YouVersion Logo
Search Icon

Malakai 3

3
1Enyɛnpetale na yɛ: “Meeŋ shuŋi ma kabɔ nɛ e ya lɔŋɛ ekpa n yili ma. Nɛ Enyɛnpe Ebɔrɛ nɛ menyee fin na e ba mbe lambu to epul to. Ma kabɔ nɛ menyee jo na beeŋ ba bɔ ma kɔnɔ nase nɛ ma nɛ menyi kre na be kubɔya na n sa menyi.”
2Kachɛ nɛ e beeŋ ba na wanɛ e naŋ tiŋ m ba mbe anishito? E kaŋ lar a ba, wanɛ bre e naŋ pete? E beeŋ baa du fanɛ kɔya nɛ b kɔ a fɔr asɔ nna ŋko edɛ nɛ baa ta a ŋalga abɛlso a lara eyurpi nna. 3Mbe demu be keji beeŋ baa du nna fanɛ b ka ŋalga gbiti a lara amo be eyurpi nna. Kananɛ bɔyɛpo bee ŋalga gbiti nɛ shuwa a lara amo be eyurpi na, nɛ Enyɛnpe gba beeŋ fɔr bɔrɛmatapoana na so, saŋɛ na so baaŋ ta esarga nɛ a daga m ba sa mo Enyɛnpe Ebɔrɛ na. 4Nɛ kumo be loŋ e shin nɛ Juda nɛ Jerusalɛm be basa be esarga nɛ b ta a bar Enyɛnpe Ebɔrɛ na e baa par mo fanɛ kananɛ a daa du dra na.
5Enyɛnpetale yɛ: “Mee ba nɛ m ba ji ŋkilgiwuraana nɛ basa nɛ baa ji kesakalea nɛ bumo nɛ baa ji efɛ be eshɛda nɛ bekama nɛ baa puni bumo be beshumpo kakɔka to na nɛ bumo nɛ baa tɔrɔ bekulpoche nɛ amunibi nɛ befɔ nɛ bumo nɛ b maŋ kɔ bunyaŋ n sa ma na demu.”
Kebaa ka kudukudusopo be asheŋ
6Ma e la Enyɛnpe Ebɔrɛ nɛ maa chɛrga kikɛ na. Amoso menyi nɛ men la Jeekɔb be kaman to ebi na maaŋ mur cheche. 7Men nananyɛnana be jemanɛ so kikɛ nɛ men kplaŋ ma mbra so hale kabre. Men bɛta m ba ŋ kutɔ nɛ ma alɛ gba e bɛta m ba menyi kutɔ. Ama kusɔ nɛ menyee bishi e la fanɛ, ‘Nuso nɛ anyeeŋ wora m ba fo kutɔ?’ 8Kusɔ nɛ mee bishi menyi e la fanɛ, k daga dimɛdi ka bee yuri Ebɔrɛ a? Ayai, loŋ maŋ daga, ama menyi alɛ bee yuri ma. Men yɛ: ‘Nuso nɛ anyee yuri fo?’ Menyi be esarga nɛ men be kudukudusopo nɛ a la meya na to nɛ menyee yuri ma. 9Kɔnɔsho wɔ menyi kikɛ so ŋkpal manɛ so efuli na kikɛ bee yuri ma nna. 10Men ta menyi be kudukudusopo kikɛ m ba Enyɛnpe Ebɔrɛ be lambu to, saŋɛ na so ajibi damta beeŋ baa wɔ ndoŋ. Men wora ma ŋ keni, nɛ m bugi Ebɔrɛso be etokuro n chulgi enɛfa be yiri yiri alegaiso n sa menyi nɛ menyi maaŋ nya kakpa gba n yili amo. 11M maaŋ shin nɛ asɔfirgisobi e jija menyi be adɔjibi saŋɛ na so menyi be afeelebi nɛ a bee sɔr asɔrso nɛ baa tre greep na beeŋ sɔr nɛnɛ. 12Nɛ efuli kama so ebi e malga kananɛ n nɛfa menyi be asheŋ ŋkpal men be kasawule ka beeŋ baa la kakpa nɛ k daga kechena so.
Ebɔrɛ be kuwɔrwu be kɔnɔ naseso be asheŋ
13Enyɛnpe na yɛ, “Men ku asheŋ lubi damta n deŋi ma, ama le nɛ menyee bishi, ‘Manɛ be asheŋ nɛ an ku n deŋi fo?’ 14Men yɛ, ‘K la kawulisheŋ nna fanɛ esa ka beeŋ baa shuŋ Ebɔrɛ, ŋko a wora kusɔ nɛ Ebɔrɛ bee sha ŋko a kaŋɛ Enyɛnpe Ebɔrɛ fanɛ e bee kule mo alubi be ketampaŋ. Manɛ be tɔnɔ nɛ e bee nya kumo to? 15Naniere bre, ŋkpensheŋ wuraana na nɛ anyeeŋ kaŋɛ fanɛ baa nya nɛfa. Belubiworapoana gba bee wora Ebɔrɛ nna a keni nsaa ta bumo be amu a ji.’ ”
16Ndoŋ nna nɛ bekama nɛ baa ŋana Enyɛnpe Ebɔrɛ na bee malga kumo be asheŋ nɛ Enyɛnpe na nu kusɔ nɛ b kaŋɛ na kikɛ nseŋ shin nɛ b sibɛ bumo nɛ baa ŋana mo nsaa sa mo bunyaŋ na be atre n wɔtɔ kawɔl to n nase kanyiŋi so. 17Enyɛnpetale na yɛ: “Baaŋ baa la ma basa. Kachɛ nɛ ŋ gbagba beeŋ ba ji asheŋ nɛ amo be ekpa so na meeŋ kuŋ bumo fanɛ kananɛ etuto bee kuŋ ebi nɛ e kɔ kasonu n sa mo na. 18Ndoŋ nɛ ma basa beeŋ pin basa niŋiso nɛ basa lubi na be mbarga, nseŋ naŋ pin basa nɛ baa shuŋ ma nɛnɛ nɛ bumo nɛ b maa shuŋ ma na be mbarga.”

Currently Selected:

Malakai 3: GJNb

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy