Itorati 2
2
Attu o Israeli anoothemwacha uthakoni
1“Yamalheke, nahorukunuwa nkanaarwaa uthakoni niviraka iphiro yo ibahari yo Ushamu, thoko Apwiiya Nlhuku chaakihimenrie aya, nansho nahothemwathemwa mahuku menchi vakhiviru mwaako wo Useiri.
2“Yamalheke, Apwiiya Nlhuku ahokiirelha wiira, 3‘Nhothemwathemwa wo uthosha ilhapo yo umiakoni ilha, vano etu nrukunuweke nrweeke mpata wo uchulhu. 4Nri vakhiviru uvira ilhapo yo miako cho Useiri, ilhapo ya ashilhoko inyu, iyari i Naesau. Yayo anokowoovani, nansho nhikelha mweettialha, 5nhaatakane ni ayo ukhalhawaya akinouvahani vakittu variwoothe nhina yeyo ilhapo iyo. Akinouvahani mena ata vakittu vakani vo unyikalha. Kihaavaha iyari i Naesau yeyo ilhapo yo miako yo Useiri iyo, wiira ikhalhe yawaya. 6Mwathananaka yoolhia ama maashi ukhuma uwannyaya, mwathumeke.’
7“Paahi muupuwelheke Apwiiya Nlhuku inyu chenre aya wo uvahani ibarakha wo kila ittu yaapannge inyu. Ahoushungani vaathemwathemwa inyu, vaari inyu uthako mulhupalhe ulha. Ahokhalha vamoka ni inyu iyaakha makhumi ncheshe chonkhaye chi, nansho khamwawukuwelhiye ittu iriyoothe.
8“Wo chiichammo nahothepa urwaa nkwaha ihu, nkanaavira ashilhoko ihu, iyari i Naesau yaakhalha Useiri, nkanaahiya utulhi iphiro yo Uaraba ni iwani cho Uelathi ni Uesion Geberi. Yamalheke, nahorukunuwa nkanaattwara iphiro inovira ithakhwa yo Umoabu. 9Apwiiya Nlhuku nkayaakiirelha wiira, ‘Nhaahuvihe attu o Umoabu, mena nhaatakane ni ayo, ukhalhawaya akinouvahani vakittu variwoothe yo ilhapo aya. Ukhalhawaya ilhapo yo Uari iyo, kihaavaha achishaana a Nalutu wiira ikhalhe yawaya.’ ”
10(Khalhayi vawo ilhapo yo Uari iyo yaari ikhalhiyaka ni attu enchi, attu o machiri ni orekama nchusha thoko attu o nikosho ni Naanaki. 11Thoko achishaana a Naanaki, yalha attu alha ahochuwaniya tho thoko Arefai, nansho attu o Umoabu yeehanne Aemi. 12Attu o Uhori ni ayo tho ahokhalha wowo Useiri uwo mpacho vawo, nansho achishaana a Naesau ahoomolhacha ni waarimelhiha, yamalheke ashinene ayo aheesha nipuro naya vavawo vakittu vawo. Attu o Israeli ahopanga thoko chiicho mwiilhaponi mwaavahiye aya ni Apwiiya Nlhuku wiira ikhalhe yawaya.)
13“Apwiiya Nlhuku nkayaanirelha wiira, ‘Nthamacheke vano, nlhapuweke mwoolhoko wo Uzeredi.’ Paahi naholhapuwa mwoolhoko wo Uzeredi uyo. 14Nkachaavira iyaakha makhumi mararu ni nane toka uthama Ukadesh Barnea mpaka ulhapuwa mwoolhoko wo Uzeredi. Yeyo ikatema iyo, iyari yonkhaye ya attu o nchusha no urwaa ukhottoni naari ninamanlhe, thoko Apwiiya Nlhuku chenre aya wo waalhupelhelha. 15Apwiiya Nlhuku anene ahaatakana ni yayo, wiira aarimelhihe wowo unipuroni uwo, mpaka onkhaye nkayaamalha.
16“Paahi, attu onkhaye vaamanlhe aya ukhwaacha, 17Apwiiya Nlhuku ahokiirelha wiira, 18‘Lhelho nna nlhapuweke mwiinano wo Umoabu wo uvira ilhapo yo Uari. 19Nnoophiya ilhapo ya attu o Uamoni. Nansho nhikelhe mwaahuviha mena nhikelha mwaatakana ikhoto ni yayo attu ayo, ukhalhawaya akinouvahani vakittu variwoothe mwiilhaponi mwa yayo achishaana a Naamoni ayo, vakhalhe nhakhu inyu. Mena! Ukhalhawaya yayo phi iyari i Nalutu, ni ayo kihaavaha ilhapo iyo ikhalhe yawaya’ ”
20Yeyo ilhapo iyo yahochuwania tho, ukhalha ilhapo ya Arefai. Arefai yaakhanlhe wowo khalhayi vawo, ni attu o nikosho ni Naamoni yeehanne yayo manyaattu ayo, Azanzumi. 21Yayo aari attu enchi, o machiri ni orekamacha thoko achishaana a Naanaki. Nansho Apwiiya Nlhuku ahaarimelhihacha vaaphilhe aya ilhapo ya attu o Uamori, yaakunshe ilhapo aya iyo, nkayaakhalha mwommo vakittu waya. 22Apwiiya Nlhuku nkayaapanga Aedomu anokhalha ilhapo yo Useiri, thoko chaapangenlhe aya achishaana a Naesau. Ahaarimeelhiha Ahori ikatema Aedomu vaaphiyanche aya wowo, nkayaakusha ilhapo aya ni ukhalha mwommo mpaka lhelho. 23Attu o Uavi yaari vavawo mpacho, akhalhaka ilhapo cho umbwaani cho ibahari yo Umediteraniya mpaka Ugaza. Akaftori, attu aakhumme ichirumba yo Ukirete ahowaacha ni waarimelhiha, nkayaakhalha mwommo vanipuroni waya.
24“Yamalheke, Apwiiya Nlhuku ahoniirelha wiira, ‘Haya etu! Nchokholheke vano nkwaha. Nlhapuweke nikoote no Uarnoni. Mii kihookottolhelhani Nasihoni, amwene o ilhapo ya Uamori, ni Naheshboni ni ilhapo aya. Mwaakelhelheke ni uchokholha ukhalhelha ilhapo aya. 25Lhelho kinoochokholha waapanga attu onkaye o velhaponi va, owooveni ni akelhiyeke ni woova, anowiiwacha mwaha unowaachani mwaatti, ni ayo anoothukumelhacha ni ukelhiya nipampa.’
Attu o Israeli anowaakottolha amwene Nasihoni
(Waal 21:21-30)
26“Paahi etu, kahaaruma attu ukhuma uthakhwani Ukedemothi arwaache wa amwene Nasihoni o Uheshboni ni nttenga unowiiha mpuha. 27Wo wiira, ‘Nnihiyereke nivire mwiilhaponi mwinyu. Ninovira muntalhani, ni urwaa wo uhirukunuwa wiimonono ama moono wiimushi. 28Ninoothumacha yolhia ihu ni maashi ninohalha ihu uwuria. Iruusa yo uvira wo mieto mwiilhaponi mwinyu phi ittu inolhepelha ihu, 29wiira nilhapuwe mwoolhoko wo Uyorodani ni ukelha ilhapo ya Apwiiya Nlhuku, Nlhuku ihu anonivaha aya. Achishaana a Naesau anokhalha Useiri ni Umoabu ni anokhalha ilhapo yo Uari yahonihiyerera wiira nivire mwiilhaponi mwaya.’
30“Nansho amwene Nasihoni o Uheshboni, khayaanihiyerenre wiira nivire mwiilhaponi mwaya. Apwiiya Nlhuku, Nlhuku ihu ahaalhipiha muru ni waahelha itiyamaru wiira naakottolhe ni ukusha ilhapo aya ninokhalhelha ihu mpaka lhelho nna va.
31“Baada yo vavawo, Apwiiya Nlhuku nkaakiirelha wiira, ‘Mmweheke! Kihochokholha waahelha amwene Nasihoni ni ilhapo aya mmathathani mwinyu, nchokholheke etu ukusha ilhapo aya ikhalheke yawinyu.’ 32Yamalheke, Nasihoni ahowa ni attu aya onkhaye uwa waatakana ni hii vakhiviru ni iwani yo Uyahasa. 33Nansho Apwiiya Nlhuku, Nlhuku ihu ahonivaha naakottolhe, nkaneeva anene ayo, achishaana aya vamoka ni attu aya onkhaye. 34Nkanaavara mateeka ni ulhakalhiha ilhapo aya yonkhaye, nkaneevakacha manyaalhopwana, manyaathiyana ni achishaana, khananhilhe ntu riyoothe nari nkumi. 35Chittu chaavanre ihu ni ukusha, chaari mihuwo ni mihakhu chikina chonkhaye chaaphwanyilhe ihu mmawani. 36Uchokholhelha Uaroeri, iwani irii mwiinano wo nikoote na Uarnoni ni iwani irii nhina nikoote nna, mpaka Ugileadi, khiiwo iwani iriyoothe yemenlhe rata, wiira noochelhe ukottolha. Ukhalhawaya Apwiiya Nlhuku ahonooriha ukottolha iwani chonkhaye. 37Nansho khanaatamenrie ilhapo ya attu o Uamoni ama mwiinano wo mwoolhoko wo Uyaboki, mena ilhapo yo umiakoni, mena vakittu variwoothe, vaachiichihiye ihu ni Apwiiya Nlhuku, Nlhuku ihu wiira nihirwee.
Currently Selected:
Itorati 2: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
