2 MUSA Bindu 22
Bindu 22
Angka patik taringot tu tangkotangko dohot uhum na roa na asing 1-15.
Patik umpinsang ruhut harorangon, paranak ni hepeng na matorbangku dohot haramunon 16-31.
I. 1Molo ditangko manang ise sada jonggi manang birubiru, laos dipotong manang digadis, ingkon uhum pangalimai ma gararonna ia jonggi, uhum pangopati gararonna ia birubiru. #Luk 19:8 2Molo dapot tartangkup panangko i laho mangarut nian, gabe hona balbal ibana pola mate, ndang siabulon mudarna. 3Alai molo naung sanga hatorangan ari panangko i, abulon ma mudarna. Ingkon gararon ni panangko i luhutna; molo so adong di ibana gadison ma ibana ala tinangkona i. 4Molo dapot di tanganna na tinangko i laos mangolu, silompit ma gararonna sian lombu ro di halode dohot birubiru. 5Molo dipagagathon manang ise pinahanna tu hauma manang tu porlak anggur ni na asing, tung dipalua songon i pinahanna tusi, ingkon na dumenggan ni haumana dohot porlak anggurna gararhononna. 6Molo rarat api gabe dapotsa handang, laos dipangan bunbunan manang eme na jongjong dope, ingkon gararon ni na pagalak api i do. 7Molo dipalumehon manang ise tu donganna hepengna manang barangbarangna, gabe diarut sian jabuna, silompit ma gararon ni panangko, molo tung dapot. 8Alai molo so dapot panangko i, boanon ma nampuna bagas i tu jolo ni Debata, atik tung beha laos ibana paganjang tanganna tu ugasan ni donganna. #2Mus 21:6, 22:28 9Taringot tu nasa hata jahajaha, ala jonggi, ala halode, ala birubiru, ala ulos, ala manang aha pe na mago, gabe didok na mandok: Ahu do nampuna on, tu jolo ni angka panguhum boanon hatanasida be, silompit dua ma gararon ni panjoha tu alona ginorahon ni panguhum. 10Molo dipalumehon manang ise tu donganna sada halode manang jonggi, manang birubiru, manang pinahan dia pe, gabe mate ma i, manang mabugang, manang diolat halak, ndang adong na marnidasa. 11Ingkon mangmang tu Jahowa ma uhum di tongatonganasida na dua, atik tung beha tanganna laho tu ugasan ni donganna; ingkon jaloon ni nampunasa do, jala ndang gararon ni alona i. 12Alai molo tung ditangko panangko sian ibana, ingkon gararonna do i tu nampunasa. 13Molo tung digotil binatang, ingkon boanonna do tandana bahen sitindangi, ndang gararonna anggo na ginotil i. #1Mus 31:39 14Molo diinjam sahalak sian donganna manang aha, gabe mabugang manang mate, ndang diida nampunasa, ingkon gararonna do i. 15Alai molo tung diida nampunasa, ndang gararonna; molo tung paneoa ibana disi, seoana i do singkatna.
II. 16Molo didormai manang ise namarbaju na so oroan dope jala diangkupi modom, ingkon pintor lehononna bolina tusi jala buatonna bahen jolmana. #5Mus 22:28-29 17Alai molo manjua situtu amana mangalehon boruna tu ibana, timbangonna ma hepeng marguru tu godang ni boli ni namarbaju. 18Ndang jadi pangoluon boruboru na marhapandean. #3Mus 20:6, 27; 5Mus 18:10; 1Sam 28:9 19Ingkon bunuon do manang ise na pasaorsaor ibana modom tu pinahan. #3Mus 18:23-24 20Ingkon siaphononhon do manang ise na mamele debata sileban, nda holan tu Jahowa ibana mamele. #5Mus 13:12 ud., 17:2 ud. 21Ndang jadi sosahanmu halak dagang manang rupaonmu ibana; ai halak dagang do nang hamu na jolo di tano Misir. #2Mus 23:9; 3Mus 19:33-34; 5Mus 10:18-19, 24:17, 27:19 22Ndang jadi rupaon boruboru na mabalu manang anak lumanglumang. #Jes 1:17 23Molo tung dirupa ho nasida, gabe mangangguhi nasida tu Ahu, sai na tangihononku do angguhangguknasida i. 24Jadi marpiarpiar ma rimashu, jala bunuonku hamu marhitehite podang, gabe mabalu jolmamuna, gabe anak lumanglumang ia angka anakmuna. 25Molo dipasali ho hepeng tu bangsongki, tu na pogos di lambungmi, unang ho songon halak sijalo bunga ni hepeng sian ibana, unang bahen marbunga hepengmu tu ibana. #3Mus 25:36; 5Mus 23:19, 24:10 26Molo sindor dijalo ho ulos ni donganmu, ingkon paulahonmu tu ibana jumolo asa sundut mata ni ari. #5Mus 24:12-13 27Ai ulosna do bulusanna manangkas tu hulingkulingna, tung tudia ma ibana modom? Molo tung mangangguhi ibana tu Ahu, sai tangihononku di ibana, ai parasi ni roha do Ahu. 28Ndang jadi buraanmu Debata, jala ndang jadi pulasanmu induk di bangsom. #2Mus 21:6; Pjm 10:20; Ul 23:5 29Ndang jadi tiopanmu lobilobi ni emem manang anggurmu. Ingkon tu Ahu lehononmu anak buhabajum. #2Mus 13:2, 13; 5Mus 18:4 30Suang songon i bahenonmu taringot tu lombum dohot angka birubirum. Pitu ari lelengna di lambung ni inana; di ari paualuhon i tu Ahu ma i lehononmu. #Hes 44:30 31Ingkon halak na badia ma hamu di Ahu. Dibahen i ndang jadi panganonmuna juhut na ginotil ni binatang di ladang, ingkon tu jolo ni biang do timpalhononhon. #3Mus 7:24, 11:40, 17:15, 22:8; 5Mus 14:21; Hes 44:31
Currently Selected:
2 MUSA Bindu 22: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.