१ कोरिन्थी 14
14
अगमवाणी मेस्ये सूजो-केजे बरयू
1नमयूदे प्रेम चेने तीर्सन चीन्नू, मेस्ये आत्माजे बर प्रेने बेस्से बोङ् ची। हम्ब यली थेप् अगमवाणी क्यमब बर प्रेने बोङ् ची। 2चेनेयलो सूजो-केने क्यमबदे मीयूप्रे क्यम दी, तर परमेश्वरप्रे क्यम्क्य। ङूदे च येनख्यङ् सूदेये क्व-अङ्खू, पवित्र आत्माजे बोङ्दे नङ्सू पोयू क्यम्क्य। 3तर अगमवाणी क्यमब मी क्वादेने मीयूप्रेने क्यम्क्य। ङूदे हम्ब मीयूजे विश्वासने बोल्यो चेने, आँट पीनने मेस्ये सान्त्वना पीनने क्यम्क्य। 4सूजो-के क्यमबदे रङ्सेजे विश्वासनेत्या बोल्यो चीक्क्य। तर अगमवाणीदे मण्डलीजे विश्वासने बोल्यो चीक्क्य। 5नमयू क्वादेने सूजो-के क्यम्स्य मन ख्यङ्, तर नमयूदे हम्ब यली थेप् अगमवाणी क्यम्स्य यदेबे ङ मन्न ख्यङ्। मण्डलीजे विश्वासने बोल्यो चेने क्यमब सूजो-केजे अर्थ कोइदे स्योम्मे अङ्खूलो सूजो-केने क्यम यली अगमवाणी क्यमब थेप् ज्य ख्यङ्।
6अत-अची च्योन्यू, कादेये ङ नमयू ट्याने रदेबे सूजो-के क्यम्दे, तर नमयू ट्याने परमेश्वरतेलेजे पो, ज्ञानजे पो, परमेश्वरदे पीनब पो, या लोम-तनब पो अन्रेल्लो नमयूजे लागि ङ केरे फाइदा क्यूक्क्य स्व? 7मूरली मेस्ये बीणाप्र स त्वब बाजा तप्प चेलाबे के अन्तदेयलो अम्बब मूरलीजे मेस्ये अम्बब बीणाजे के यदेबे केरे स्येय? 8कादेये धूङ्कूर्जे के चेलाबे अन्तदेयलो लडाइँ चेने सू तयार क्यूर। 9नमयूप्रेये येर पो क्यूर ख्यङ्। कादेये क्वने अङ्ख्वब पो नमयू रङ्सेजे ङूर्दे क्यम्क्ययलो नमयूदे च येनख्यङ् यदेबे सूदे क्वख्व? नमयू मोङ्-मोङ्ने क्यमब क्यूक्क्य। 10तम्दम्ने संसारने कूम थर्जे केयू ख्यङ्। हम्ब केयू कम्बजेये अर्थ त्व दी। 11कादेये कोइदे क्यमब के ङैदे क्व-अङ्ख्व क्यूत्देयलो हम्ब के क्यमब मीजे लागि ङ फी देशजे मी क्यूक्क्य, मेस्ये हम्ब के क्यम्ब मीये ङैजे लागि फीदेशजे मी क्यूक्क्य। 12येर्बेने नमयूये पवित्र आत्माजे बरयू प्रेने सोरो सेम् चेब क्यूत्देबे मण्डलीजे विश्वासने सोरो ज्य बोल्यो चे खूस्य यदेबे छेम्प्रे ची।
13येरेक्यूत्देबे सूजो-केने क्यमबदे हम्ब केजे अर्थ स्योम्मे ख्वब शक्ति प्रेने प्रार्थना चीस्स्य। 14चेनेयलो कादेये ङैदे सूजो-केने प्रार्थना चीत्देयलो ङैजे आत्मादे प्रार्थना चीक्क्य, तर ङैजे दिमागदे काम चीस्से त्वो। 15जेम्से ङैदे च चे स्व? ङैजे आत्मादे प्रार्थना चीक्क्य, मेस्ये दिमागये प्रार्थना चीक्क्य। आत्मादे प्रू पूक्क्य, मेस्ये ङैजे दिमनग्देये प्रू पूक्क्य। 16कादेये नमयूदे आत्माने परमेश्वरजे सार्या चीप्प नमयूप्रे ख्यबयूदे क्व-अङ्खूदेलो नदे धन्यवादजे प्रार्थना चेजेन ङ्येदे केरे “आमेन” य? चेनेयलो नदे च क्यम्न ख्य हम्ब मीयूदे अङ्को। 17नदेब चेलाबे धन्यवादजे प्रार्थना चीस्स्ये, तर हम्ब प्रार्थनादे सूजो मीजे विश्वासने बोल्यो अन्ची।
18ङ परमेश्वरने धन्यवाद पीन्क्य, चेनेयलो नमयू क्वादेने यली थेप् सूजो के ङैदे क्यम्क्य। 19येरेक्यूल्ली मण्डलीने सूजो-केने हजार च्यू पोयू क्यम यलीने सूजो मीयूने पो लोम-तन चीदे यदेबे ङ रङ्सेजे दिमागदे बूरू पो ङला क्यम्दीङ् रीय।
20अत-अची च्योन्यू, पीचजेप्र सेम् अन्टेल्लाची। अन्ज्य काम अन्स्येब पीचप्र क्यूर्, तर पाको मीजेप्र विचार ची। 21#यशैया 28:11,12मोशाजे नियमने येरे लिख्दीये ख्यङ्,
“सूजो-के क्यमब मीयू मेस्ये फीदेशजे मीयूजे ङूर्दे ङ अम्ब मीयूप्रे क्यम्क्य, होरेक्यूल्लीने थमयूदे ङैजे पो ङ्यीन्स्ये त्वो, यदेबे परमप्रभुदे य ख्यङ्।”
22येरेक्यूत्देबे सूजो-केयू विश्वास चेबयूजे लागि दी, तर विश्वास अन्चेबयूजे लागि च्यूनू ख्यङ्। अगमवाणीब विश्वास अन्चेबयूजे लागि दी, तर विश्वास चेबयूजे लागि ख्यङ्। 23कादेये मण्डलीजे मीयू क्वाने फूङ् क्यूप्प क्वादेने सूजो-केने क्यम्देयलो, होर्दे विश्वास अन्चेब मेस्ये सूजो-के अङ्क्वब मीयू होने रदेयलो, च थमयूदे नमयूने पर मीयू अन्-य या? 24तर कादेये मी क्वादेने अगमवाणी क्यम्नूब कोइ विश्वास अन्चेब या फीजे मी होने क्योरदेयलो हम्ब क्वादेने क्यम्नब पोदे रङ्सेदे चीक्कब पापयू तम्मीय, मेस्ये क्वाजे पोदे ङूजे जाँच चीक्क्य। 25होर्दे ङूजे सेम्जे नङ्सू पोयू फीने तम्मीय, मेस्ये “तम्दम्ने परमेश्वर नमयूजे अन्द्रने ख्य टूङ्” यदेबे पून्छ्यल् क्यूत्देबे ङूदे परमेश्वरने पूस्तीय।
ज्य छीप्-छीप् मील्लीदेबे परमेश्वरने पूस्तेब
26अत च्योनयु, ङैदे यमेब अम्बने ख्यङ्। नमयू नेत्याने फूङ् क्यूप्प, कोइप्रे प्रू, कोइप्रे लोम-तनब पो, कोइप्रे परमेश्वरजे पो, कोइप्रे सूजो-के या सूजो-केजे अर्थ स्योम्मेब बरयू क्यूक्क्य। अम्ब पो क्वाने मण्डलीजे विश्वास बोल्यो चेजे लागिने चीस्स्य। 27कोइदे सूजो-केने क्यम्देयलो ङ्हीलादे या थेप् क्यूल्लो मी सोम्लादेत्या पलो-पलो चीत्देबे क्यम्स्य, मेस्ये हम्ब क्यमब पोजे अर्थ मी त्यादे स्योमीस्य। 28तर कादेये अर्थ स्योम्मे ख्वब मी होने सूये त्वोदेयलो हम्ब सूजो-के क्यमब मी मण्डलीने अन्क्यम्लाबे टूङ्स्य, मेस्ये ङू रङ्सेप्रे होर्दे परमेश्वरप्रे क्यम्स्य। 29अगमवाणी क्यमबब ङ्हीला या सोम्लादेत्या क्यम्स्य, मेस्ये थमयूदे क्यमब पो ठीक ख्य यी त्वो यदेबे सूजो मीयूदे चेलाबे जाँचतीस्य। 30कादेये होयाने टूनब कोइ मीत्याने परमेश्वरदे चत्या पो क्यम्से पीन्देयलो तरखूम् क्यम्नब मी अन्क्यम्ला चीस्स्य। 31नमयू क्वादेने पलो पलो अगमवाणी क्यम खूइय, मेस्ये क्वादेने येर्बे लोम खूइय, होर्दे क्वादेने आँट प्रेखूइय। 32अगमवाक्तायूजे आत्मा अगमवाक्तायूजेने लाने क्यूक्क्य। 33चेनेयलो परमेश्वर गज्याङ्-गूज्यूङ् चेब परमेश्वर दी, तर शान्ति पीनब परमेश्वर ख्यङ्।
परमेश्वरजे पवित्र मीयूजे मण्डलीयूजे छ्यप् अनुसार, 34मदीयू मण्डलीने पारा अम्पूल्लाबे टूङ्स्य। थमयूने क्यमब हक त्वो, तर मोशाजे नियमदे यप्र थमयू नियम नङ्ने टूङ्स्य। 35कादेये थमयूदे चत्या पो लोत्तीङ् रलो कीम्ने रङ्से रङ्सेजे पतीने लोत्स्य। चेनेयलो मदीयूदे मण्डलीजे सङ्गतिने क्यम्लो त्वात्या पो क्यूक्क्य।
36परमेश्वरजे वचन नमयू ट्यादे सुरु क्यूर औ? या परमेश्वरजे वचन नमयूनेत्या पीन औ? 37कोइदे रङ्सेने अगमवक्ता या विश्वासने बोल्यो ख्यब मी मन्क्ययलो, ङैदे लिख्दीनब पो प्रभुजे आज्ञा ख्यङ् यदेबे मन्दीस्य। 38तर कोइदे अम्ब पो अन्-ङ्यीन्देयलो, ङूजे पोये अन्-ङ्यीन्लाची।
39येरेक्यूत्देबे अत अची च्योनयू, अगमवाणी क्यमबने सोरो कूम सेम् पीन्, मेस्ये सूजो-के क्यमबयूने क्यम्से पीन्। 40तर काम क्वाने चेलाबे मेस्ये ज्य छीप्-छीप् मील्लेब क्यूर पर्दीय।
Currently Selected:
१ कोरिन्थी 14: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
