Ɛksodɔs 29

Ɛɛrɔn nɛ mbe mbinyɛnso be keta m bɔɔ Ebɔrɛ enɔ be asheŋ

(Levitikɔs 8:1-36)

1Men kaa shin nɛ men ta Ɛɛrɔn nɛ mbe bibinyɛn na m bɔɔ ma enɔ fanɛ bɔrɛmatapoana, men ta gbolu fɔlbi koŋwule nɛ ekpakpa anyɔ nɛ a maŋ kɔ ndulgi kikɛ. 2Men ta ayunyifu nɛ a pe nɛnɛ n wora bodobodo nɛ a maŋ kɔ yiisi. Men ta ɔlif be ŋku n wora bodobodo na be ako nseŋ wora ako malɛ loŋ, nseŋ ta nyifu na be ako malɛ n wora ekrakashi n ta ɔlif be ŋku n wurge amo so. 3Kumo be kaman nɛ men ta amo n wɔtɔ kelantaŋɛ n ti gbolu fɔlbi na nɛ ekpakpa anyɔ na so m ba lara sarga n sa ma. 4Kede be kaman nɛ men shin nɛ Ɛɛrɔn nɛ mbe bibinyɛn na e ba Enyɛnpe Ebɔrɛ be wajɛbu na be kabuna to m ba bɛr daŋkare be ekpa so. 5Kumo be kaman nɛ men ta bɔrɛmatapo nimuso be asɔbuuso nɛ a la danshiki nɛ piŋi tenteŋ na nɛ kale nɛ k maŋ kɔ mbre nɛ baa tre ɛfɔd na nɛ demuji be kɔlgu na m buu Ɛɛrɔn. Kumo be kaman nɛ men ta ɛfɔd be kreso nɛ enyipo ta ejese n lue nɛnɛ na ŋ kre mo so. 6Amo be kaman nɛ men ta neemu na m mɛa mbe kumu so nseŋ naŋ ta kusɔ paŋgelambi nɛ b sibɛ so na m mata neemu na so. 7Asɔ buuso na be kaman, nɛ men ta ŋku nɛfaso na n do Ɛɛrɔn be kumu so nɛ e ki Ebɔrɛ be esa laraso. 8Kumo be kaman nɛ men ta edanshiki m buu Ɛɛrɔn be bibinyɛn na malɛ 9nseŋ buu bumo nwuro n ta ekreso ŋ kre bumo so. Nɛ men wora loŋ Ɛɛrɔn nɛ mbe bibinyɛn nɛ bumo be kaman to ebi kikɛ beeŋ ki bɔrɛmatapoana a shuŋ ma hale mbaanaayɔ. 10Men baŋ mɛa bumo to n loge, a daga fanɛ men ta gbolu na m ba Enyɛnpe be wajɛbu na be kabuna to m ba shin nɛ Ɛɛrɔn nɛ mbe bibinyɛn na e ta bumo be enɔana n deŋi kumo be kumu so. 11Kumo be kaman nɛ men mɔ gbolu na ma, Enyɛnpe Ebɔrɛ na be anishito ndoŋ 12nɛ fo ta keshilbi n nyɔ gbolu fɔlbi na be ŋklaŋ na to n do n do bɔrɛsure na be alambɛ na so nseŋ chulgi ŋklaŋ na be amo nɛ a ka na malɛ kikɛ n wurge bɔrɛsure na be kaseto. 13Kede be kaman nɛ men lara apuntosɔ be nfɔ na kikɛ ŋ ku kegberche na be kaseto be kaba nseŋ lara achɛbi anyɔ na nɛ amo be nfɔ kikɛ n chɔɔ bɔrɛsure na so n lara sarga n sa ma. 14Ama men yɛr gbolu na be eblaŋ nɛ kawɔl nɛ apumbi bre keeyi na be ekarso n ya chɔɔ. Loŋ be sarga na e naa bar bɔrɛmatapoana be alubi be ketampaŋ na. 15Kumo be kaman nɛ men shin nɛ Ɛɛrɔn nɛ mbe bibinyɛn na e ta bumo be enɔana n deŋi kpakpa nɛ baaŋ mɔ na be kumu so 16nɛ men mɔ kumo nseŋ suse ŋklaŋ na ŋ ŋmenyaŋ ŋ ŋmenyaŋ bɔrɛsure na be mba ana na kikɛ so. 17Kumo be kaman nɛ men kuya kpakpa na to wurwurbi nseŋ fɔr kumo be apuntosɔ nɛ ayawɔrta so nseŋ ta amo n deŋi kumu na nɛ eblaŋ kuyatoso na so 18n chɔɔ bɔrɛsure na so n lara sarga n sa ma. Loŋ be sarga chɔɔso na be efɛa bee par ma, Enyɛnpe Ebɔrɛ na nna. 19Kede be kaman nɛ men shin nɛ Ɛɛrɔn nɛ mbe bibinyɛn e naŋ ta bumo enɔana n deŋi kpakpa nɛ k ka na be kumu so 20nɛ men mɔ kumo nseŋ suse ŋklaŋ na be ako n do n do Ɛɛrɔn nɛ mbe bibinyɛnana na be jisa so be asoe be nseto nɛ bumo be enɔjisaana be ashilbinio so nɛ bumo be ayajiso be anashibinio so nseŋ ta ŋklaŋ nɛ a ka na malɛ kikɛ ŋ ŋmenyaŋ ŋ ŋmenyaŋ bɔrɛsure na be mba ana na kikɛ so. 21Kede malɛ be kaman nɛ men nyia bɔrɛsure na so be ŋklaŋ na be ako n wea ŋku nɛfaso na be ako to ŋ ŋmenyaŋ Ɛɛrɔn nɛ bibinyɛn na nɛ bumo be asɔbuusoana kikɛ so. Saŋɛ na so Ɛɛrɔn nɛ mbe bibinyɛnana na beeŋ ki ma, Ebɔrɛ be basa laraso nɛ bumo be asɔbuuso e ki asɔ cheembi ashi ma anishito. 22Ŋkpal kpakpa ere ka la keta m bɔɔ Ebɔrɛ enɔ be kewora be kusɔbɔya na so, men lara kumo be kpandu nɛ k kɔ nfɔ nɛ apuntosɔ be nfɔ nɛ kegberche na be kaseto be kaba nɛ achɛbi anyɔ na nɛ amo be nfɔ nɛ kumo be jisa be kebɛaŋ 23n ti bodobodo nɛ a maŋ kɔ yiisi na nɛ bodobodo nɛ a kɔ ɔlif be ŋku nɛ amo nɛ a maŋ kɔ nɛ krakashi na so n lara sarga n sa ma. 24Men shin nɛ Ɛɛrɔn nɛ mbe bibinyɛn na e maŋ amo so ma, Enyɛnpe Ebɔrɛ na be anishito fanɛ kakɛ cheembi be sarga. 25Kumo be kaman nɛ men sɔ amo bumo kutɔ n chɔɔ bɔrɛsure na so ashi kakpa nɛ baa chɔɔ sarga chɔɔso na. Loŋ be sarga be efɛa bee par ma, Enyɛnpe Ebɔrɛ na nna. 26Kumo alɛ be kaman nɛ fo maŋ kpakpa nɛ b ta n lara Ɛɛrɔn be keta m bɔɔ Ebɔrɛ enɔ be sarga na be kagbene so ashi ma, Enyɛnpe Ebɔrɛ na be anishito. Kusɔbɔya na be kagbene na la fo kachige nna. 27Kpakpa na be kagbene be kaba nɛ jisa be kebɛaŋ nɛ b maŋ so ma, Enyɛnpe Ebɔrɛ be anishito na malɛ la Ɛɛrɔn nɛ mbe bibinyɛn na peya nna. 28Saŋkama nɛ menyi, ma basa Israɛlebi baŋ mɔ kusɔbɔya n lara kɔnɔkoŋwule be sarga, kusɔbɔya na be kagbene nɛ kebɛaŋ la Ɛɛrɔn nɛ mbe bibinyɛn peya nna. Loŋ be eblaŋ na la meya nna, ama bɔrɛmatapoana e naaŋ baa ji amo hale mbaanaayɔ. 29Nɛ Ɛɛrɔn baŋ wu, mbe mbinyɛnbi na be eko e naŋ ta mbe kabɔrɛmata be piŋi na. 30Emo nɛ e sɔ mo so ŋ ki bɔrɛmatapo nimuso a luri Enyɛnpe be wajɛbu na to be kakpa cheembi na, daga fanɛ e buu kabɔrɛmata be piŋi na saŋkama nɛ e bee luri ndoŋ hale n ya fo nchɛnshunu. 31Men daŋɛ kpakpa nɛ men ta n lara Ɛɛrɔn nɛ mbe bibinyɛnana be keta m bɔɔ Ebɔrɛ enɔ be sarga na be eblaŋ wajɛbu na be kelɔnɛ so 32nɛ Ɛɛrɔn nɛ mbe bibinyɛn na e yili nshɛr be wajɛbu na be kabuna to n we eblaŋ na nɛ bodobodo nɛ a ka a wɔ kelantaŋɛ na to na. 33Bumo e daga b ka ji asɔ nɛ b ta n lara alubi be ketampaŋ be sarga na saŋɛ nɛ b ta bumo m bɔɔ Ebɔrɛ enɔ nɛ b ki bɔrɛmatapoana na. A maŋ daga esa pɔtɛ kama ka ji loŋ be asɔ na, ŋkpal manɛ so a la asɔ cheembi nna. 34Ama nɛ fanɛ amo be ako ka nseŋ di ŋklade, men chɔɔ amo nɛ esa kama e sa maŋ kaŋ ji amo, ŋkpal manɛ so, a la asɔ cheembi nna. 35Ta nchɛnshunu dede n wora Ɛɛrɔn nɛ mbe bibinyɛn be keta m bɔɔ Ebɔrɛ enɔ be kasheŋwora na fanɛ kananɛ ŋ kaŋɛ fo na gbagba chap. 36Nchɛnshunu na be karechɛ kama malɛ, men ta gbolu n lara alubi be ketampaŋ nɛ bɔrɛsure na be kefɔrso be sarga. Kumo be kaman nɛ men ta ɔlif be ŋku ŋ gbiti bɔrɛsure na so nɛ k ki cheembi. 37Nchɛnshunu na be karechɛ kama men lara alubi be ketampaŋ be sarga bɔrɛsure na so, saŋɛ na so, bɔrɛsure na beeŋ baa du cheembi nɛ kusɔ kama nɛ k beta kumo gba e baa du cheembi.

Karechɛ kikɛ be sarga be asheŋ

(Nɔmbɛs 28:1-8)

38Karechɛ kikɛ men baa ta nfɛ koko be ekpakpafɔlbi anyɔ anyɔ a lara sarga bɔrɛsure na so. 39Men ta kukoŋwule n lara sarga na kachipurso nseŋ ta kumo nɛ k ka malɛ n lara sarga kaaseso. 40Men ta ɔlif be ŋku lela fanɛ lita koŋwule m baga bodobodo be nyifu lela fanɛ kilo koŋwule nseŋ ta wain fanɛ lita koŋwule nɛ a baa la asɔnuuso be sarga n ti sososo be kpakpafɔlbi na so n lara sarga na. 41Kumo be kaman nɛ men naŋ ta kpakpafɔlbi nyɔsopo na nɛ asɔ nɛ men daŋ ta n ti chipurso peya na so na gbagba chap n ti so n chɔɔ n lara sarga kaaseso n sa ma. Loŋ be sarga chɔɔso na be efɛa bee wora ma, Enyɛnpe Ebɔrɛ na ebel ga. 42Le be sarga chɔɔso ere beeŋ baa la sarga nɛ menyi nɛ men be kaman to ebi kikɛ beeŋ baa lara saŋkama mbaanaayɔ ashi Enyɛnpe be wajɛbu na be kabuna to ma, Enyɛnpe Ebɔrɛ na be anishito. Ndoŋ nɛ meeŋ baa tu menyi nsaa malga fo kutɔ. 43Ndoŋ nɛ ma nɛ Israɛl be basa beeŋ baa shɛr nɛ ma kemaŋkura e shin nɛ ndoŋ e ki ma kakpa cheembi. 44Ma alɛ beeŋ shin nɛ Enyɛnpe be wajɛbu na nɛ bɔrɛsure na e ki ma asɔ cheembi. Nseŋ naŋ shin nɛ Ɛɛrɔn nɛ mbe bibinyɛn na malɛ gba e ki basa laraso cheembi a shuŋ ma fanɛ bɔrɛmatapoana. 45Saŋɛ na so, nɛ ŋ gbelge m baa kaa wɔ Israɛlebi na to a la bumo be Ebɔrɛ. 46Aloŋ nɛ baaŋ ba pin fanɛ ma e la Enyɛnpe bumo be Ebɔrɛ nɛ n lara bumo ashi Ijipt nsaa wɔ bumo to na. Ma e la Enyɛnpe bumo be Ebɔrɛ na.”

Currently Selected:

Ɛksodɔs 29: GJNb

Highlight

Copy

Compare