یوحنا 4
4
عیسی سامِره‌لی آیال بیلِن کِپلِشیَر
1عیسی یحیی گُرَه کَن شَگیرت اِدینیپ و تَعمید بِریَندیگی باراداقی خابار فَریسی‌لِرینگ قولاغلارینا یِتِندیگینی بیلدی. 2آصلیندا اُلاری عیسی دَل-ده، شَگیرتلِری تَعمید بِریَردی. 3شُنونگ اوچین عیسی یهودیه‌نی تِرک اِدیپ، یِنه-ده جلیلَه قایتدی. 4اُل سامِره‌نینگ اوستو بیلِن گیتمِلیدی. 5شِیلِلیکده، عیسی سامِره‌نینگ سوخار دییِن شَهرینه گِلدی. بو شَهر یعقوبینگ اُز اُغلی یوسفه بِرِن یِرینه قُلایدی. 6یعقوبینگ قویوسی-دا شُل یِردِدی. یُل یُریپ یادان عیسی قویینینگ باشیندا اُتوردی. واقت گونُرتانا قُلایدی.
7شُل واقت سامِره‌لی بیر آیال قویودان سو آلماغا گِلدی. عیسی اُنگا: «مانگا ایچمَگه سو بِرسِنه» دییدی. 8عیسانینگ شَگیرتلِری بُلسا اییمیت ساتین آلماق اوچین شَهره گیدیپدیلِر. 9سامِره‌لی آیال عیسی گِنگ قالدی، سِبَبی یَهودیلِر سامِره‌لیلِر بیلِن قاتناشمایاردیلار. شُنونگ اوچین اُل عیسی: «سِن یَهودی، مِن بیر سامِره‌لی آیال بُلسام-دا، مِندِن ایچمَگه سو دیلِیَرسینگمی؟» دییدی.
10عیسی اُنگا: «سِن خودایینگ ناغماتینی و اُزونگدِن سو دیلَنینگ کیمدیگینی بیلسِدینگ، اُزونگ اُندان سو دیلَردینگ، اُل-دا سانگا یاشاییش سووونی بِرِردی» دییدی. 11آیال اُنگا: «اِی آقا، سِنده سو چِکِر یالی هیچ زادینگام یُق، قویی بُلسا چونگّور، یاشاییش سووونی نیرِدِن آلجاق؟ 12بو قویینی بیزه آتامیز یعقوب بِردی. اُنونگ اُزی-ده، اُغلانلاری-دا، مال-قارالاری-دا بو قویودان سو ایچِن. اُندا، سِن شُل آتامیز یعقوبدان هِم بِییکمی؟» دییدی. 13عیسی اُنگا: «بو سودان ایچِن یِنه سوسار. 14اِمّا مِنینگ بِرجِک سووومدان ایچِن آصلا سوساماز. تِرسینه، مِنینگ بِرجِک سوووم اُنونگ ایچینده اِبِدیلیک یاشاییش بِریَن چِشمَه اُورولِر» دییدی. 15آیال: «اِی آقا، مانگا شُل سودان بِرسِنه، قایدیپ سوسامایین، سو چِکمَگه بو یِره گِلمَیین» دییدی. 16عیسی: «بار، گیت-ده، اَرینگی چاغیریپ گِل» دییدی. 17آیال: «مِنینگ اَریم یُق» دییدی. عیسی اُنگا: «اَریم یُق دییّپ، دُغروسینی آیتدینگ. 18سِنینگ اُزال بَش اَرینگ باردی، حَضیرکی بیله یاشاپ یُرِنینگ هِم اُز اَرینگ دَل، مونی دُغری آیتدینگ» دییدی. 19آیال: «اِی آقا، گُریَرین سِن نِبیسینگ. 20بیزینگ آتا-بابالاریمیز شو داغدا عیبادات اِدیپدیرلِر، اِمّا سیز یَهودیلِر عیبادات اِدیلمِلی یِر اورشلیمدِدیر دییَّرسینگیز» دییدی. 21عیسی اُنگا شِیله دییدی: «اِی آیال، مانگا اینان، شِیله بیر واقت گِلِر، شُندا آسمانداقی آتانی نه شو داغدا، نه-ده اورشلیمده عیبادات اِدِرسینگیز. 22سیز سامِره‌لیلِر کیمه عیبادات اِدیَنینگیزی تانیمییارسینگیز، بیز کیمه عیبادات اِدیَنیمیزی تانییاریس، سِبَبی نِجات یَهودیلِردِن گِلیَندیر. 23اِمّا شِیله بیر واقت گِلِر، حاقیقی عیبادات اِدیَنلِر آتا روحدا و حاقیقاتدا عیبادات اِدِرلِر. اُل واقت اِییَم گِلدی! آتا اُزونه شِیله عیبادات اِدیَنلِری آغتاریار. 24خودای روحدیر، اُنگا عیبادات اِدیَنلِر روحدا و حاقیقاتدا عیبادات اِتمِلیدیرلِر.» 25آیال اُنگا: «مِن مسیحینگ گِلجِگینی بیلیَرین، اُل گِلِنده بیزه هِمّه زادی دوشوندیرِر» دییدی. (مسیح یَعنی خودایینگ سایلاپ-سِچِنی). 26عیسی اُنگا: «سِنینگ بیلِن کِپلِشیپ دوران مِن شُل مسیح» دییدی.
27اِدیل شُل واقت عیسانینگ شَگیرتلِری گِلدیلِر و اُنونگ بیر آیال بیلِن کِپلِشیپ دورانینا حایران قالدیلار. اِمّا هیچ کیم: «اِدیَنینگ نَمه؟» یا-دا «بو آیال بیلِن نَمه اوچین کِپلِشیَرسینگ؟» دییّپ سُرامادی. 28اُنسُنگ یانگقی آیال کویزه‌سینی قُیدی-دا، شَهره باریپ، خالقا: 29«یُرینگ، مِنینگ هِمّه اِدِن ایشلِریمی آیدیپ بِرِن آدامی گُرونگ. اُل مسیح بُلایماسین؟» دییدی. 30اُلار شَهردِن چیقیپ، عیسانینگ یانینا باردیلار.
31شو آرالیقدا شَگیرتلِری عیسی: «اُستاد، بیر زاد ایی!» دییّپ، هُدورلِدیلِر. 32عیسی بُلسا اُلارا: «مِنینگ اییمَگه زادیم بار، یُنه سیز اُنی بیلمِیَرسینگیز» دییدی. 33اُنسُنگ شَگیرتلِری: «کیمدیر بیری اُنگا اییمَگه زات گِتیریپ بِرِن دَلدیر-اَ؟» دییّشدیلِر. 34عیسی اُلارا: «مِنینگ اییمیتیم اُزومی ایبِرِنینگ ایسلِگینی بِرجای اِتمِکدیر، اُنونگ ایشینی یِرینه یِتیرمِکدیر. 35سیز اُراغا یِنه دُرت آی بار دییمِیَرسینگیزمی؟ اِمّا مِن سیزه دییَّرین، باشینگیزی قالدیرینگ-دا، اِکینچیلیکلِرینه سِراِدینگ، اُلار اِییَم اُراغا تاییار. 36اُراقچی هِم حاقینی آلیار، هِم-ده اِبِدی یاشاییش اوچین حاصیل ییغنایار. شِیدیپ، اِکیَن-ده، اُریان-دا بیلِلیکده شاتلانیار. 37”بیری اِکِر، باشغا بیری اُرار“ دییّلیَن سُز بو باباتدا دُغرودیر. 38مِن سیزی زَحمِت چِکمِدیک حاصیلینی اُرماغا ایبِردیم. باشغالار بو حاصیلینگ اوغروندا زَحمِت چِکدیلِر، سیز بُلسا اُلارینگ زَحمِتینینگ نِتیجه‌سینی گُریَرسینگیز» دییدی.
39«مِنینگ هِمّه اِدِن ایشلِریمی آیدیپ بِردی» دییّپ، شاهاتلیق اِدِن آیالینگ سُزی بیلِن بو شَهردَکی سامِره‌لیلِرینگ کَنسی عیسی ایمان گِتیردیلِر. 40شُنونگ اوچین-ده سامِره‌لیلِر عیسانینگ یانینا گِلیپ، اُز یانلاریندا قالماغینی اُندان خاییش اِتدیلِر. اُل هِم شُل یِرده ایکی گون قالدی. 41اُنونگ سُزلِرینی دینگلَپ، یِنه-ده کَن آداملار اُنگا ایمان گِتیردیلِر. 42اُلار آیالا: «ایندی بیز سِنینگ آیدانلارینگا گُرَه ایمان گِتیرمِیَریس، مونی اُزومیز اِشیتدیک، اُنونگ دونیَه‌نینگ چین نِجات بِریَنچیدیگینی بیلیَریس» دییدیلِر.
عیسی کاخ ایشیندَکینینگ اُغلونی شِفا بِریَر
43ایکی گون گِچِندِن سُنگ، عیسی اُل یِردِن جلیلَه گیتدی. 44نِبینینگ اُز یوردوندا قادیرینینگ یُقدوغینی عیسانینگ اُزی تاصدیقلاپدی. 45مونگا باقمازدان، عیسی جلیلَه گِلِنده، جلیل‌لیلِر اُنی قیزقین قارشیلادیلار، سِبَبی اُلار پِسَح بایرامی اوچین اورشلیمه بارانلاریندا، اُل یِرده عیسانینگ اِدِن هِمّه ایشلِرینی گُروپدیلِر.
46شِیلِلیکده، عیسی یِنه-ده اُزونینگ سووی شِرابا اُورِن یِری بُلان جلیل‌ینگ قانا شَهرینه قایدیپ گِلدی. شُل واقت کَفَرناحوم‌دا بیر کاخ ایشیندَکینینگ اُغلی مِریضلَپ یاتیردی. 47بو آدام عیسانینگ یهودیه‌دِن جلیلَه گِلِنینی اِشیدیپ، اُنونگ یانینا باردی. اُل گِلیپ، اُلوم یاسّیغیندا یاتان اُغلونی شِفا بِرمِگینی ایسلَپ، عیسی یالباردی. 48عیسی اُنگا: «سیز عالاماتلار، مُعجِزه‌لِر گُرمِسِنگیز، آصلا ایمان گِتیرمِرسینگیز» دییدی. 49کاخ ایشیندَکی اُنگا: «اِی آقا، اُغلوم اُلمَنکَه بارای-دا!» دییدی. 50عیسی اُنگا: «گیدیبِر، اُغلونگ یاشار» دییدی.
اُل هِم عیسانینگ آیدان سُزونه اینانیپ، اُیونه قایتدی. 51اُل هِنیز یُلداقا، خیدماتکَرلِری اُنونگ اُووندِن چیقیپ: «اُغلونگ شِفا تاپدی» دییدیلِر. 52اُل آدام خیدماتکَرلِریندِن اُغلونینگ قاوی بُلوپ باشلان ساغادینی سُرادی. اُلار اُنگا: «دوین گوندیز ساغات بیرده قیزقینی قایتدی» دییدیلِر. 53اُنسُنگ مونونگ عیسانینگ «اُغلونگ یاشار» دییِن ساغادیندا بُلاندیغینا آتاسی گُز یِتیردی. شُندا اُل اُی-ایچِرسی بیلِن بیرلیکده اُنگا ایمان گِتیردیلِر.
54بو عیسانینگ یهودیه‌دِن جلیلَه گِلِندِن سُنگ گُرکِزِن ایکینجی عالاماتیدی.
Currently Selected:
یوحنا 4: TUKIR
Highlight
Share
Copy
Want to have your highlights saved across all your devices? Sign up or sign in
© Turkmen Truth