Ɛksodɔs 30

Duwu be bɔrɛsure na be asheŋ

(Ɛksodɔs 37:25-28)

1“Men ta akasiadibi n lɔŋɛ bɔrɛsure nɛ menyeeŋ baa chɔɔ duwu kumo so 2nɛ kumo be nteŋ nɛ mparto kikɛ e baa sasa fanɛ keyadra koŋwule nɛ bargato nɛ kumo be jeŋgreŋ malɛ e baa la ayadra asa. Men wora esoso be abonfu ana na nɛ a baa du fanɛ alambɛ nɛ amo nɛ kumo kikɛ e baa chɔ abar so a la kukoŋwule. 3Men ta shuwa lela m mata kumo be awɔlto nɛ akel to nɛ alambɛ na kikɛ so ŋ kulti, nseŋ ŋalga shuwa ŋ kulti kumo be nnɔkar kikɛ nɛ a baa du gbuntelin. 4Kumo be kaman nɛ men ta shuwa n lɔŋɛ mpinibi anyɔ n chɔga kumo be akel to, shuwa gbuntelin na be kaseto nsaa yisi ndibi tentembi a wɔtɔ amo to a maŋ kumo so. 5Men ta akasiadibi n wora loŋ be ndibi tentembi na nseŋ ta shuwa m mata amo kikɛ so. 6Kede be kaman nɛ men ta bɔrɛsure na n yili kakpa nɛ ma nɛ fo beeŋ baa shɛr na be patisa nɛ k kuŋ kɔnɔkoŋwule be ŋkre be deka na nɛ kumo be buuso nɛ baa tre kuwɔr be kakpa na be anishito na. 7Ɛɛrɔn baŋ ba nɛ e ba lɔŋɛ efitila na so, kachipurso kikɛ a daga fanɛ e chɔɔ duwu nɛ amo be efɛa wɔ ebel na bɔrɛsure na so. 8Nɛ Ɛɛrɔn naŋ ba kaaseso malɛ nɛ e ba chɔɔ efitila na so, a daga fanɛ e naaŋ wora loŋ koŋwule na. Menyi nɛ men be kaman to ebi kikɛ beeŋ baa lara duwu be sarga ere a sa Enyɛnpe Ebɔrɛ kachɛ kama hale mbaanaayɔ. 9Men sa maŋ kaŋ chɔɔ duwu kama nɛ a maŋ daga ashi loŋ be bɔrɛsure na so, ŋko n lara kusɔbɔya ŋko ayu ŋko asɔnuuso nɛ a maŋ daga be sarga kikɛ kumo so. 10Kafɛ kikɛ malɛ a daga fanɛ Ɛɛrɔn e ta asɔbɔya nɛ b ta n lara kulubi be sarga na be ŋklaŋ n do bɔrɛsure na so kela koŋwule nɛ k ki cheembi. Le be kesheŋ ere la kusɔ nɛ menyi nɛ menyi be kaman to ebi beeŋ baa wora nna hale mbaanaayɔ. Bɔrɛsure ere la kusɔ cheembi nna n sa ma, Eyɛnpe Ebɔrɛ na.”

Enyɛnpe be wajɛbu be toto be asheŋ

11Ade kikɛ be kaman nɛ Enyɛnpe Ebɔrɛ na kaŋɛ Mosis le: 12“Fo kaa karga Israɛl be basa nɛ fo pin bumo be kɔnɔ, fo shin nɛ bumo be ekama e ka kusɔ ko ŋkpal mbe ŋkpa so, saŋɛ na so kulubi kama maaŋ tu mo kekarga na to. 13Ekama nɛ e ti basa nɛ baa karga na so daga fanɛ e ka amansherbi fanɛ kananɛ baa ka lampo ashi Enyɛnpe Ebɔrɛ be wajɛbu na to na. 14Esa kama nɛ b karga nɛ e ji fanɛ nfɛ adunyɔ a yɔ, daga fanɛ e ka loŋ be amansherbi na n sa ma, Enyɛnpe Ebɔrɛ na fanɛ sarga. 15Loŋ be toto na to, a daga fanɛ damawura nɛ etirpo kikɛ e ka a sasa, ŋkpal manɛ so ekama bee ka nna ŋkpal mbe ŋkpa so. 16Sɔ le be amansherbi ere ashi Israɛlebi na kutɔ nɛ a baa la alubi be ketampaŋ be sarga nɛ b ta amo a shuŋ Enyɛnpe be wajɛbu na to be kushuŋ.”

Danyaŋ be katishaŋgboŋ be asheŋ

17Ade kikɛ be kaman nɛ Enyɛnpe Ebɔrɛ naŋ kaŋɛ Mosis le: 18“Men lɔŋɛ danyaŋ be katishaŋgboŋ nɛ kumo be ketɔl n jɔ nchu n wɔtɔ n yili Enyɛnpe be wajɛbu na nɛ bɔrɛsure na be kefɛato. 19Loŋ be nchu na nɛ Ɛɛrɔn nɛ mbe bibinyɛn na beeŋ baa kɔ a fɔr bumo be enɔ nɛ aya so. 20-21K daga fanɛ b baa fɔr bumo be enɔana nɛ aya pɔɛŋ nsaa luri Enyɛnpe be wajɛbu na to n ya kaa lara sarga chɔɔso bɔrɛsure so, saŋɛ na so b maaŋ wu. Le be kesheŋ ere beeŋ baa la mbra nna a dese n sa bumo nɛ bumo be kaman to ebi kikɛ.”

Ŋku nɛfaso na be asheŋ

22Nɛ Enyɛnpe Ebɔrɛ naŋ kaŋɛ Mosis le: 23-25“Men ta efɛa belbelso be asɔ n wora ŋku nɛfaso cheembi. Men karga asɔ na fanɛ kananɛ baa karga asɔ ashi Ebɔrɛ be wajɛbu na to na. Men ta asɔ nɛ baa tre mir na fanɛ kilo ashe nɛ asɔ nɛ baa tre sinamɔn na kilo asa nɛ asɔ nɛ baa tre keen na kilo asa nɛ amo nɛ baa tre kashia na kilo ashe, n wea ɔlif be ŋku lita ana to n wora amo fanɛ kananɛ esa nɛ e nyi tulale be kewora bee wora na, nɛ a ki ŋku nɛfaso cheembi nɛ amo be efɛa wɔ ebel. 26Men wora loŋ be ŋku na ŋ gbiti n nɛfa Enyɛnpe be wajɛbu nɛ kɔnɔkoŋwule be ŋkre be deka na 27nɛ teebɔl na nɛ kumo be asɔwurbi kikɛ nɛ kefitilatɔl na nɛ kumo alɛ gba be asɔwurbi nɛ bɔrɛsure nɛ baa chɔɔ duwu kumo so na 28nɛ bɔrɛsure nɛ baa chɔɔ sarga be asɔ kumo so na nɛ kumo be asɔwurbi kikɛ nɛ katishaŋgboŋ nɛ baa jɔ nchu kumo to a fɔr enɔ nɛ aya na nɛ kumo be ketɔl. 29Men ta asɔ na kikɛ m bɔɔ ma enɔ nɛ amo kikɛ e ki cheembi nɛ kusɔ kama malɛ gba nɛ k beta amo e ki cheembi. 30Ade kikɛ be kaman nɛ men ta ŋku na n do n do Ɛɛrɔn nɛ mbe bibinyɛn na gba so n ta bumo m bɔɔ ma enɔ nɛ b ki bɔrɛmatapoana a shuŋ ma. 31Nɛ fo, Mosis e kaŋɛ Israɛlebi na le: ‘Ŋku ere e naaŋ baa la ma ŋku nɛfaso cheembi n sa menyi nɛ menyi be kaman to ebi kikɛ. 32Men sa maŋ kaŋ ta amo m gbiti esa pɔtɛ be eyur, menyi alɛ be ekama e sa maŋ kaŋ wora amo be kaduli kikɛ, ŋkpal manɛ so, a la ŋku cheembi nna, amoso men baa ta amo fanɛ asɔ cheembi. 33Esa kama nɛ e pel n wora amo be kaduli ŋko n ta amo ŋ gbiti esa pɔtɛ nɛ e maŋ la bɔrɛmatapo, a daga fanɛ b lara mo ashi mbe basa to.’ ”

Duwu be kewora be asheŋ

34Nɛ Enyɛnpe Ebɔrɛ naŋ kaŋɛ Mosis le: “Men ta duwu be asɔ nɛ amo be efɛa wɔ ebel nɛ amo kikɛ be keshi e baa sasa. Amo a la, stakte nɛ onika nɛ galbanum nɛ fraŋkinsensi nɛ a maŋ kɔ eyurpi amo to na. 35Shin nɛ esa nɛ e nyi tulale be kewora e ta amo n wea abar to n wora duwu nɛ a baa dufɛ fanɛ tulale. Kumo be kaman nɛ men ta nfɔl n wea amo to n lara amo be eyurpi nɛ a baa du cheembi. 36Shin nɛ b kɔr ako nɛ a pe fanɛ nyifu na n ta amo ŋ ŋmenyaŋ kɔnɔkoŋwule be ŋkre be deka na be anishito ashi Enyɛnpe be wajɛbu na to be kakpa nɛ ma nɛ fo beeŋ baa tu abar na. A daga fanɛ men baa ta duwu na fanɛ asɔ cheembi. 37Duwu ere la asɔ cheembi nna nsaa la Enyɛnpe Ebɔrɛ peya. Men sa maŋ kaŋ bɔla ekpa nɛ baa bɔla so a wora duwu cheembi so n wora duwu kama n sa men gbagba be amu. 38Esa kama nɛ e kpal amo be efɛa belbelso so n wora amo be kaduli, daga fanɛ b lara mo ashi mbe basa to.”

Currently Selected:

Ɛksodɔs 30: GJNb

Highlight

Copy

Compare