr Yesu.
Yesu nɛ mbe bebɛsopo ka ji Kebansonchoŋ be ajibi be asheŋ
(Maak 14:12-21; Luuk 22:7-13, 21-23; Jɔn 13:21-30)
17Kachɛ nɛ b fara bodobodo nɛ a maŋ kɔ yiisi na be Kejigboŋ na nɛ bebɛsopo na ba Yesu kutɔ m ba bishi mo le: “Nnɛ nɛ fee sha an ya bela ase n yili fo nɛ fo ba ji Kebansonchoŋ be ajibi na?” 18Nɛ e kaŋɛ bumo le: “Men yɔ kade to n ya wu kanyɛn na ŋ kaŋɛ mo le: ‘Eŋinipo na yɛ: Ma saŋɛ na taga to. Ma nɛ ma bebɛsopo beeŋ ba fo pe m ba ji Kebansonchoŋ be ajibi na.’ ” 19Ndoŋ nna nɛ bebɛsopo na ya wora kusɔ nɛ Yesu kaŋɛ bumo na nseŋ wora Kebansonchoŋ be ajibi na n yili.
20Kanyɛ ka biri nɛ Yesu dese kekel so teebɔl ase, mo nɛ mbe bebɛsopo kuduanyɔ na e daa la. 21B ka bee ji nɛ e kaŋɛ bumo le: “Kashenteŋto nɛ mee kaŋɛ menyi na fanɛ menyi be eko beeŋ debɔr ma.” 22Ndoŋ na nɛ bumo be ŋgbene jija bumo ga nɛ b fara a bishi mo kukoko to le: “M baa nyi fo ka maŋ de ma ere ŋko, Enyɛnpe?” 23Nɛ Yesu kaŋɛ bumo: “Emo nɛ ma nɛ mo bee bɔ enɔ a wɔtɔ kawie koŋwule to a ji ere e naaŋ debɔr ma na. 24Ma, Nyiŋgbasa Pibinyɛn bee yɔ luwu to fanɛ kananɛ b sibɛ n nase abɔrɛsibɛ na to na, ama asheŋ maaŋ nyalɛ n sa emo nɛ e beeŋ debɔr ma, Nyiŋgbasa Pibinyɛn na kikɛ. Nɛ b daa maŋ kurge loŋ be esa gba, k daa beeŋ baa bɔ mo so.” 25Nɛ Judas nɛ e daa debɔr mo na malɛ gba kaŋɛ Yesu le: “M baa nyi fo ka maŋ de ma ere ŋko, Eŋinipo?” Nɛ Yesu shuli ŋ kaŋɛ: “Mm, fo nna.”
Enyɛnpe be daŋkarejibi na be asheŋ
(Maak 14:22-26; Luuk 22:14-20; 1 Kɔrintebi 11:23-25)
26B ka bee ji na nɛ Yesu ta bodobodo nseŋ nɛfa kumo nseŋ bu kumo to n ta n sa mbe bebɛsopo nseŋ kaŋɛ bumo le: “Men ta n we, ma eyur nna na.” 27Kumo be kaman nɛ e ta kawiebi nɛ asɔnuuso n chɔrɔ Ebɔrɛ n loge nseŋ ta kumo n sa bumo ŋ kaŋɛ le: “Men kikɛ e sɔ kawiebi ere n nuu kumo to. 28Ma ŋklaŋ nɛ a lar a sa basa damta na nde. Amo e naa ti Ebɔrɛ nɛ dimɛdi be kɔnɔkoŋwule be ŋkre na so a bar alubi be ketampaŋ na. 29Ma e kaŋɛ menyi na fanɛ m maaŋ naŋ nuu le be waindibi be yabra ere kikɛ hale n ya fo kachɛ nɛ ma nɛ menyi beeŋ nuu yabra popɔr ashi n Tuto Ebɔrɛ be kuwura na to na.”
30Kede be kaman nɛ b boŋ kashɛ nseŋ lar n yɔ Ɔlifs be kebee so.
Yesu ka wu ŋ kaŋɛ Pita ka beeŋ lar mo kaman be asheŋ
(Maak 14:27-31; Luuk 22:31-34; Jɔn 13:36-38)
31Nɛ Yesu kaŋɛ bumo le: “Kanyɛ ere menyi kikɛ beeŋ shile ŋ ŋana ŋkpal ma so, ŋkpal manɛ so, abɔrɛsibɛ na bee kaŋɛ fanɛ Ebɔrɛ kaŋɛ: ‘Meeŋ mɔ mbolpɔkpapo na nɛ mbe mbolpɔ na kikɛ e yeŋ to m pesaŋ to.’ 32Ama ŋ kaŋ tiŋi luwu na to, meeŋ juŋkpar menyi n yɔ Galili.” 33Ndoŋ nna nɛ Pita kaŋɛ mo le: “Nɛ ekama shile ŋ ŋana ŋkpal fo so gba, ma ere maaŋ shile fo kikɛ.” 34Nɛ Yesu kaŋɛ mo le: “Kashenteŋ nɛ mee kaŋɛ fo na fanɛ pɔɛŋ nɛ koshinyɛn e boŋ kanyɛ ere feeŋ chɛ ale asa ŋ kaŋɛ fanɛ fo maŋ nyi ma.” 35Ndoŋ nna nɛ Pita naŋ kaŋɛ mo le: “Hale nɛ ma nɛ fo beeŋ wu gba, m maa ba nɛ m ba kaŋɛ fanɛ m maŋ nyi fo.” Loŋ koŋwule na nɛ bebɛsopo na kikɛ malɛ gba daŋ kaŋɛ.
Kananɛ Yesu kule Ebɔrɛ ashi Gɛtsɛmani to be asheŋ
(Maak 14:32-42; Luuk 22:39-46)
36Asheŋ ere be kaman nɛ Yesu nɛ mbe bebɛsopo na yɔ kakpa nɛ baa tre Gɛtsɛmani na nɛ e ya kaŋɛ bumo le: “Men chena nfe nɛ n yɔ anishito ndoŋ ere n ya kule Ebɔrɛ.” 37Ndoŋ nna nɛ e keta Pita nɛ Zɛbedi be mbia anyɔ na n ti mbe kumu so n yɔ nɛ kagbenejija nɛ kafɔŋ tɔr mo so. 38Nɛ e kaŋɛ bumo le: “Kagbenejija nɛ k wɔ ma to ere shi ga, hale a sha keburi ma to m mɔ, men shir a wɔ nfe n tu ma a de so.” 39Ndoŋ nna nɛ e yɔ anishito gbrɛbi n ya gbir n kur kumu n yuu nseŋ kule Ebɔrɛ ŋ kaŋɛ le: “N Tuto, nɛ ekpa wɔtɔ, fo ta awurfoŋ ere ashi ma so, ama mannɛ ma keparso, shin nɛ k baa la feya.” 40Kumo be kaman nɛ e bɛta m ba mbe bebɛsopo asa na kutɔ nɛ baa di nɛ e bishi Pita le: “Ama men maaŋ tiŋ n tu ma n chena a de so awa koŋwule gba a? 41Men baa da so a kule Ebɔrɛ fanɛ men maaŋ luri kechɔŋkeni to. Kiyoyu na bre bee sha, eyur na e maŋ kɔ eleŋ.” 42E ka malga n loge nɛ e naŋ bɛta kela nyɔsopo n ya kule Ebɔrɛ le: “N Tuto, nɛ ekpa maŋ wɔtɔ fanɛ n lar le be awurfoŋ ere to ama m baŋ luri kumo to nna, fo shin nɛ fo aparsheŋ e wora.” 43E ka naŋ bɛta m ba bebɛsopo asa na kutɔ nɛ b naa di, ŋkpal manɛ so, bumo be anishi daŋ wora bumo egbɛ nna. 44Ndoŋ nna nɛ e yige bumo nseŋ bɛta n naŋ ya kule kabɔrɛkule koŋwule na gbagba chap kela sasopo. 45Kumo be kaman nɛ e naŋ bɛta n yɔ bebɛsopo na kutɔ n ya bishi bumo le: “Men kraa di nna a wushi a? Men keni, saŋɛ na taga to nɛ b debɔr ma, Nyiŋgbasa Pibinyɛn na n ta ma m bɔɔ alubiworapoana enɔ. 46Men koso nɛ an yɔ. Men keni emo nɛ e debɔr ma na nde.”
Kananɛ b pɛ Yesu be asheŋ
(Maak 14:43-50; Luuk 22:47-53; Jɔn 18:3-12)
47E kraa malga nna nɛ bebɛsopo kuduanyɔ na to be emo nɛ baa tre Judas na ba ndoŋ. Nɛ jimaŋ damta ko keta etokobi nɛ mprɛ m bɛ mo so. Bɔrɛmatapowuraana na nɛ basa na be benimu e daŋ shuŋi bumo. 48Pɔɛŋ nɛ b ba ndoŋ, le nɛ edebɔrpo na daŋ ŋini bumo: “Emo nɛ meeŋ ba pipe mbe kegbuŋ kechɔrɔso na e la kanyɛn nɛ menyee sha na, men pɛ mo.” 49B ka fo ndoŋ nɛ Judas yɔ Yesu kutɔ epul na to n ya kaŋɛ mo le: “Eŋinipo, mee chɔrɔ!” Nseŋ pipe Yesu be kegbuŋ kechɔrɔso. 50Nɛ Yesu malɛ kaŋɛ mo: “Eteri, baŋ wora kusɔ nɛ k bar fo.” Ndoŋ nna nɛ basa na ba choŋ n nyaŋ Yesu m pɛ mo.
51Ndoŋ nna nɛ bumo nɛ b daa wɔ Yesu kutɔ na be eko pe mbe tokobi ŋ ŋe bɔrɛmatapo nimuso be kenya ko be kusoe n chuge. 52Nɛ Yesu kaŋɛ ebɛsopo na le: “Bɛta fo tokobi n wɔtɔ kumo be efar to, ŋkpal manɛ so, bekama nɛ baa pe etokobi a kɔ la bumo nɛ etokobi beeŋ mɔ nna. 53Fee tama fanɛ m maaŋ tiŋ ŋ kule n Tuto nna nɛ e shin nɛ emalaika nɛ b chɔ ŋgboŋ adushunu nɛ anyɔ e ba epul ere to m ba chɛ ma to a? 54Ama nɛ loŋ wora, nuso nɛ k beeŋ wora nɛ abɔrɛsibɛ nɛ a bee kaŋɛ fanɛ asheŋ ere e wora le na e bɔla ekpa?”
55Jemanɛ na so nɛ Yesu bishi jimaŋ na le: “Men ta etokobi nɛ mprɛ nna m ba nɛ men ba pɛ ma fanɛ eyu a? Ma nɛ menyi e daa la bɔrɛlambu na to kachɛ kama nɛ mee ŋini abɔrɛsheŋ na, ama men maŋ pɛ ma. 56Ama asheŋ ere kikɛ wora nna nɛ kusɔ nɛ anebiana na sibɛ na e bɔlɔ so.” Ndoŋ nna nɛ bebɛsopo na kikɛ shile ŋ ka mo.
B ka bar Yesu demujikpa be asheŋ
(Maak 14:53-65; Luuk 22:54-55, 63-71; Jɔn 18:13-14, 19-24)
57Basa nɛ b daŋ pɛ Yesu na daŋ ta mo nna n yɔ bɔrɛmatapo nimuso Kayafas pe. Ndoŋ nɛ mbraŋinipoana na nɛ benimuana na daŋ ya shɛr. 58Ama saŋɛ na so nɛ Pita malɛ bɛ mo so a wɔ kaman kufɔ hale n ya fo bɔrɛmatapo nimuso na be laŋ to nseŋ luri n ya tu nyɛrbi na n chena a keni kusɔ nɛ k beeŋ wora.
59Bɔrɛmatapowuraana na nɛ Sanhedrinebi na kikɛ daa fin efɛ be eshɛdajipo mo nɛ baaŋ malga ŋ gbiti Yesu nɛ b tiŋ n nya mo m mɔ nna. 60Efɛ be eshɛdajipo damta daŋ ba, ama b daa maŋ tiŋ n nya eshɛda kama nɛ a bɛ abar so. Ndoŋ nna nɛ befɛpo anyɔ ko ba choŋ n lar basa na be anishito 61ŋ kaŋɛ le: “An nu e ka daŋ kaŋɛ fanɛ: ‘Meeŋ tiŋ m bure Ebɔrɛ be lambu na n lɛ nɛ kumo be nchɛ asa to nɛ m pɔr kumo.’ ” 62Ndoŋ nna nɛ bɔrɛmatapo nimuso na niŋi to n yili m bishi Yesu le: “Fo maa tuge asheŋ nɛ baa malga a gbiti fo ere nna a?” 63Ama Yesu daŋ la to nna a yil. Nɛ bɔrɛmatapo nimuso na kaŋɛ mo le: “Ebɔrɛ nɛ e wɔ ŋkpa to ere so, kaŋɛ anyi, fo e la Kristo, Ebɔrɛ Pibinyɛn na a?” 64Ndoŋ nna nɛ Yesu kaŋɛ mo: “Loŋ nɛ fo yɛ na. Ma alɛ bee kaŋɛ menyi nna, yili kabre a yɔ menyeeŋ wu ma, Nyiŋgbasa Pibinyɛn ka tase Elempo na be jisoso nseŋ naŋ wu ŋ ka shi awɔlpa to a ba.” 65Nɛ bɔrɛmatapo nimuso na kpɛa mbe asɔbuuso to nseŋ kaŋɛ le: “E malga ŋ gbiti Ebɔrɛ! Men nu kananɛ e malga ŋ gbiti Ebɔrɛ nna na. An naa sha eshɛda ko nna n ti so a? 66Manɛ nɛ men wu kumo to?” Nɛ basa na kaŋɛ le: “E daga luwu nna.” 67Ndoŋ nna nɛ b tuu echɔl n fea mbe anishito nsaa ŋmɛa a ŋmɛa mo 68nɛ beko malɛ bee kpa mo etaŋana nsaa kaŋɛ mo: “Kristo, pin esa nɛ e ŋmɛa fo ere!”
Pita ka chɛ fanɛ e maŋ nyi Yesu be asheŋ
(Maak 14:66-72; Luuk 22:56-62; Jɔn 18:15-18, 25-27)
69Pita ka daa tase laŋ na be epunto na nɛ bɔrɛmatapo nimuso na be kebita ko ba mo kutɔ m ba kaŋɛ mo le: “Fo alɛ gba nɛ Galili be Yesu na e daa la.” 70Nɛ Pita chɛ kumo bumo kikɛ be anishito ŋ kaŋɛ le: “Ma ere maŋ pin fo kamalga ere be kifito.” 71Kede be kaman nɛ e lar laŋ na to n yɔ kabuna to, nɛ kebichebi ko malɛ naŋ wu mo nseŋ kaŋɛ bumo nɛ b daa yil ndoŋ na: “Kanyɛn ere nɛ Nazarɛt be Yesu e daa la.” 72Nɛ e bɔ n naŋ chɛ kumo alɛ gba ŋ kaŋɛ le: “M maŋ nyi amo be kanyɛn.” 73K maŋ chɛr ko nɛ basa nɛ b daa yil ndoŋ na firgi n taga Pita to ŋ kaŋɛ mo le: “K baŋ fuli nna fanɛ fo alɛ gba ka la basa ere to be eko, ŋkpal manɛ so, fo kamalga e naa ŋini kakpa nɛ fo shi.” 74Ndoŋ nna nɛ Pita bɔ ntaŋ n deŋi mbe kumu nseŋ kaŋɛ: “M maŋ nyi kanyɛn na kuraa!” 75Epul na to nɛ koshinyɛn boŋ nɛ Pita nyiŋi kusɔ nɛ Yesu daŋ kaŋɛ mo fanɛ: “Pɔɛŋ nɛ koshinyɛn e boŋ, feeŋ chɛ ale asa ŋ kaŋɛ fanɛ fo maŋ nyi ma.” Ndoŋ nna nɛ e lar kowu n ya shu ga.
Currently Selected:
Matiu 26: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation