Kalatias 4

1Lub ntsablug kws kuv has yog le nuav: lawvle ibtxwm leejtxiv yeej muab nwg tej cuabtxhaj cuabtaam rua nwg tug tub. Txawm yog tug tub yeej yuav tau txhua yaam ntawd huv tuabsi los thaus nwg tseem yau, nwg yeej txawv tsi ntau le ib tug qhev. 2Thaus nwg tseem yau yeej muaj tuabneeg saib nwg hab ceev nwg tej qubtxeeg qubteg moog txug nub kws nwg txiv teem ca lawm. 3Ib yaam nkaus le ntawd, thaus peb tseem zoole tug mivnyuas yau kws tsi tau paub Vaajtswv, peb ua dlaab tauj dlaab qhev. 4Tabsis thaus txug lub sijhawm kws Vaajtswv teem ca lawm, Vaajtswv tau khaiv Nwg tug Tub lug yug rua huv ib tug quaspuj; Nwg kuj coj lawvle cov Yudais txuj Kevcai ib yaam le suavdlawg, 5Nwg txhaj cawm tau cov kws txuj Kevcai muab khi ca lawm kuas dlim, sub peb txhaj tau lug ua Vaajtswv cov mivnyuas.

6Vim peb yog Vaajtswv cov mivnyuas, Vaajtswv txhaj khaiv Vaajtswv tug Tub tug Ntsujplig lug nyob huv peb lub sab, tug Ntsujplig ntawd yog tug kws qha peb hu Vaajtswv has tas, “Anpas,#4:6: Lulug Anpas yog lug Alamej kws txhais has tas “Txiv”. Txiv.” 7Yogle ntawd mej tsi yog ib tug qhev lawm, tabsis mej yog Vaajtswv le ib tug mivnyuas. Vim mej yog Nwg cov mivnyuas lawm, mej yuav tau txais txhua yaam kws Vaajtswv npaaj ca rua Nwg cov mivnyuas. #Loos 8:15-17

Paulus Txuj Kev Txhawjxeeb Txug Cov Kalatias

8Yaav taag lug mej tsi paub Vaajtswv, mej txhaj moog ua qhev rua tej kws tub tsi yog vaajtswv hlo le. 9Tabsis nwgnuav mej tub paub Vaajtswv lawm, lossis, qhov tseeb tag yog nwgnuav Vaajtswv tub paub mej lawm, ua lecaag mej txhaj xaav rovqaab moog coj dlaab? Tej dlaab ntawd yeej tsi muaj fwjchim hab tsi muaj qaabhau dlaabtsi le, es mej tseem xaav rovqaab moog ua cov dlaab ntawd le qhev dlua hab nua lov? 10Mej tseem caiv nub, caiv hli, caiv caijnyoog, hab caiv xyoo. 11Kuv txhawj txug mej heev! Puas yog tej dlejnum kws kuv tuaj ua rua mej cale tsi muaj qaabhau dlaabtsi le lawm?

12Cov kwvtij, kuv thov kuas mej ua le kuv ua, ruaqhov kuv tub ua le mej ua lawm hab. Mej tsi tau ua dlaabtsi txhum rua kuv le. 13Mej tub paub lawm has tas thawjzag kws kuv tuaj saib mej, kuv mob kuv txhajle tau qha Txuj Moo Zoo rua mej. 14Tabsis txawm yog kuv tug mob ua rua mej tau kev nyuajsab los mej tsi ntxub kuv, mej tseem saib taug kuv. Mej tseem txaistog kuv zoo ib yaam le kuv yog Vaajtswv ib tug timtswv lossis ib yaam le kuv yog Yexus Khetos ntaag. 15Thaus ntawd mej zoosab rua kuv kawg le! Nwgnuav mej tsi ncuqaab lawm lov? Kuv yeej muaj peevxwm has tau has tas thaus ntawd yog mej muaj cuabkaav dlawj tau mej ob lub qhovmuag rua kuv los mej yeej yuav dlawj kuas tau. 16Puas yog vim kuv qha qhov tseeb rua mej, es nwgnuav mej txhajle suav has tas kuv yog mej tug yeebncuab lawm?

17Cov tuabneeg ntawd ua txhua yaam txhua tsaav kuas mej muaj sab npuab puab, tabsis puab muaj ib lub homphaj kws tsi zoo. Qhov kws puab xaav tau tes yog puab xaav muab mej rhu tawm ntawm kuv moog, sub mej lub sab txhajle npuab puab ib yaam le puab npuab mej. 18Qhov kws muaj tuabneeg muab sab npuab mej lug ntawm pluajsab kws zoo, qhov ntawd zoo heev, tsi has thaus kuv nrug mej nyob lossis tsi nrug. 19Cov mivnyuas kws kuv hlub 'e, kuv mobsab rua mej ib yaam le tug quaspuj kws yuav yug mivnyuas. Ntshe kuv yuav mobsab le nuav moog txug thaus mej muaj tug yaamntxwv zoole Yexus Khetos. 20Kheevlaam yog taamsim nuav kuv nrug mej nyob, mas kuv yuav ua tuabzoo has mej, ruaqhov kuv txhawj mej heev.

Hankas Hab Xalas Obtug Tug Yaamntxwv

21Ca kuv nug mej cov kws xaav nyob huvqaab kev tswjfwm ntawm txuj Kevcai seb, mej puas paub tas txuj Kevcai ntawd qha lecaag rua mej? 22Txuj Kevcai ntawd qha has tas Anplahaas muaj ob tug tub, ib tug yog tug quaspuj kws ua qhev yug, ib tug yog tug quaspuj kws tsi ua qhev yug. #Chiv 16:5; Chiv 21:2 23Tug tub kws yog tug puj qhev yug, nwg yug lawvle tuabneeg ibtxwm yug, tabsis tug tub kws yog tug puj kws tsi ua qhev yug, nwg yug lawvle Vaajtswv lulug cogtseg.

24Ob tug quaspuj kws kuv pav rua mej nuav pev ib yaam le yog Vaajtswv ob nqai lug cogtseg. Tug quaspuj kws yug tau cov mivnyuas qhev ntawd yog Hankas, nwg pev ib yaam le Vaajtswv nqai lug cogtseg kws Vaajtswv muab sau Roob Xinais. 25Hankas pev ib yaam le lub Roob Xinais kws nyob huv tebchaws Alanpias kws#4:25: Hankas … kws; tej phoo ntawv qub kws xuas teg sau, muaj Xinais yog ib lub roob kws nyob huv tebchaws Alanpias. yog pev txug lub nroog Yeluxalees nwgnuav, ruaqhov lub nroog hab cov pejxeem puavleej poob moog ua luas qhev. 26Tabsis lub nroog Yeluxalees kws nyob sau ntuj, nwg tsi ua qhev, nwg yog peb nam. 27Ruaqhov Vaajtswv Txujlug has tas:

“Tug quaspuj kws xeeb tsi taug mivnyuas koj cale zoosab!

Tug quaspuj kws tsi tau mob dlua plaab yug mivnyuas, koj cale seev suab qw nrov-nrov has tas koj zoosab kawg le!

Ruaqhov tug quaspuj kws tug quasyawg muab tsotseg lawm, nwg yuav muaj mivnyuas coob dlua

tug quaspuj kws muaj tug quasyawg nrug nyob.” #Yaxaya 54:1

28Zagnua, cov kwvtij, mej yog Vaajtswv cov mivnyuas lawvle Vaajtswv lulug cogtseg, ib yaam le Ixaj ntaag. 29Lub sijhawm ntawd, tug tub kws yug lawvle tuabneeg ibtxwm yug, tau tsimtxom tug tub kws Vaajtswv tug Ntsujplig yug; txawm yog najnub nwgnuav los tseem muaj le ntawd hab. #Chiv 21:9 30Tabsis Vaajtswv Txujlug has lecaag? Vaajtswv Txujlug has tas, “Cale ntab tug puj qhev hab nwg tug tub tsiv moog; ruaqhov tug puj qhev ntawd tug tub yuav tsi muaj feem lug nrug tug puj kws tsi ua qhev ntawd tug tub txais leejtxiv tej cuabtxhaj cuabtaam hlo le.” #Chiv 21:10 31Yogle ntawd cov kwvtij, peb tsi yog tug puj qhev cov mivnyuas, tabsis peb yog tug puj kws tsi ua qhev cov mivnyuas.

Currently Selected:

Kalatias 4: HNJ2022

Highlight

Copy