Itorati 5
5
Iamuri khumi
(Utt 20:1-17)
1Yamalheke, ashinna Musa aheehanacha vamoka attu o Israeli ni weerelha wiira, “Mwaatti attu o Israeli, mwiiwelhelheke ikano ni malhehero kinohalha aka uhimiacha uwannyu lheho alha. Mwiittucheke yayo ni upanga rata thoko chinothananiya aya. 2Apwiiya Nlhuku, Nlhuku ihu ahopanga malhehano ni hii umwaakoni Uhorebu, yaani mwaako wo Usinai. 3Khaapange yayo malhehano ayo ni manyaapwiiya ihu vekha aya, nansho aapange ni hii onkhaye nirii akumi lhelho va. 4Mwaattiva mwaheewa Apwiiya Nlhuku voolhumacha aya ni inyu mwaatti anari variyari mooro, thoko ntu chinomulhumana awe nkhunanawe, wowo umwaakoni uwo. 5Yeyo ikatema iyo mii kaari karumiya variyari, inyu mwaatti ni Apwiiya Nlhuku, nkakootangacherani alhe oolhumanche aya alhe. Nansho ukhalhawaya mwaatti mwahoova mooro ulhe, khamwaawenlhe umwaakoni.
“Apwiiya Nlhuku yenre wiira, 6‘Mii phi Apwiiya Nlhuku inyu kookuminheni Umisri waari inyu ipotta.
7“ ‘Nhithimiche milhuku chikina kaahikhalhe mii.’
8“ ‘Nhikooroshelhe milhuku cho isinyago cho uhemiya, wala ittu yo ulhikaanihera ittu iriyoothe iri uchulhu wiirimu, wala vathi velhaponi va, wala ittu iri mmashini wuuthi ilhapo. 9Nhikhoromelhe wala ukavihera, ukhalhawaya mii Apwiiya Nlhuku inyu ki Nlhuku o ihache. Kinowaatwarusha attu onkhaye uwonya wa manyaapwiiya aya, ata mpaka o iyari yo neraru ama yo necheshe ya attu ahinokittuna ayo. 10Nansho kinowooniha uttuna waka maelufu a attu anokittuna, ni urumelhelha malhehero aka alhe.
11“ ‘Nhiromolhache pufia nchina naka, mii Apwiiya Nlhuku inyu, ukhalhawaya kinontwarusha ntu riyoothe nohalha upanga chiicho.
12“ ‘Nshungeeheke Nihuku no Wiittuwa, mpangeke ukhalha nihuku nitakatifu, thoko mii Apwiiya Nlhuku inyu chinre aka wo ulheherani. 13Mpangeke ntheko mahuku sita, vavawo mpangeke chittu chinyu chonkhaye, 14nansho nihuku no saba phi Nihuku no Wiittuwa neeshiye wo nlhatu waka. Nenno nihuku nno, nhiwe mwaapanga ntheko uriiyothe inyuva mwaanene, wala achishaana inyu ashilhopwana, wala ashithiyana, wala ipotta inyu ilhopwana wala yeethiyana, wala ashinama inyu, wala nlheto rii uwaninyu, wiira ipotta inyu ilhopwana ama ithiyana yiittuwe chiichammo thoko inyuva. 15Nhilhiyalhe wiira ni inyu mwaari ipotta Umisri, ni mii Apwiiya Nlhuku inyu kahoukumihani wowo wo moono aka wo machiri, moono wookolhiye. Phi nlhatu etu mii Apwiiya Nlhuku inyu kihoulheherani ushungerera Nihuku no Wiittuwa.
16“ ‘Mwaathimicheke athumwaninyu ni anumwaninyu, thoko chinokithimicha inyu mii Apwiiya Nlhuku inyu chulhehenreakani mpange. Mpangeke chiicho wiira mpatte mahuku menchi o ulhokelha velhaponi va, ni ushichira thoko chineera aka wo uvaherani.
17“ ‘Nhiive.
18“ ‘Nhilhuve.
19“ ‘Nhiiye.
20“ ‘Nhoothachere amwaatamana inyu.
21“ ‘Nhaamirelhe ishenye ahanu a amwaatamana inyu, wala nhimirelhe ishenye inupa aya, wala imata aya, wala iphuta aya ilhopwana ama ithiyana, wala ing'ope aya, wala ittu iriyoothe irina aya amwaatamana inyu.’
22“Chilha phi iamuri chaahimmie aya Apwiiya Nlhuku inyu uwannyu mwaatti onkhaye, wo nlhove nuulhupalhe neewania ukhuma vamooroni, ni nihute nolhemelha nne, ni ipiphi totoro ilhe. Ohimenrieni vaari inyu nnathukumananche umwaakoni ulhe ni vavawo wala khayoocherenre iamuri ikina. Amalheke aholhepa chechiyo iamuri chaya chiyo vachulhu ivibau piilhi cho malhuku, nkayaakivaha mii.”
Woova wa attu o Israeli
(Utt 20:18-21)
23“Ikatema yeewilhe inyu nenno nlhove nno nikhumaka variyari ipiphi ilhe, vachulhu mwaako waapharelha aya mooro ulhe, manyaahoolhelhi onkhaye o makosho inyu ni ashulhupalhe inyu ahowaacha vaari aka, 24nkayeera, ‘Mwiiwelhelheke! Apwiiya Nlhuku, Nlhuku ihu anoononiha uyulhupalhe aya ni nchakarimia wo nthimicho waya, niheewa nlhove naya nikhumaka variyari mooro ulhe. Lelho nihomwoona Nlhuku olhumachaka ni ntu, nansho ntu noothepa ukhalha nkumi! 25Nansho yeeshiyani wiihelha ntatakoni, ukhwa wo upahiya mooro muulhupalhe ulhe tho? Neewaka nlhove na Apwiiya Nlhuku, Nlhuku ihu tho ninookhwa! 26Chani, ntu ani apantte umwiiwa Nlhuku ri nkumi oolhumachaka ukhuma variyari mooro thoko chinre ihu wo wiiwa hii, nkaathepa ukhalha nkumi? 27Nansho inyuva ashinna Musa nrweeke vakhiviru waya, mweewelhelheke chonkhaye chinohalha aya wuulhumacha Apwiiya Nlhuku, Nlhuku ihu chiyo. Yamalhaka nhokolhieke mmweeke mwaanihimeria yayo malhove onkhaye anohalha aya uuhimeriani ayo. Hii ninoweewelhelha ni urumelhelha thoko chilheeheriye aya.’
28“Apwiiya Nlhuku aheewa malhove inyu ayo nkayaakiirelha, ‘Kiheewa malhove ahimmie aya alha attu aka alha, malhove ahimmie aya onkhaye oreraru. 29Yakaari ikatema yonkhaye ahokhalha ni irusho thoko chii! Yakaari ahokithimicha ni urumelhelha iamuri chaka! Chittu chaya chonkhaye, chaanopangia rata uwannyaya ashinene ayo, ni iyari chaya, wo mahuku o uhimalha. 30Nrweeke mwaahimerieke attu wiira ahokolhiacheke mmaheemani mwaya. 31Nansho inyuva Namusa, mweemelheke mwaanene vakhiviru mii vaa, ni mii kinoohimeriani iamuri, malhehero onkhaye ni ikano chinohalha inyu weettuchihacha, wiira ilhapo kaavahilhe aka iyo ikhalhe yawaya.’
32“Mwaatti attu o Israeli, nkhalhacheke rata wiira mpangacheke thoko Apwiiya Nlhuku chinre aya wo ulhehera. Nhihiye urumelhelha iamuri aya iriyoothe. 33Nrumelhelheke chonkhaye, wiira mitheko chinyu chipangie rata, ni wiira mwalhokelhe chinene wiilhaponi unokelha inyu uvahiya ukhalha wawinyu uwo.”
Currently Selected:
Itorati 5: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
