Itorati 4

Ashinna Musa anowaalhaka attu o Israeli ukhalha o wiitimarikha

1Yamalheke, ashinna Musa ahothepa wuulhumacha eeraka, “Inyu mwaatti, attu o Israeli va, nvarechesheke etu iamuri chinowiittuchihaakani chilha, wiira nkhalhe ni ukumi ni ukhalhelha ilhapo, yaalhenhe aya Apwiiya Nlhuku, Nlhuku a manyaapwiiya inyu, uuvahani mwaatti. 2Nhuncherere ittu iriyoothe nhina chilha iamuri chinouvahaakani chilha, ni mena nhiwukulhe ittu, nansho nvarechesheke iamuri cha Apwiiya Nlhuku inyu, alha chinouvahaakani chilha. 3Mwaatti mwahoonechesha chittu chaapannge awe Nlhuku chinaacha mwaha wa nlhuku Baali Peori. Apwiiya Nlhuku inyu ahaarimeelhiha attu onkhaye munlhokoni mwinyu, anthimicha yoyo nlhuku Baali uyo. 4Nansho mwaatti mwaakhulhuvenlhe Apwiiya Nlhuku inyu, mwa akumi mpaka lhelho nna va.

5“Haya, kihowiittuchihani malhehero ni iamuri chonkhaye thoko Apwiiya Nlhuku aka chinre aya wo ukilhehera wiira kipange, wiira nvarecheshe wiilhaponi unokelhelha inyu ni ukhalha uwo. 6Nvarelheke ni upanga thoko chineera aya wo uhimia yayo malhehero ayo, ukhalhawaya mweeraka chiicho, attu o makosho makina vanohalha aya wiiwa ni uchuwelha yayo malhehero ayo, anoowa aachuwelha wiira mwaatti attu o irusho. Ni ayo anowa yeera, ‘Wo ikekhiaye attu o ilha ilhapo ilha, atu o irusho ni o uchuwelha chittu!’

7“Khaniwo nikosho nirinoothe ata nunnuwaka chani niiri vakhiviru ni nlhuku aya thoko chinre awe Nlhuku wo unaatameria hii, Apwiiya Nlhuku, Nlhuku ihu vanaalhapelha ihu wiira anikavihere. 8Ni wala khaniwo nikosho nikina nirinoothe ata ninonnuwaka chani, niri ni iamuri cho ikekhiaye thoko chuwiittuchinheakani lhelho chi.

9“Nansho inyuva nkhalheke miitho mwiiichinanelhaka chinene nhiwe mwaalhiyalha chittu choonilhe inyu wo miitho inyu mwaashinene chilhe. Ihiwe yaakhumelhelha ata vamoka muukumini mwinyu chechiyo chittu chiyo, nkachaalhiyalhiya mmamirimani mwinyu. Mmweeke mwaahimiachera achishaana inyu ni ashichulhu inyu. 10Muupuwelheke mwaha wo nihuku nne neemenlhe inyu umihoolho wa Apwiiya Nlhuku inyu nne, Uhorebu ulhe vaakiirenlhe aya wiira, ‘Mwaathukumanihacheke attu alha, wiira mwettuchihe ukithimicha mii mahuku onkhaye muukumini mwaya ni weettuchihacha achishaana aya ni ayo eere chiicho.’

11“Paahi mwaahimiachereke achishaana inyu, chenre inyu wo waatameria ni weemelha vathi mwaako waapharelha mooro ulhe, mooro waaphiya mpaka uchulhu umahuteni nkawaakhunelha nihute nulhuphalhe, nkanaakelhiya ipiphi. 12Apwiiya Nlhuku nkayoolhumacha ni inyu mwaatti, oolhumacha ukhuma variyari mooro uyo, ni inyu mwaheewa malhove yoolhumacha aya, nansho khamwonne chiri aya anene ayo, mwaahowiiraka wiiwa tu nlhove naya. 13Ni ayo ahouhimeriani malhehano aya, nkayootangelhani wiira, nvarecheshe ni urumelhelha iamuri khumi chaalhempe aya vachulhu ivibau piilhi cho malhuku chilhe. 14Yeyo ikatema iyo Apwiiya Nlhuku ahokilheehera wiira, kuwiittuchiheni iamuri chonkhaye chinothananiya inyu upanga wiilhaponi unokelha inyu ukhalha uwo.

Waamukiya uhiya mwaha wo ulhapelha isinyago

15“Paahi etu nhiitialhe, nhiwe mwaalhiyalha wiira, Apwiiya Nlhuku voolhumanche aya ni inyu mwaati umwaakoni Uhorebu ulhe, khamwonne chiri aya. Paahi wo yoyo nlhatu uyo etu mwiishungeke chinene, 16nhiwonye ni wiikooroshelha isinyago iriyoothe yo uhemiya yo ulhikaanihiya uriwoothe, ikhalhe ilhopwana ama ithiyana, 17yo mwannama riyoothe velhaponi, ama yo ashinuni o uvava, 18ama yo ulhikaaniha ni mwannama riyoothe o wiipurulha, ama yo ulhikaanihiya ihopa yo mmaashini. 19Mwiishungeke rata wiira, ikatema vanohalha inyu uweha nchuwa, mweeri ni ittotwa ni chittu chonkhaye cho wiirimu, vavawo nhiwe mwaachivelhiya, nkamwaachokholhacha uthimicha ni ukavihera chechiyo chittu chiyo. Apwiiya Nlhuku oopilhe chechiyo chittu chiyo wo nlhatu no attu onkhaye o velhaponi. 20Nansho mwaatti phi inyu attu okhonlhe aya Umisri, uchiparani waathulhusheriya iyuuma. Okumihilheni wowo wiira, mmwe mwaakhalha attu aya thoko chiri inyu lhelho chi. 21Wo nlhatu winyu Apwiiya Nlhuku inyu ahokithunalhelha nkayaalhupelha wiira mii akinolhapuwa mwoolhoko wo Uyorodani ni ukelha ilhapo yorera inouvaha ayani ilhe. 22Mii kinohalha ukhwelha momu mwiilhaponi mu, ni wala akinolhapuwa mwoolhoko, nansho inyu mwaatti nhaatameria ulhapuwa ni ukelha uukhalhani ilhapo nnovahiya inyu ukhalha yawinyu. 23Mwiishungeke chinene, nhiwe mwaalhiyalha malhehano apangilhe aya Apwiiya Nlhuku inyu ni inyu mwaatti, wiira nhikooroshe isinyago yo ulhikaana ni ittu iriyoothe ichiichihiye ni Apwiiya Nlhuku inyu, wiira nhaalhikaanihe. 24Ukhalhawaya Apwiiya Nlhuku inyu, phi mooro unopaha.” Yayo phi Nlhuku o ihache.

25“Vanohalha inyu ukhalha mwommo mwiilhaponi mmo, nkamwaayaracha achishaana ni upata uchuulhu nkamwoolhuvalha, nhikelha mwaachokholha upanga chittu cho unanara, ni ukooroshacha isinyago yo ulhikaanihiya ni ittu iriyoothe, nkamwaawonya mmiithoni mwa Apwiiya Nlhuku inyu, nkamwaathunalhiha. 26Paahi mii lhelho va, kinowiihana irimu ni ilhapo chiwe choonechesha chittu chinopangacha inyu. Kinouhimeriani wiira, nnoowa mwaarimelha wowo wiilhaponi unokelha inyu ukhalha ukhopelhelhe mwoolhoko wo Uyorodani uwo. Khannokelha mwaalhokelha chinene wowo, nansho nnokoolhakalhihiya onkhaye. 27Apwiiya Nlhuku anokoumwarushachani munlhokoni mwa attu o ilhapo chikina, ni wowo nnokorimeelhacha, ni attu vakani tu munlhokoni mwinyu phi nowa aahalha wowo. 28Wowo nnokookavihera milhuku cho miri ni cho malhuku chikooroshiye ni miono cha attu, chihinooria woona ni wala khachineewa, khachinolhia ni wala khachinooria unukha. 29Kaanyuma aya mwommo mwiilhaponi mmo, nnokowaathotha Apwiiya Nlhuku inyu, ni vavawo nnoowa mwaapatta mwaathothaka wo nrima wonkhaye ni wo nnepa wonkhaye. 30Vanohalha inyu uhuva, nkawoopattani yoyo mwaha wonkhaye uyo, vavawo nnoowa mwaarukunuwa ni waahokolhelha Apwiiya Nlhuku ni waarumelhelha. 31Ni ayo, Apwiiya Nlhuku inyu, phi Nlhuku o ikiriri, khanowa oohiyani wo urimeelhihani, ukhalhawaya khanolhiyalha malhehano aalhenanne aya ni manyaapwiiya inyu wo ulhupelhihana.

32“Nkoherereke chinene mwaha waakhumelhenlhe khalhayi, mwaha waapangelhe mwaatti nhinayaria, uchokholha nihuku Nlhuku vaamupilhe awe ntu velhaponi nne. Nkoheke velhaponi vonkhaye, ukhuma mpata mmoka mpaka mpata nkina, yakhalhaka mwaha wo ushangiha thoko yoyo uhopacha ukhumelhelha ama wiiwiya. 33Chani, ahawo attu aapanche wiiwa nlhove na Nlhuku nuulhumachaka variyari mooro, nkayaakhalha akumi wo uhikhwa thoko cheewilhe inyu mwaatti? 34Chani, hawo nlhuku riyoothe nkina panche urwaa uuhokolhoshani nikosho na attu awe ukhuma wa attu o nikosho nikina thoko chinre aya Apwiiya Nlhuku inyu. Nkaapanga chittu cho woopiha chonne inyu mwaashinene Umisri ulhe. Wo waalhakalhiha attu, wo upanga cho uthikineeha ni cho ushangiha, ama wo waatakana ikhoto, ama wo machiri aya molhupalhe, mwaashinene mwoonaka? 35Nansho mwaatti mwahovaheriya woona chechiyo, nchuwelhe wiira, Apwiiya Nlhuku phi o vekha aya, arii Nlhuku ni wala khaawo nkina tho. 36Ahowiiwihani nlhove naya naakhuma wiirimu wiira, owiittuchiheni wiira owaamukeni nkhalhe ni irusho ni nkayowoonihani velhaponi va, mooro aya muulhupalhe ni wiiwa malhove aya aakhuma variyari mooro. 37Ukhalhawaya ahaattunacha manyaapwiiya inyu, ahouthanlhani mwaattiva iyari chaya, nkookumihani anene, ukhuma Umisri wo machiri aya molhupalhe. 38Ahoomolhacha attu o makosho molhupalhe ni o machiri uupwahani mwaattiva, mwoonecheshaka mwaashinene, wiira mmwe mwaavahiya mwaatti ilhapo aya, ikhalhe yawinyu thoko chiri aya mpaka lhelho va! 39Paahi etu, muupuwelheke lhelho ni ushungerera mmamirimani mwinyu wiira, Apwiiya Nlhuku, phi Nlhuku rii uchulhu wiirimu, ni vathi velhaponi va, mena khaawo nkina tho. 40Paahi, vano etu nvarelheke malhehero aya, ni iamuri chaya chinouvahaakani lhelho, wiira nkhalhe rata mwaattiva vamoka ni iyari chinyu, mmwe mwaalhokelha mahuku menchi wiilhaponi unovahiya inyu ni Apwiiya Nlhuku inyu mwakhalhelhe mahuku o uhimalha.”

Iwani cho uttawelhelha unoshelha nchuwa mwoolhoko wo Uyorodani

41Phi vavawo ashinna Musa vaatennge aya iwani ttaaru cho mpata unoshelha nchuwa mwoolhoko wo Uyorodani 42chinohalha awe ntu uttawelha ni wiichookholha, yakhalhaka noomwiiva wo uhilhakelha ntu hiri mmalhaponi awe. Ntu thoko yoyo nowooria uttawelha iwani imoka aya ni wookholha ukumi awe. 43Aatennge iwani yo Ubeseri, wi ichirimo yo uthakoni wo nlhatu wo nikosho ni Narobeni, nkayaatenga iwani yo Uramothi, ilhapo yo Ugileadi wo nlhatu wo nikosho ni Nagadi, ni ahotenga iwani yo Ugolani, ilhapo yo Ubashani wo nlhatu wo nikosho ni Namanase.

Maholhelho o uvahiya Malhehero a Nlhuku

44Alha phi malhehero a ashinna Musa aavanhe aya attu o Uisraeli. 45Alha phi malhove, malhehero ni iamuri, ashinna Musa chaavanhe aya attu o Israeli ikatema vaathama aya Umisri, 46vaari aya ukhopelhelhe mwoolhoko wo Uyorodani unikooteni umihoolho wo Ubeth Peori, ilhapo yaatawariya ni amwene Nasihoni o Uamori, yaakhalha iwani yo Uheshboni. Amwene aakottolhiye ni ashinna Musa vamoka ni attu o Israeli ikatema vaathama aya Umisri. 47Nkayaakusha ilhapo aya, vamoka ni ilhapo ya amwene Naogu o Ubashani. Yayo mamwene eelhi ayo phi attu aatawara unosha nchuwa mwoolhoko wo Uyorodani uwo. 48Yeyo ilhapo iyo yahowanelha ukhuma iwani yo Uaroeri vachereshere mwoolhoko wo Uarnoni, mpaka mwaako wo Usirioni yaani mwaako wo Uhermoni, 49vamoka ni ilhapo yo unoshelha nchuwa mwoolhoko wo Uyorodani mpaka ibahari yo Maakha, umwiinanoni, mpaka unokhuruwelha mwaako wo Upisga.

Currently Selected:

Itorati 4: MOT

Highlight

Copy

Compare