Uttawa 21

Malhehero anaacha waalhoha ipotta

(Itor 15:12-18)

1“Alha phi malheheriyo anohalha inyu waavaha Aisraeli. 2Mwaanthumaka ipotta Muebraniya, avareke ntheko inyu wo iyaakha sita, nansho iyaakha yo saba nookhalha neethi, munhiyeke arweeke wo uhikhalha malhivo ariyoothe. 3Yakhalhaka aathumiye hinaya uthelha, noothama vekha awe. Nansho yakhalhaka awiilhe ni ahanu awe, paahi, athameke ni ahanu awe ayo. 4Yakhalhaka nkunya awe uyo ahonthelhiha nthiyana, nkaayara achishaana ashithiyana ni ashilhopwana, paahi nthiyana uyo ni achishaana awe anowa ukhalha nhakhu wo nkunya awe uyo, ni ipotta uyo noothama vekha awe. 5Nansho yakhalhaka ipotta uyo nowulhumacha vaattuni wiira nonttuna nkunya awe, ahanu awe ni achishaana awe, ni khanttuna uthama ni ukhalha neethi, 6paahi, nkunya uyo anrweeheke inupa yo ulhapelhiya Apwiiya Nlhuku. Yamalhaka, amweemesheke vankhorani ama vanivatoni ni untemulha nnyaru nawe. Paahi yoyo nookhalha ipotta yo mahuku o uhimalha onkhaye.

7“Ntu anthumihaka mwaamwanawe mwanthiyana ukhalha ipotta, yoyo khanovahiya uneethi awe thoko ipotta nlhopwana. 8Yakhalhaka mwanene ntheko uyo anthumme wiira akhalhe mmoka a ahanu awe, aahichivelhiyeke, aavaheke nipesha athumwanawe ipotta uyo wiira amoopolhe. Mwanene ntheko uyo khanooria unthumiha wo attu o makosho makina, ukhalhawaya yapangaka chiicho, anoowonya wa athumwanawe ipotta uyo. 9Yakhalhaka ntu nonthelhiha ipotta wa mwaamwanawe, ampangelheke ipotta uyo thoko chinompangelha awe mwaamwanawe mwanthiyana o unnyara. 10Yakhalhaka mwanene ntheko nonthelha nthiyana ipotta nkina, athepeke waalhoha ahanu awe o upacha ayo wo waavaha yolhia, ikuwo ni chinothananiya munthelhini chonkhaye thoko cheera awe mpacho. 11Nansho yakhalhaka khanooria upanga yayo malhove mararu anothananiya ayo, paahi, nthiyana uyo ahiiyeke arweeke wo uhikhalha malhivo ariyoothe.

Malhehero anaacha mwaha wo ushilhilhi

12“Ntu riyoothe nomwaata ntu ni umwiiva, eeviyeke ni uyo. 13Nansho yakhalhaka khaamwiithenlhe, nansho mwiivilhe wo uhilhakelha, paahi ntu owiiva uyo nowooria uttawelha vakittu vanohalha aka uhimeriani, wiichakiha. 14Nansho ntu anrakalhihaka nkhunanawe wo mweni ni umwiiva, ata anattawelhelhaka umadhubahuni waka, munkumiheke umadhubahuni waka uwo ni umwiiva.

15“Ntu riyoothe naatakacha athumwanawe ama anumwanawe, eeviyeke.

16“Ntu riyoothe nonkusha wo machiri ntu wiira anthumihe ama umpanga ipotta awe, eeviyeke.

17“Ntu riyoothe naaruwana athumwanawe ama anumwanawe, eeviyeke.

18“Attu eelhi yaatakanaka, mmoka nkaamwata nkhunanawe nlhuku ama wo mathatha wo uhimwiiva, nansho nkanrakalhiha ni ummweria nkaarupa vanlhilhini, 19yakhalhaka aatiye uyo noolhama nkooria weeta ni ntonto, yoyo anrakalhinhe uyo nolhevelhelhiya. Nansho, ammwereheke mpaka ulhama, ni unlhiva ifidiya wo mahuku apoterinhe awe vaari awe vanlhilhini.

20“Mwanene ntheko amwaataka ikopo ipotta awe nlhopwana ama nthiyana ni umwiiva vavawo vawo, yoyo ntu uyo atwarushiyeke. 21Nansho ipotta uyo akhalhaka nkumi nihuku nimoka ama meelhi, yoyo ntu uyo khanotwarushiya ukhalhawaya uyo aari awawe.

22“Manyaalhopwana yaatakanachaka ni unrakalhiha nthiyana o irukulhu, mpaka nkaarihariha irukulhu awe iyo wo uhikhalha ittu ikina irakanlhe awe wo uthepa, ntu nrakhalhihe uyo nolhivihiya malhivo thoko chinohalha aya uromolha owannyawe nthiyana uyo. Ni tho, thoko ashulhupalhe chinohalha aya waamulha chiyo. 23Nansho yakhalhaka nthiyana uyo horakalhihiya chinene, paahi malhivo ayo akhalheke thoko chirakalhihiye awe, ukumi wo ukumi, 24niitho wo niitho, niino wo niino, moono wo moono, mweto wo mweto, 25upahiya mooro wo upahiya mooro, nikhwata wo nikhwata, ni waatiya wo waatiya.

26“Ntu amwaataka vaniithoni ipotta awe nlhopwana ama nthiyana ni umpwesha niitho nawe nno, paahi anhiyerereke, ammaheke uneethi wo uhikhalha malhivo wo nlhatu wo niitho nawe nno. 27Ni chiichammo, ntu amwaataka ipotta awe nlhopwana ama nthiyana, nkankhulha niino, paahi anhiyerereke, ammaheke uneethi wo nlhatu no niino nawe nno.

Malhehero anaacha attu o uhuwa mihuwo

28“Ing'ope yanhomaka ntu inyaka ni umwiiva, ing'ope iyo inowiiviya wo waatiya malhuku ni inama aya khinokhuuriya. Mwanene ing'ope uyo khanokhalha ni nlhatu. 29Nansho yakhalhaka ing'ope iyo iholhemalhelha waahoma attu inyaka, ni mwanene uyo ahaamukiya nansho khaattuke, ing'ope iyo yaamwiivaka ntu tho, yaatiyeke malhuku, ni mwanene ing'ope uyo eeviyeke. 30Ata inakhalhaka chiicho, ntu uyo alhivihiyaka nchurukhu wiira oopolhe ukumi awe, alhiveke nchurukhu wonkhaye unohalha awe ulhivihiya. 31Ing'ope yamwiivaka mwaana mwanlhopwana ama mwanthiyana a ntu nkina, nlhatu uyo waamulhiyeke wo iphiro thoko yeyo. 32Yakhalhaka ing'ope inoomwiiva ipotta nlhopwana ama nthiyana, mwanene ing'ope uyo anlhiveke mwanene ipotta uyo nchurukhu, ishekeli makhobilhi makhumi mararu. Ni ing'ope iyo yiiviyeke wo waatiya malhuku.

33“Ntu athipaka nlhikiti ni uhiya wo uhikhunelha, ing'ope ama iphuta yatumbuchiraka mwommo, 34yoyo thipilhe nlhikiti nno anlhiveke mwanene mwannama uyo, ni mwannama khwilhe uyo nookhalha a ntu thipilhe nlhikiti uyo.

35“Ing'ope ya ntu yarakalhihaka ing'ope ya ntu nkina ni wiiva, paahi attu athumiheke yeyo ing'ope ihanlhe ikumi iyo ni ukawana nchurukhu unohalha upattiya uyo. Tho, akawanacheke ing'ope yiiviye iyo. 36Nansho yakhalhaka ing'ope iyo yaholhemalhelha waahoma inyaka ashinama akina, ni mwanene uyo khattunke, paahi yoyo mwanene uyo ing'ope uyo noolhiva. Ni iyo yiiviye iyo inookhalha yawawe.

Currently Selected:

Uttawa 21: MOT

Highlight

Copy