Ɛksodɔs 31

Basa nɛ baaŋ wora Enyɛnpe be wajɛbu na be kushuŋ be asheŋ

1Le be asheŋ ere kikɛ be kaman nɛ Enyɛnpe Ebɔrɛ kaŋɛ Mosis, 2“Keni, n lara Besalɛl nɛ e la Yuri pibinyɛn nsaa la Hur mo nanabi ashi Juda be kanaŋ to na 3nɛ n ta ma kiyoyu n wɔtɔ mo to nseŋ sa mo kasɔwora kikɛ be kenyi nɛ ketiŋ n wora be eleŋ nɛ kasɔlɔŋɛ be kepinto kikɛ nyam be nfɛra na. 4Saŋɛ na so e beeŋ baa tiŋ a ta nfɛra a chaŋ asɔ nsaa ta shuwa nɛ gbiti nɛ danyaŋ nɛ yawu kpakpaso be ajembu nyɛkpɛso 5nɛ ndibi a lɔŋɛ asɔ. 6Ma alɛ naŋ lara Oholiab nɛ e la Ahisamak malɛ pibinyɛn ashi Dan be kanaŋ to nna fanɛ e baa chɛ Besalɛl to a shuŋ. Bekama malɛ gba nɛ b ti so a kɔ enɔ to be kushuŋ be kenyi na, n sa bumo kikɛ kenyi damta, saŋɛ na so, baaŋ tiŋ n wora asɔ kama nyam nɛ ŋ kaŋɛ fo fanɛ b wora na. 7Loŋ be asɔ na e la Enyɛnpe be wajɛbu na, kɔnɔkoŋwule be ŋkre be deka na nɛ kumo be buuso nɛ baa tre kuwɔr be kakpa na 8nɛ shuwa lela be kefitilatɔl na nɛ kumo be asɔwurbi kikɛ nɛ bɔrɛsure nɛ baa chɔɔ duwu kumo so 9nɛ bɔrɛsure nɛ baa lara esarga chɔɔso kumo so na nɛ kumo be asɔwurbi kikɛ nɛ katishaŋgboŋ nɛ kumo be ketɔl na 10nɛ bɔrɛmatapo nimuso Ɛɛrɔn nɛ mbe bibinyɛn be asɔbuuso cheembi nɛ baa buu saŋkama a shuŋ kabɔrɛmata be kushuŋ na 11nɛ ŋku nɛfaso cheembi nɛ duwu nɛ amo be efɛa wɔ ebel nɛ baa chɔ wajɛbu cheembi na to na. A daga fanɛ b wora asɔ kama nyam kananɛ ŋ kaŋɛ fo fanɛ b wora na.”

Kewushiachɛ na be asheŋ

12Ade kikɛ be kaman nɛ Enyɛnpe Ebɔrɛ naŋ kaŋɛ Mosis le: 13“Kaŋɛ Israɛlebi fanɛ b baa bɛ ma kewushiachɛ be daŋkare so nsaa ta kumo fanɛ kachɛ cheembi, ŋkpal manɛ so, kewushiachɛ na la ma nɛ menyi nɛ menyi be kaman to ebi kikɛ be kanyiŋi be kachɛ nna a ŋini fanɛ ma, Enyɛnpe Ebɔrɛ na e lara menyi fanɛ ma basa. 14Men baa bɛ loŋ be kewushiachɛ na be daŋkare so nsaa ta kumo fanɛ kachɛ cheembi. A daga b ka mɔ esa kama nɛ e kini kebɛ kumo so nseŋ shuŋ kumo be kamɔnchɛ. 15Nchɛnshe e daga fanɛ men ta n shuŋ menyi be ashuŋ. Kachɛ shunusopo na bre la kachɛ cheembi n sa ma, Enyɛnpe Ebɔrɛ nna nɛ esa kama daga e ka wushi kamɔnchɛ. Esa kama nɛ e shuŋ kushuŋ kikɛ kumo be kamɔnchɛ daga b ka mɔ mo. 16Amoso a daga fanɛ Israɛlebi nɛ bumo nɛ bumo be kaman to ebi kikɛ ka bɛ ma kewushiachɛ be daŋkare na so nsaa ji kumo fanɛ ma nɛ bumo be kɔnɔkoŋwule be ŋkre be kanyiŋi be kachɛ. 17K beeŋ baa la ma nɛ menyi Israɛlebi be kanyiŋi be kachɛ nna hale mbaanaayɔ, ŋkpal manɛ so, ma, Enyɛnpe Ebɔrɛ na ta nchɛ ashe nna n to esoso nɛ kasawule nseŋ wushi kachɛ shunusopo na.” 18Ebɔrɛ ka malga Mosis kutɔ n loge ashi Sainai be kebee na so nɛ e ta ajembu pantraŋ pantrambi anyɔ nɛ mo ere Ebɔrɛ gbagba sibɛ mbe mbra n deŋi so na n sa Mosis.

Currently Selected:

Ɛksodɔs 31: GJNb

Highlight

Copy

Compare