لِمْلٜ 12

کِيتَ مِرِيَمْ

1مِرِيَمْ عٜ هَـٰرُونَ مبٛلْوِ دٛوْ مُوسَى نغَمْ عٛتٜعُنٛ دٜبّٛ عٜتِيٛݠِيَاجٛ؞ 2ࢡٜمبِعِ‏: «کَدِ جَوْمِرَاوٛ طٛنْ وٛلْوِرَ کَمْ بٜى مُوسَى تَنْ نَ؟ نَا عٛوٛلْوِرَنْ بٜى عَمِنْ، مِنِنْ بٛو نَ؟» جَوْمِرَاوٛ نَنِ طُمْ؞ 3مُوسَى عٛ جَنغْکِنِيطٛ مَسِنْ، وَلَا جَنغْکِنِيطٛ بَنَ مَاکٛ حَا دُنِيَارُ ڢُو؞

4لَوْ جَوْمِرَاوٛ وِعِ مُوسَى عٜ هَـٰرُونَ عٜ مِرِيَمْ‏: «نغُرْتٜ، نجٜحٜ حَا لَيْمَارُ ڢٛتِّرْدٜ، عٛنٛنْ تَتٛ ڢُو‏!» ࢡٜ تَتٛ ڢُو ࢡٜنغُرْتِ، ࢡٜنجٜحِ؞ 5جَوْمِرَاوٛ جِݠِّ ندٜرْ رُولْدٜ نَنْدُندٜ بٜى دَنغْرَنغَلْ، دَرِ حَا نَسْتِرْدٜ لَيْمَارُ، عٜوْنِ هَـٰرُونَ عٜ مِرِيَمْ؞ ࢡٜ طِطٛ ڢُو ࢡٜࢡَدِتِ؞ 6جَوْمِرَاوٛ وِعِ‏: «نَنٜ کٛ مِوِعَتَ‏! تٛ وٛودِ اَلنَّبِيجٛ عَمْ شَکَ مٛوطٛنْ، ندٜنْ کَمْ مِوَنغِرَنَنْ مٛ بٜى وَحَيُوجِ، مِوٛلْوِرَنَنْ مٛ بٜى کٛيْطِ؞ 7عَمَّا بٜى جَغِّيطٛ عَمْ مُوسَى طُمْ لَاتَتَاکٛ نٛنْ؞ عٛطٛنْ سُکْلَنِ يِمْࢡٜ عُمَّاتٛورٜ عَمْ ڢُو بٜى حٛولَارٜ؞ 8مِطٛنْ يٜىٰوْتِدَ بٜى مَاکٛ حُنْدُکٛ بٜى حُنْدُکٛ، ندٜرْ بَنغُطُمْ نَا ندٜرْ شُوطِيطُمْ؞ عٛيِعِ کٛو جَاتِ عَمْ بٛو؞ کٛنِ عٛنْ کُلَايْ وٛلْوُغٛ دٛوْ جَغِّيطٛ عَمْ مُوسَى؟»

9جَوْمِرَاوٛ تِکَّنِ ࢡٜ، ندٜنْ عٛدِلِّ؞ 10ندٜ رُولْدٜ سٛتِّ دِغَ لَيْمَارُ ڢٛتِّرْدٜ، سَطَوْرٜ ڢِيلْتِ ࢡَنْدُ مِرِيَمْ، عٛڢُرْطِ تَلْ بَنَ مَلِّمَلّٛورٜ؞ ندٜ هَـٰرُونَ وَيْلِتِ غَلْ مَاکٛ، عٛيِعِ سَطَوْرٜ ڢِيلْتِ ࢡَنْدُ مَاکٛ؞ 11ندٜنْ هَـٰرُونَ وِعِ مُوسَى‏: «عُسٜنِ، جَاغٛرْطٛ عَمْ، تَا يٛوَنْ مِنْ کِيتَ عَيْبٜ عَمِنْ نغَمْ مِنْ مبَطِ عَيْبٜ مَنْ بٜى ڢَاتَارٜ‏! 12عُسٜنِ، تَا عٛلَاتٛ بَنَ ࢡِنغٜلْ نغٜلْ وَرْدَايْ بٜى يٛنغْکِ، نغٜلْ رٜىٰتَ ࢡَنْدُ مُمْ ࢩٛلِ‏!» 13ندٜنْ مُوسَى تٛرِ جَوْمِرَاوٛ‏: «يَا اَللَّه، يَمْطِتِنْ مٛ‏!» 14جَوْمِرَاوٛ جَابِ‏: «تٛ بَابَ مَاکٛ تُوتِنٛ مٛ تُوطٜ حَا يٜىٰسٛ، عٛجٛوطَتَاکٛ بٜى سٜمْتٜىٰندٜ مَنْ ࢩَلْطٜ جٛوٜىٰطِطِ نَ؟ ڢَکَتْ عٛ غُرْتِنْتٜىٰطٛ دِغَ سَنغٜىٰرٜ ࢩَلْطٜ جٛوٜىٰطِطِ؞ ࢡَاوٛطٛنْ عٛلٛرٛ شَکَ مٛوطٛنْ؞» 15ࢡٜنغُرْتِنِ مِرِيَمْ دِغَ سَنغٜىٰرٜ ࢩَلْطٜ جٛوٜىٰطِطِ؞ إِسْرَاءِيلَعٜنْ ندِمْبَاکِ حَا عٛوَرْتِ؞ 16ندٜنْ ࢡٜعُمِّ حَشٜرٛتْ، ࢡٜشَنغِنِ ندٜرْ لَدّٜ ݠَرَنْ؞

Currently Selected:

لِمْلٜ 12: داَ

Highlight

Copy