Itorati 7

Attu athanlhiye ni Apwiiya Nlhuku

(Utt 34:11-16)

1“Apwiiya Nlhuku inyu anoupiihani ilhapo inohalha inyu urwaa ni ukhalha, ni anokowoomolhacha attu o makosho makina anokhalhacha wowo ayo. Vanohalha inyu ukelha wowo, anokowoomolhacha umihoolho winyu, makosho saba molhupalhe, ni machiri uupwahani mwaatti. Yaani; Ahiti, Agirgashi, Aamori, Akanaani, Aperizi, Ahivi ni Ayebusi. 2Tho, Apwiiya Nlhuku inyu, amalhihaka waahelha mmathathani mwinyu nkamwaakottolhacha, ni weevakacha yayo attu ayo onkhaye, nhiwe etu mwaalhehana nlhove nirinoothe ni ayo, ni mena nhoonelhe ikiriri. 3Nhaathelhe manyaathiyana aya, mena nhaathelhihe achishaana inyu ashithiyana wa yayo attu ayo, ama nhaathelhihe achishaana inyu ashilhopwana. 4Mwapangaka chiicho, anowaakukureha achishaana inyu ayo, wiira ahaathimiche Apwiiya Nlhuku, ni weettuchiha wiira athimicheke milhuku chikina. Vavawo urushiya wa Apwiiya Nlhuku unoopharelha vachulhu winyu, ni ulhakalhihani wo uhipicha. 5Nansho, mwaphomolhacheke madhubahu aya ni ukakha mapoto aya. Ni mwaphomolhacheke isinyago cho nlhuku aya nthiyana Ashera chiyo, ni upahacha mooro isinyago chaya cho uhemiya chiyo. 6Mwapangeke chiicho ukhalhawaya mwaatti nhothanlhiya ni Apwiiya Nlhuku inyu. Munlhokoni mwa attu onkhaye o velhaponi va, mwaatti vekha inyu phi thanlhiye ukhalha phi attu aya.

7“Apwiiya Nlhuku khayottunneni mwaatti ni uthanlhani wiira mwaari enchi chinene waapwaha attu akina, mwaatti mwaari vakani upwaha makosho makina velhaponi va. 8Nansho ukhalhawaya Apwiiya Nlhuku anouttunani, ni anoovarechesha ulhupelha waalhupenlhe aya wa manyaapwiiya inyu, phi nlhatu etu no uwookholhani wo machiri aya molhupalhe ni ukumihani upottani, mmiononi mwa Nafarao, amwene o Umisri. 9Paahi, nchuwelheke etu wiira, Apwiiya Nlhuku inyu phi Nlhuku, Nlhuku o ukhulhuvelhiya, novarechesha malhehano awe, ni nowooniha urera wawe iyari chinchi cha attu anovarechesha iamuri chawe. 10Nansho nowaatwarusha attu ahinonrumelhelha ayo thoko chinophwanelhiya aya. 11Paahi etu nvarechesheke rata, malhehero ni iamuri chinouvahaakani lhelho chilha.

Ibarakha wa attu anorumelhelha

(Itor 28:1-14)

12“Mweewelhelhaka malhehero alha ni uvarechesha, ni upanga thoko chinothananiya aya, Apwiiya Nlhuku inyu, anoovarelha malhehano aya ni inyu mwaatti, ni anowoonihani urera waya waalhupenlhe aya manyaapwiiya inyu. 13Anouttunani ni uvahani ibarakha, ni inyu nnowunchereria ni ukhalha ni achishaana enchi, anoohelha ibarakha mmamatani mwinyu wiira nruwerie choolhia chinchi, idivai ni makhura. Anouvahani ibarakha yo ukhalha ni ing'ope ni ikhondoro chinchi mwiilhaponi mwaalhehilhe aya manyaapwiiya inyu wiira anouvahani mwaattiva. 14Nnoovahiya ibarakha waapwaha attu onkhaye akina velhaponi va. Munlhokoni mwinyu khanowa aakhalha nlhopwana wala nthiyana o uhiyara, ni ata mihuwo chinyu khachinowa chaahiya uyara. 15Apwiiya Nlhuku anoothamihacha mareta onkhaye ni mena khannowereiya mareta o woopiha thoko yaapattilhe inyu Umisri, nansho mareta ayo anokoovahiya amalhaponi inyu. 16Mwalhakalhiheke nikosho nirinoothe, Apwiiya Nlhuku inyu ninohalha aya uhelha mmathathani mwinyu, ni mena nhikelhe mwoonelha ikiriri. Nhithimiche milhuku chaya, kwaani yoyo nlhatu uyo unouwayihani.

17“Nhiwe mweerelhana mwaashineneru wiira, ‘Yalha attu alha ari enchi unipwaha hii, ninohalha wooria chani woomolhacha mwiilhaponi mu?’ 18Nhikelhe mwoova, mwoopuwelheke Apwiiya Nlhuku inyu chenre aya wo waapangelha Nafarao ni ilhapo aya yo Umisri. 19Mwoopuwelheke mariro onne inyu wo miitho inyu, cho ushangiha ni ithikineha chulhupalhe cho wooria wa Apwiiya Nlhuku inyu, chenre aya wo uwookholhani, phi chiichammo chinohalha aya waapanga attu anoova inyu ayo. 20Wo uthepa vavawo, Apwiiya Nlhuku inyu anooruma matendehu munlhokoni mwaya, aalhumakache attu onkhaye anohalha ukulhuphuwa ni wiivitha, wiira athepe woova. 21Paahi etu nhoove, ukhalhawaya Apwiiya Nlhuku inyu, ari munlhokoni mwinyu. Yayo phi Nlhuku muulhupalhe o woopiha. 22Apwiiya Nlhuku inyu anowoomolhacha makosho ayo wo ulhikaana ni chinohalha inyu urwaa miholhoholho vakanivakani. Mwaashinene khannoria ulhakalhiha makosho onkhaye ayo nkwaha mmoka, ukhalhawaya mwapangaka chiicho, ashinama o mwiithuphini anowunchereria ni uhuvihani. 23Apwiiya Nlhuku inyu, anowaahelha amalhaponi inyu mmathathani mwinyu, ni waapanga ukhalha attu o uthemwathemwa mpaka vanohalha aya waalhakalhiha. 24Anowaahelha mamwene aya mmathathani mwinyu. Nnoowevekacha ni ulhiyalhiya. Khaawo ata ntu mmoka nohalha wooria uchiichihani, mpaka vanohalha inyu waalhakalhihacha onkhaye. 25Mwapahacheke mooro isinyago cho milhuku chaya. Nhikelhe mwamirelha ishenye malhuku aya o isiliva, mena idhahabu chaya, ni mena nhikelhe mwakusha ukhalha chawinyu. Upanga chiicho phi wiiwayiha winyu, ni phi ittu inaarusha chinene Apwiiya Nlhuku inyu. 26Nhiwe mwaakusha ni urweeha umanupani winyu ittu iriyoothe inaarusha Apwiiya Nlhuku. Mweeraka chiicho nnoolhaviya thoko yeyo ittu iyo. Nvengeke ni uheulhacha, ukhalhawaya yeyo phi ittu ilhaviye ni Apwiiya Nlhuku.

Currently Selected:

Itorati 7: MOT

Highlight

Copy

Compare