Leviticus 24
24
1As loayr y Chiarn rish Moses, gra, 2Oardee da cloan Israel, dy der ad lhieu hood’s yn ooil-olive share as s’glenney, son soilshey, dy vod ny lampyn lossey dy kinjagh. 3Cheu-mooie jeh curtan yn eanish, ayns y chabbane-agglish, nee Aaron y hoiaghey magh ad, veih’n astyr gys y voghrey, fenish y Chiarn dy kinjagh. Bee shen slattys beayn ayns nyn sheelogheyn. 4Nee eshyn soiaghey ny lampyn er y chainlere glen airhey, fenish y Chiarn dy kinjagh.
5As nee uss goaill flooyr meein, as jeih bwilleenyn jeh shen y aarlaghey: hoght kaartyn vees ayns un willeen. 6As nee uss soiaghey ad magh ayns daa choorse, shey ayns coorse, er y voayrd glen airhey fenish y Chiarn. 7As ver uss frankincense ghlen er dagh coorse, dy vod eh ve er yn arran son imraa, eer oural jeant lesh aile gys y Chiarn. 8Dagh doonaght nee eh shen y hoiaghey magh roish y Chiarn dy kinjagh, ec cost cloan Israel, liorish conaant kinjagh. 9As bee shen lesh Aaron as e vec; as nee adsyn gee shen ’syn ynnyd casherick: son te er ny chasherickey dasyn, jeh ourallyn y Chiarn, jeant lesh aile, liorish slattys kinjagh.
10As hie mac ben va ny Israelite, va e ayr ny Egyptian, magh mastey cloan Israel: as va streeu eddyr yn mac shoh jeh ben yn Israelite, as dooinney jeh Israel ayns y champ. 11As ren mac y ven jeh Israel loayrt goan mollaghtagh noi ennym y Chiarn, as gweeaghyn: as hug ad lhieu eh fenish Voses (as va ennym e voir Shelomith, inneen Dibri, jeh tribe Dan): 12As hug ad eh ayns pryssoon, dy voddagh aigney yn Chiarn v’er ny hoilshaghey daue. 13As loayr y Chiarn rish Moses, gra, 14Cur lhiat magh eshyn ren gwee mollaght cheu-mooie jeh’n champ: as lhig dauesyn ooilley, ren clashtyn eh, cur nyn laueyn er e chione, as lhig da ooilley’n cheshaght eshyn y chlaghey. 15As nee uss loayrt rish cloan Israel, gra, Fer erbee dy vel gweeaghyn da e Yee, nee eh gymmyrkey e pheccah. 16As eshyn ta loayrt goan mollaghtagh noi ennym y Chiarn, bee eh dy shickyr er ny choyrt gy-baase; nee ooilley’n pobble dy shickyr eshyn y chlaghey; bee chammah yn joarree, as eshyn ta ruggit ’sy cheer, tra t’eh goltooaney ennym y Chiarn, er ny choyrt gy-baase.
17As bee eshyn ta goaill ersooyl bioys dooinney erbee, dy shickyr er ny choyrt gy-baase. 18As nee eshyn, ta marroo baagh, shen y yannoo mie; baagh son baagh. 19As my ver dooinney lheamys er e naboo; myr t’eh er n’yannoo, shen myr vees eh jeant rish hene: 20Brishey son brishey, sooill son sooill, feeackle son feeackle: myr t’eh er choyrt lheamys er dooinney, myr shen vees eh cooilleenit er hene. 21As eshyn ta marroo baagh, ver eh baagh er y hon: as eshyn ta marroo dooinney, bee eh er ny choyrt gy-baase. 22Yn un leigh vees eu, chammah son y joarree, as son fer jeh’n cheer eu hene: son mish y Chiarn y Jee eu.
23As loayr Moses rish cloan Israel, ad dy choyrt lhieu magh eshyn, va er ghwee mollaght, magh ass y champ, as eh y chlaghey: as ren cloan Israel myr va’n Chiarn er harey da Moses.
Currently Selected:
Leviticus 24: BIB1819
Highlight
Share
Copy
Want to have your highlights saved across all your devices? Sign up or sign in
First published in 1775, revised and published by the British and Foreign Bible Society in 1819.
