Itorati 3
3
Attu o Israeli anowaakottolha amwene Naogu
(Waal 21-31)
1“Yamalheke, nahorukunuwa ni urwaa mpaka Ubashani. Amwene Naogu nkayaawa ni attu aya onkhaye, uwaatakanani ikhoto ni hii vakhiviru ni iwani yo Uedrei. 2Nansho Apwiiya Nlhuku ahokiirelha wiira, ‘Nhoove, ukhalhawaya kihaahelha mmathathani mwinyu, vamoka ni attu aya ni ilhapo aya. Nnowaapangelha thoko chaapangenlhe inyu Nasihoni amwene o Uamori, aatawanre Uheshboni ulhe.’
3“Paahi, Apwiiya Nlhuku ahaahelha amwene Naogu o Ubashani ni attu aya mmathathani mwihu, nkanaalhakalhiha, wo uhinhalhiha ntu riyoothe. 4Ni yeyo ikatema iyo nahovara mateeka iwani chonkhaye, khanaahilhe iwani iriyoothe. Iwani chonkhaye chaari makhumi sita, yaani nipuro nonkhaye no Uargobu naatawariya ni amwene Naogu o Ubashani. 5Iwani chonkhaye chaari cho urukureriya ni ingome cho urekama, cho milhako ni iparatata chaya. Chahaawo tho, iwani chahaarukurerie ni ingome. 6Wowo nahopahacha mooro kila ittu, nkanaatanganyacha kila iwani ni weevakacha manyaalhopwana, manyaathiyana ni achishaana thoko chenre ihu iwani chikina cha mwene Nasihoni o Uheshboni. 7Nkanaakusha mihuwo chonkhaye ni mihakhu chikina.
8“Yeyo ikatema iyo, nahokusha ilhapo yo mamwene elhi a Aamori, aakhalhacha ukhopelhelhe mwoolhoko wo Uyorodani alhe, variyari ni mwaako wo Uhermoni iyo. 9Attu o Usidoni aneehana yoyo mwaako uyo, mwaako wo Uhermoni, ni attu o Uamori aneehana, mwaako wo Useniri. 10Nahovara iwani chonkhaye cha amwene Naogu o Ubashani, ilhapo yo umakooteni, ni yo umiakoni. Yaani ilhapo yonkhaye yo Ugileadi ni Ubashani, mpaka Usaleke ni Uedrei.”
11(Amwene Naogu vekha aya phi ahanlhe munlhokoni mwa attu o Urefai. Ikori aya yo iyuuma, yaari yo urekama imita ncheshe ni makhuvi imita piilhi, thoko wo maphimelho o mahuku ene. Yeyo ikori iyo ihaawo mpaka nna, Uraaba, iwani ya attu o Uamori.)
Makosho aahanlhe ni ukhalha Unoshelha nchuwa mwoolhoko wo Uyorodani
(Waal 32:1-42)
12“Vaakunshe ihu ilhapo iyo, kahaavaha attu o makosho a Narobeni ni Nagadi, ilhapo yo uchokholha uchulhu wo Uaroeri vakhiviru ni mwoolhoko wo Uarnoni, nusu yo miako cho Ugileadi, vamoka ni iwani chaya. 13Yamalheke, kahaavaha attu o nikosho ni Namanase, nusu yo vakittu vaahalhenlhe yo Ugileadi vamoka ni Ubashani wonkhaye, waatawariya ni Naogu, yaani ilhapo yonkhaye yo Uargobu.”
Ilhapo yonkhaye ya attu o Ubashani yeehaniya ilhapo ya attu o Urefai. 14Ni ntu mmoka eehaniya Yairi, o nikosho ni Namanase ahokottolha ni ukusha ilhapo yonkhaye yo Uargobu, yaani Ubashani mpaka mwiinano wo Ugeshuri ni Umaaka. Nkeehanacha iwani chonkhaye chiyo wo nchina nawe, ni mpaka nna chineehaniya Hawoth Yairi, yaani iwani chi Nayairi.
15“Nkakaavaha attu o nihimo ni Namakiri o nikosho ni Namanase, iwani yo Ugileadi, 16ni attu o makosho a Narobeni ni Nagadi, kahaavaha ilhapo yonkhaye ukhuma Ugileadi mpaka nikoote no mwoolhoko wo Uarnoni. Mwiinano wo uchawa waari variyari mwoolhoko, ni mwiinano wo uchulhu waari mwoolhoko wo Uyaboki, unaatamana ni ilhapo ya attu o Uamoni. 17Mpata wo uneelha nchuwa, mwiinano aya wahowanelha mpaka mwoolhoko wo Uyorodani, toka nttiya no Ugalilaya mpata wo uchulhu, nkawaakhuruwa mpaka ibahari yo Uaraba, yaani ibahari yo Maakha, mpaka unokhuruwelha Upisga, mpata unosha nchuwa.
18“Yeyo ikatema iyo kahaalhehera attu o makosho mararu, wiira, ‘Apwiiya Nlhuku inyu ahouvahani ilhapo yo unosha nchuwa, yo mwoolhoko wo Uyorodani ilha, ikhalhe yawinyu. Mwaatti vano nhokhalha mashujaa munlhokoni mwa ashilhoko inyu, nkusheke etu ikerero chinyu nlhapuweke mwoolhoko wo Uyorodani, mwaaholhelhaka ashilhoko inyu attu o Israeli. 19Nansho manyaahanu inyu, achishaana inyu, ni ashinama inyu, kihochuwelha wiira nhanaa mihuwo chinchi, ahalhacheke mmawani kuvahilhe akani mmo. 20Mwaakavihacheke ashilhoko inyu attu o Israeli mpaka Apwiiya Nlhuku vanohalha aya uvaherani wiira akhalheke vakittu waya, thoko chinre inyu mwaatti ni ukhalha ni vakittu winyu, yaani ni ayo akhalheke ni ilhapo aya, Apwiiya Nlhuku inyu inaavaha aya, ukhopelhelhe mwoolhoko wo Uyorodani uwo. Mwamalhihaka, nnowooria uhokolhia wiilhaponi winyu uno, kuuvanheakani ikhalhe phi ilhapo inyu.’
21“Yamalheke, nkakaalhehera Nayoshua wiira, ‘Inyuva nhoona wo miitho inyu mwaashinene chittu chonkhaye Apwiiya Nlhuku inyu chipannge aya wo mamwene eelhi, Nasihoni ni Naogu. Paahi yayo anowaapangelha thoko chiicho mamwene o ilhapo chinohalha inyu uvirelha. 22Nhoovache ukhalhawaya Apwiiya Nlhuku inyu phi nohalha waatakacha wo nlhatu winyu.’
Ashinna Musa anoochiichihiya ukelha Ukanaani
23“Yeyo ikatema iyo kahaalhepelha Apwiiya Nlhuku kiiraka, 24‘Inyu Pwiiya, Apwiiya Nlhuku, kihochuwelha wiira, nhokooniha mii karumiya inyu uchokholha tu wo uyulhupalhe winyu ni wooria winyu. Ukhalhawaya nlhuku ani wiirimu uwo ama velhaponi va nooria upangacha chittu chulhupalhe, ni cho ushangiha thoko chinopangacha inyu inyuva? 25Kinoulhepelhani wiira kilhapuwe etu mwoolhoko wo Uyorodani, koone ilhapo yorera yo ukhopelhelhe mwoolhoko wo Uyorodani iyo. Eiyo, koone ilhapo yorera ni yo ushichira yo miako, vamoka ni miako cho Ulebanoni iyo.’
26“Nansho wo nlhatu winyu mwaatti, Apwiiya Nlhuku ahokithunalhelha mii, nkayaakhota ukiiwelhelha. Ni kaanyuma aya nkayaakiirelha, ‘Ihothosha. Nhuulhumache nenna nlhove nna tho! 27Mmwelheke vachulhu mwaako wo Upisga, mmwe mwoona yeyo ilhapo iyo, mwoone uneelha nchuwa, uchulhu, uchawa ni unosha nchuwa. Mmweheke rata chittu chinoona inyu, ukhalhawaya inyuva khannolhapuwa ulha mwoolhoko wo Uyorodani ulha. 28Nansho mwaahelheke nrima Nayoshua ni waalhipiha, ni waavaha malhehero, ukhalhawaya yayo phi nohalha waaholhelha attu alhapuwe mwoolhoko wo Uyorodani, arwee akhalhelhe ilhapo inohalha inyu woona iyo.’
29“Paahi, nkanaahalha vava vanikoteni va, vakhiviru ni iwani yo Ubeth Peori va.”
Currently Selected:
Itorati 3: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
