Ɛksodɔs 27

(Ɛksodɔs 38:1-7)

1Kede be kaman nɛ men naŋ ta akasiadibi n lɔŋɛ bɔrɛsure n shin nɛ kumo be nteŋ to nɛ kumo be mparto kikɛ e baa sasa nsaa la ayadra ashunu nɛ bargato, nɛ kumo be jeŋgreŋ malɛ e baa la ayadra ana nɛ bargato. 2Men wora kumo be esoso be abonfu ana na nɛ a baa du fanɛ alambɛ n shin nɛ bɔrɛsure na nɛ alambɛ na kikɛ e chɔga abar so a la kukoŋwule. Kumo be kaman nɛ men ta danyaŋ m mata bɔrɛsure na kikɛ so. 3Kumo be kaman nɛ men ta danyaŋ n lɔŋɛ asɔ nɛ b kɔ a shuŋ kumo so fanɛ nsunɔ be mpuliya nɛ eshabɔl nɛ ntishaŋgboŋ, nɛ kusɔ nɛ baa ta a chule eblaŋ nɛ kusɔ chɔ edɛ. 4Kede be kaman nɛ men ta danyaŋ n lɔŋɛ kusɔ ŋeseasɔ nseŋ lɔŋɛ danyaŋ be mpinibi ana m mata kumo be abonfu ana na kikɛ so. 5Kumo be kaman nɛ men ta kusɔ ŋeseasɔ na n wɔtɔ bɔrɛsure na be nferinto. 6Men ta akasiadibi n shɛl ndibi tenteŋ nɛ baaŋ baa ta a sulɔ bɔrɛsure na nseŋ ta danyaŋ n mata amo so. 7Kumo be kaman nɛ men ta amo n yisi n wɔtɔ bɔrɛsure na be akel to be mpinibi anyɔ na to a pɛ amo to a ta kumo. 8Men ta ndibi peŋgeleŋ peŋgeleŋ n lɔŋɛ bɔrɛsure na nɛ k baa kɔ kelaŋ kumo to fanɛ kananɛ ŋ ŋini menyi ashi kebee na so na gbagba chap.

Wajɛbu na be kelɔnɛ be asheŋ

(Ɛksodɔs 38:9-20)

9Men lɔŋɛ Ebɔrɛ be wajɛbu na be kelɔnɛ gba nɛ kumo be kelargato be kaseto be kaba so be nteŋ to e fo fanɛ ayadra kalfa nɛ adunu, nseŋ ta ago lueso lela be patisa ŋ kulti kumo. 10-11Men shin nɛ kumo be kelargato be esoso be kaba so be nteŋ to e baa la ayadra kalfa nɛ adunu nɛ mba anyɔ na kikɛ e nya ndibi yuuso adunyɔnyɔ nɛ amo be danyaŋ be atɔl adunyɔnyɔ. Men ta gbiti n lɔŋɛ ndibi yuuso be anyembi nɛ akɔltobi nɛ a kɔl patisa na to na. 12Kelɔnɛ na be mparto nɛ a laŋɛ epeŋitɔrkpa be kaba so na be nteŋ to e baa la ayadra adushunu nɛ anu nɛ amo be ndibi yuuso nɛ atɔl e baa la kudu kudu. 13Bɔrɛsure na be anishito a yɔ epeŋilarkpa be kaba so na malɛ be mparto e baa la ayadra adushunu nɛ anu. 14Men shin nɛ kumo be kabuna to be kaba ko be patisa be nteŋ to e baa la ayadra adunyɔ nɛ anyɔ nɛ bargato nsaa kɔ ndibi yuuso asa nɛ atɔl asa. 15Kaba nɛ k ka na malɛ gba be patisa be nteŋ to e baa la ayadra adunyɔ nɛ anyɔ nɛ bargato nsaa kɔ ndibi yuuso asa nɛ atɔl asa. 16Kumo be kaman, men shin nɛ esa nɛ e nyi kajɔ e ta ejese nɛ a la buru nɛ apeper kpaw nɛ ago be ejese lela mɔlmɔlbi n lue Ebɔrɛ be wajɛbu na be kelɔnɛ so be kabuna to gbagba be patisa nɛ kumo be nteŋ to e baa la ayadra adesa, nsaa kɔ ndibi yuuso ana nɛ amo be atɔl ana. 17Men ta gbiti m mata ndibi yuuso nɛ a kulti kelɔnɛ na kikɛ nseŋ ta gbiti n lɔŋɛ amo be akɔltobi, nseŋ ta danyaŋ malɛ n lɔŋɛ amo be atɔl. 18Men shin nɛ kelɔnɛ na be nteŋ to e baa la ayadra kalfa nɛ adunu nɛ kumo be mparto e baa la ayadra adushunu nɛ anu nɛ kumo be ago be patisa be nteŋ malɛ e baa la ayadra ashunu nɛ bargato. A daga fanɛ b ta danyaŋ n lɔŋɛ atɔl na kikɛ 19nɛ asɔ nɛ b kɔ a shuŋ Ebɔrɛ be wajɛbu na to nɛ kelɔnɛ na so nɛ ayir nɛ b yuu ŋ kulti kumo na kikɛ nyam.

Kefitilatɔl na be kekeniso be asheŋ

(Levitikɔs 24:1-4)

20Ade kikɛ be kaman kaŋɛ Israɛlebi na kenishipereso fanɛ b baa bar fo ɔlif be ŋku nɛ a maŋ kɔ eyurpi nɛ fo baa ta a chɔɔ efitiliana na so a yili saŋkikɛ. 21Ɛɛrɔn nɛ mbe mbinyɛnso e daga fanɛ b baa chɔɔ efitila na so a yili patisa nɛ k kuŋ kɔnɔkoŋwule be ŋkre be deka na be anishito na. B baa chɔɔ efitila na so kaaseso kikɛ nɛ a baa fuli to ma, Enyɛnpe Ebɔrɛ be wajɛbu na to a klade. A daga fanɛ Israɛlebi nɛ bumo be kaman to ebi kikɛ e baa bɛ mbra ere so mbaanaayɔ.

Currently Selected:

Ɛksodɔs 27: GJNb

Highlight

Copy

Compare