HABAKUK 3
3
Sambayang di Habakuk
1Iti no o sambayang di Nabi Habakuk.#3.1 Id suang nopod boros dot Ibrani om haro o boros do nokoruhang diti, nga' a' i' oilaan no o komoyon diri.
2Nokorongou oku no di winonsoi nu, oi Tuhan,
om poimponu' oku pod koimayaan.
Wonsoyo' no kawagu do baino' i pingwonsoyon nu dit angagayo,
do miagal di winonsoi nu di gulu po.
Insianai no iyahai do mulong piya dot otogod ko.
3Rumikot no kawagu o Kinorohingan it Olidang Kopio do mantad hilo'd Timan;#3.3 Timan: Idom o komoyon diti.
rumikot no o Kinorohingan dit olidang do mantad hilo'd konuluhanan do Paran.
Koponu' do tawan i kagayaan dau;
om iti pomogunan nga' poimponu' pod pamarayou dau.
4Rumikot iyau do mikuwo'd tulinau di kosorong;
om malab-kalab o tulinau do mantad hiri'd palad dau,
i pinolisakan dau do sinundu dau.
5Sinuhu' dau i toruo-ruol do mogulu dau,
om sinuhu' dau o kapatayon do sumusuhut dau.
6Soira' nopo do mundorong iyau, om gumuyu' noti pomogunan;
om alambayan nopod mato dau nga' pananggagaran no i bansa'.
Otuhan i' i konuluhanan di hino kasai' piya,
om minsiriba' i konulu-nuluan dit a' piya tumanus,
i konulu-nuluan di pinimpanahan dau di gulu po.
7Moddosi po i tulun do Kusan dot okito ku
om sanggagaran i tulun do Midian.
8Ilo' toi bawang o pinopotogod diya', oi Tuhan?
Ilo' toi rahat o pinapalasu' do ginawo nu?
Suminakai ko do haun;
om korita'-kuda' nu nopo di don sumasangod om i haun do mitonggoi'd tongus;
do tontok di minanahak ko do kamanangan dot id tulun nu.
9Nokounda' nu no i pana' nu,
om posodia' ko no do papana' di pana' nu.#3.9 Komoyon nopo doti'dti om: posodia' ko no do papana' di pana' nu.
Pinitas nu iti pomogunan dot i kodumaat nu o pinomitas nu.
10Soira' di nokokito diya' i konuluhanan, om koguyu' nopo iri;
om miagal pod posougon o waig do rasam do mantad hilo'd tawan.
Ongorod po i waig dot id saalom diti tana',
om agayo tomod i tumbak.
11Mundorong nopo ilo tadau om tulan
dot okohusan di pana' nu dit osiau
om akalaban di tandus nu dit okilou.
12Mindarapas ko podti pomogunan dot atatagadan;
om pingulakan nu i bansa' dot atatagadan ko.
13Suminoliwan ko do minongoi pamasi di tulun nu,
om mongoi pamasi di raja' di nopili' nu.
Pinaratu' nu i boyoon di tulun dot angaraat
om pinunso nu i soudor di tuminanud dau.#3.13 Komoyon nopo doti'dti om: om pinunso…di tuminanud dau.
14Notobok di pana' nu i boyoon di soudor do pisangod
do tontok di ruminikot iyolo' do mongoi popogitompias-pias dati',
om mingirak iyolo' do monguntotogod do miagal poddi tulun do momolisok-lisok i' do mongulok-ulok di tulun do mosikin.#3.14 Id suang nopod solinan dot Ibrani om a' atarang no o komoyon dot ayat 14.
15Piningulakan di kuda' nu i rahat,
gisom do mogimputa' poddi i waig do rahat.
16Gagaran oku po do tontok di nokorongou ngai' oku'ddi;
munung ku nga' gagaran poo dot opopoddosian.
Lumomok nopo o tinan ku,
om kasadu o gakod ku, om a' oku no kapanau.#3.16 Komoyon nopo doti'dti om: om kasadu o gakod ku, om a' oku no kapanau; Solinan dot Ibrani: oborulong oku, tu'.
Mundorong oku nopondo do magandad di maso
do kopomohukuman do Kinorohingan di manangod dati'.
17Mulong pod aiso' o tua' di guas dot ara
om aiso' o tua' di guas dot anggur,
om mulong piya dot aiso' o hasil di saitun
om a' sunian do gandum o hilo'd dumo,
om mulong piya do matai ngai' o dumba'
om aiso' o suang di kandang do tayam-tayam,
18nga' otood kasai' oku i',
tu' Tuhan no i Kinorohingan o gampamasi doho'.
19Onuan#2So. 22.34, Sin. 18.33 oku'd Tuhan do kokorisan.
Pokorison dau o gakod ku do miagal do gakod do tambang.
Gompion oku i' diya', om aiso' indo o koligagaanan ku
do tontok do mamanau oku do hilo'd konuluhanan.
Currently Selected:
HABAKUK 3: BDK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2007, Pertubuhan Bible Malaysia Copyright © 2007, Bible Society of Malaysia
