Ɛksodɔs 26

Ebɔrɛ be wajɛbu be asheŋ

(Ɛksodɔs 36:8-38)

1“Le e daga fanɛ men lɔŋɛ Ebɔrɛ be wajɛbu na, men ta ago be ejese lela mɔlmɔlbi nɛ ejese nɛ a la buru nɛ kepeper kpaw n lue epatisa kudu nseŋ shin nɛ esa nɛ e nyi kajɔ e ta kebasibi nɛ jese n jɔ chɛrubim be kaduli n deŋi n deŋi epatisa na so. 2Men shin nɛ epatisa na kikɛ e baa sasa nɛ amo be kekama be nteŋ to e baa la ayadra be nteŋ kuduana nɛ anyɔ nɛ amo be kekama be mparto malɛ e baa la keyadra be nteŋ ashe. 3Kumo be kaman nɛ men baa epatisa na be anu n chɛ abar so nɛ a ki fanɛ patisagboŋ koŋwule nseŋ naŋ baa anu nɛ a ka na malɛ n chɛ abar so nɛ amo alɛ gba e ki fanɛ patisagboŋ koŋwule. 4Men ta wajɛchɛbi nɛ k la buru m baa asɔ kulkulso fanɛ afirgi m mata m mata epatisagboŋ anyɔ na be kekama be kekilso. 5Men baa wajɛ buru be afirgi na be adunu m mata patisagboŋ ko be kekilso nseŋ baa adunu malɛ m mata kenyɔsopo na be kekelso nɛ afirgi na e karga abar so nseŋ shoŋi abar. 6Kumo be kaman nɛ men ta shuwa m bɛl akɔltobi adunu, ŋ kɔl epatisagboŋ anyɔ na be afirgi adununu na to, nɛ epatisagboŋ anyɔ na e ki wajɛbu koŋwule. 7Kumo be kaman nɛ men ta mboe be afuibi n lue ewajɛ kudukako nɛ a ki Ebɔrɛ be wajɛbu na be buuso. 8Men shin nɛ amo kikɛ e baa sasa nɛ amo be kekama be nteŋ e baa la ayadra adena nɛ anu nɛ amo be mpar malɛ e baa la ayadra ashe. 9Nɛ men baa ewajɛ na be anu n chɛ abar so nɛ a ki patisagboŋ koŋwule nseŋ baa ashe nɛ a ka na malɛ nɛ a ki patisagboŋ koŋwule nɛ men bɔɔ kenyɔsopo na be wajɛ shesopo na to nɛ kumo be kaba e chulgi Ebɔrɛ be wajɛbu na be anishito. 10Men baa asɔ kulkulbi fanɛ afirgi adununu m mata m mata epatisagboŋ anyɔ na be akel so. 11Kede be kaman nɛ men ta danyaŋ m bɛl akɔltobi adunu, nseŋ ta amo ŋ kɔl afirgi adununu na to, nɛ epatisagboŋ anyɔ na e ki wajɛbu koŋwule. 12Men shin nɛ patisa na be kaba nɛ k ka na malɛ e chulgi wajɛbu na be kaman to. 13Men shin nɛ epatisa na be kananɛ a chul na e baa sa fanɛ keyadra koŋwule nɛ bargato ashi kaba kama so. Saŋɛ na so Ebɔrɛ be wajɛbu na beeŋ pɛ abar ŋ keta nɛnɛ. 14Ade be kaman nɛ men ta ekpakpa be nwɔl nɛ b nyɔɔ m pere n naŋ lɔŋɛ wajɛbu na be buuso nyɔsopo, nseŋ ta echuru be nwɔl nɛ b gbiti nɛnɛ ŋ ki lalaloge be buuso. 15Kede malɛ be kaman, men ta akasiadibi niŋiso ŋ ki Ebɔrɛ be wajɛbu na be ndibi yuuso. 16Ndibi yuuso na be kekama be nteŋ e baa la ayadra kuduanu nɛ bumburuŋ malɛ e baa la ayadra anyɔ. 17Nɛ men gbir ayir anyɔnyɔ ndibi yuuso na be kekama ase nɛ ayir na e bɛ abar so. A daga fanɛ men yuu Ebɔrɛ be wajɛbu na be ndibi yuuso na kikɛ loŋ. 18Men yuu ndibi yuuso be adunyɔ Ebɔrɛ be wajɛbu na be kelargato be kaseto be kaba so. 19Kumo be kaman nɛ men ta gbiti n lɔŋɛ ndibi yuuso na be atɔl adena, nɛ atɔl anyɔ e baa wɔ kedibi yuuso kama be kaseto. 20Kede be kaman nɛ men yuu ndibi yuuso adunyɔ Ebɔrɛ be wajɛbu na be kelargato be esoso be kaba so 21nseŋ naŋ ta gbiti n lɔŋɛ amo be atɔl adena n shin nɛ atɔl anyɔ e baa wɔ kedibi yuuso kama be kaseto. 22Kede be kaman nɛ men wora Ebɔrɛ be wajɛbu na be epeŋitɔrkpa be kaba so malɛ be ndibi yuuso ashe 23nɛ kumo be abonfu to be ndibi yuuso anyɔ. 24Men wora amo be kekama anyɔnyɔ n shin nɛ ndibi anyɔ kama e fara kaseto m mata abar n ya fo esoso nseŋ ta kepinibi n wɔtɔ amo to be esoso 25nɛ ndibi yuuso na e wora aburwa nɛ amo be gbiti be atɔl malɛ e wora kuduashe. 26Ade kikɛ be kaman nɛ men ta akasiadibi blɔmbi tentembi kuduanu ŋ ki ndibi deŋiso nseŋ ta amo be anunu n deŋi Ebɔrɛ be wajɛbu na be kelargato be esoso nɛ kaseto be ndibi yuuso na so 27nseŋ ta anu malɛ ŋ deŋi kumo be epeŋitɔrkpa be kaba so be ndibi yuuso so. 28K daga fanɛ kedibi deŋiso nɛ k wɔ ndibi blɔmbi deŋiso anu na be nferinto na ka fara kebonfu ko n ya fo kuko. 29Kumo be kaman nɛ men ta shuwa m mata ndibi yuuso na kikɛ so nseŋ ta shuwa n lɔŋɛ amo be mpinibi nɛ a bee pɛ ndibi blɔmbi deŋiso na to a keta na nseŋ ta shuwa m mata ndibi blɔmbi deŋiso na gba so. 30Men lɔŋɛ Ebɔrɛ be wajɛbu nɛ k baa kɔ ebu anyɔ fanɛ kananɛ ŋ ŋini fo ashi kebee na so na gbagba chap. 31Men ta ejese nɛ a la buru nɛ apeper kpaw nɛ ago nɛ ago be ejese lela mɔlmɔlbi n lue patisa ko nseŋ shin nɛ esa nɛ e nyi kajɔ e ta kebasibi nɛ jese n jɔ chɛrubim be nduli ŋ deŋi n deŋi epatisa na so. 32Men ta epatisa nɛ b jɔ na n shiga akasiadibi yuuso ana nɛ b ta shuwa m mata amo so nɛ a yil gbiti be atɔl ana so nsaa kɔ shuwa be akɔltobi na so. 33Kumo be kaman nɛ men ta patisa na ŋ kuŋ to nɛ k barga acheembiana to be kakpa cheembi na ashi kakpa cheembi na to nseŋ ta kɔnɔkoŋwule be ŋkre be deka na n yili patisa na be kaman 34n ta buuso nɛ baa tre kuwɔr be kakpa na m buu deka na so ashi acheembiana to be kakpa cheembi na to. 35Kumo be kaman nɛ men ta sarga be bodobodo be teebɔl na n yili kakpa cheembi na to ashi Ebɔrɛ be wajɛbu na be kelargato be esoso be kaba so, nseŋ ta kefitilatɔl na malɛ n yili a laŋɛ kumo be kelargato be kaseto be kaba so. 36Men shin nɛ esa nɛ e nyi kajɔ e ta ejese buru nɛ apeper kpaw nɛ ago nɛ ago be ejese lela mɔlmɔlbi n lue Ebɔrɛ be wajɛbu na be kabuna be epatisa. 37Kumo be kaman nɛ men ta patisa na n shiga akasiadibi yuuso anu nɛ b ta shuwa m mata amo nɛ a kɔ shuwa be akɔltobi nɛ danyaŋ be atɔl anu na so.

Currently Selected:

Ɛksodɔs 26: GJNb

Highlight

Copy

Compare