Itorati 1
1
Cho uhoolhelha
1Ilha ikitabu ilha phi yo malhove a ashinna Musa aahimenrie aya attu onkhaye o Israeli ikatema yaakhanlhe aya uthakoni, unoshelha nchuwa mwoolhoko wo Uyorodani. Yaari unikoteni Uyorodani vakhiviru ni Usufu, variyari wo iwani yo Uparani mpata mmoka, ni mpata nkina iwani cho Utofeli, Ulabani, Uhaserothi ni Udizahabu. 2Nkwaha wo ukhuma umwaakoni Uhorebu weehaniya tho mwaako wo Usinai, waari wo mahuku khumi ni moka mpaka Ukadesh Barnea wo iphiro yo umwaakoni Useiri. 3Nihuku no upacha no mweri wo khumi ni mmoka, iyaakha yo makhumi ncheshe, toka attu vaathamilhe aya Umisri, ashinna Musa ahaalheheracha attu kila ittu yaahimeriye aya ni Apwiiya Nlhuku wiira yaahimerie attu. 4Aapannge chiicho vaamanlhe aya waakottolha amwene Nasihoni o ilhapo yo Uamori aatawara iwani yo Uheshboni, ni amwene Naogu o ilhapo yo Ubashani aatawara iwani cho Uashtarothi ni Uedrei. 5Attu vaari aya ukhopelhelhe mwoolhoko wo Uyorodani, wi ilhapo yo Umoabu, ashinna Musa ahochokholha waahimiachera malhehero a Apwiiya Nlhuku.
Yeerenlhe wiira, 6“Vaari ihu umwaakoni Usinai, Apwiiya Nlhuku, Nlhuku ihu ahoniirelha wiira, ‘Nhokhalhacha mahuku o uthosha vamwaakoni vaa. 7Vano etu mphomolheke nipuro ninyu nthepeke urwaa nkwaha inyu. Nrweeke ilhapo yo umiakoni ya attu o Uamori ni ilhapo cho vachereshere waya, chinaatamana ni Uaraba, umiakoni ni mmakoteni, Unegebu ni umbwaani. Eiyo, nrwaacheke mpaka ilhapo ya attu o Ukanaani, ni ilhapo yo Ulebanoni, mpaka uri mwoolhoko mulhupalhe wo Uyufrati ulhe. 8Mwooneke, kihovahani umihoolho winyu ilhapo yonkhaye iyo. Paahi, nrwaacheke mwakhalhe yeyo ilhapo iyo, mii Apwiiya Nlhuku yaalhapenlhe aka waavaha manyaapwiiya inyu Aburahimu, Naisaka, Nayakhobo ni iyari chaya.’ ”
Ashinna Musa anowaathanlha attu o waamulha milhatu
(Utt 18:13-27)
9Yamalheke, ashinna Musa aheerelha attu wiira, “Vaari ihu khaninaya uthama umwaakoni Usinai, mii kahouhimeriani wiira, ‘Ntheko wo uholhelhani mwaatti, mulhupalhe chinene, akinooria mii vekha aka. 10Apwiiya Nlhuku inyu, ahoupangani ukhalha attu enchi, lhelho va nri attu enchi thoko ittotwa cho wiirimu. 11Apwiiya Nlhuku, Nlhuku a manyaapwiiya inyu, athepeke etu uwunchererani mikwaha elufu uthepa chiri inyu vano va, ni uvahani ibarakha thoko chilhenhe aya! 12Nansho mii vekha aka kinohalha wooria chani ukusha ntheko muulhupalhe wo waamulha indewo chinyu uyo? 13Mwaathanlheke attu arii ni irusho, o umanya, aneewelhelhiya, o ukhuma kila nikosho, wiira khaathanlhe akhalhache ahoolhelhi inyu.’ 14Ni inyu mwaatti mwahorumelhelha, nkamwaakakhulha wo wiira, nhohimia ittu yoombone upanga. 15Paahi etu, kahaakusha ahoolhelhi ari ni irusho, o umanya, aneewelhelhiya ni attu, nkakaapanga ukhalha ahoolhelhi inyu. Kaheesha akina ukhalha o weemelhelha miphingo cha manyaasikari o miphingo cha attu elufu imokaimoka, cha attu imia imokaimoka, cha attu makhumi nthanunthanu, ni cha attu khumikhumi. Kahaathanlha tho manyoolhupalhe akina o ushunga kila nikosho.
16“Yeyo ikatema iyo kahaavaha attu anaamulha milhatu chinyu ayo, alha malheheriyo anottwara alha wiira, ‘Mwiiwelhelhe milhatu cha attu inyu. Nhukumulheke wo ikekhiaye, vanaamulha inyu milhatu cha manyaattu inyu, ni vanaamulha inyu milhatu cha alheto anokhalhacha vamoka ni inyu mwaatti. 17Nhimmwehe wiitho ntu riyoothe vanaamulha inyu milhatu, nlhikaaniheke wa attu onkhaye, olhupalhe ni ashikani. Nhimwoove ntu riyoothe vanohukumulha inyu, ukhalhawaya ihukumu inoromolha inyu inokhuma wa Nlhuku. Nlhatu uriyoothe wakhalhaka wo urikarika chinene uwannyu, mmwiiheke uwannyaka, ni mii kinowiiwelhelha.’ 18Yeyo ikatema, kahoulheherani chittu chonkhaye chinothananiya inyu upanga.
Attu o uhotelha anoorumiya
(Waal 13:1-33)
19“Paahi thoko Apwiiya Nlhuku, Nlhuku ihu, chenre aya wo unilhehera, nahochokholha nkwaha ihu ukhuma umwaakoni Uhorebu, nahovira yelhe ithakhwa yulhupalhe yo woopiha nnochuwelha inyu ilhe, wo uttwara iphiro inokelha ilhapo yo umiakoni ya attu o Uamori. Vaaphilhe ihu Ukadesh Barnea, 20mii kahohimiacherani wiira, ‘Vano nhophiya ilhapo yo umiakoni ya attu o Uamori, inivahilhe aya Apwiiya Nlhuku, Nlhuku ihu. 21Mwooneke etu, Apwiiya Nlhuku inyu, aheesha yelha ilhapo ilha umihoolho winyu. Haya etu, nrweeke mwakhalhelheke thoko Apwiiya Nlhuku inyu, cherenlhe aya manyaapwiiya inyu wiira, nhoove mena nhikelhiye nipampa!’
22“Nansho yamalheke, mwaatti onkhaye mwahowa nkamwaakiirelha wiira, ‘Naarumeke etu attu anihoolhelhe, arwee ahotelhe ilhapo iyo. Amalhihaka ahokolhieke awe aanihimeria iphiro irii yorera uttwara, ni iwani chinohalha ihu uphwanya wowo.’
23“Yeyo ittu iyo yahooniya ukhalha yoombone uwannyaka, nkakaathanlha attu khumi ni elhi, ntu mmoka ukhuma kila nikosho. 24Yayo attu ayo ahorwaacha yelhe ilhapo yo umiakoni ilhe, nkayaaphiyacha nikoote no Ueshkoli ni uhotelhacha. 25Vaahokolhelhe aya, ahoniwiihera maphepu o ilhapo iyo ni unihimeria wiira yeyo ilhapo anonivaha aya Apwiiya Nlhuku, Nlhuku ihu iyo, yorera.
26“Nansho, mwaattiva khamwattwanre malhehero a Apwiiya Nlhuku inyu, wo ukhota urwaa wowo wiilhaponi uwo. 27Nkamwaachukhulhacha mmaheemani mwinyu mwiiraka, ‘Apwiiya Nlhuku anoonivenga, phi nlhatu etu no unithamiha Umisri. Yaathanana unihelha mmathathani mwa attu o Uamori, wiira anirimelhihe. 28Nlhatuni no urwaa wowo uno mirima chihu choovaka? Nihohimeriya wiira, attu o wowo olhupalhe ni orekamacha unipwaha hii, ni iwani chaya chiyo chulhupalhe, ni cho ingome chinophiya umahuteni. Tho, attu aarumilhe ihu ayo ahohimia wiira yahoona manyanttu olhupalhe, iyari i Naanaki!’
29“Nansho mii kahowiirelhani wiira, ‘Nhikelhiye nipampa mena nhoove yayo attu ayo.’ 30Apwiiya Nlhuku inyu, anouhoolhelhani, anokowaatakana anene wo nlhatu winyu, thoko choonilhe inyu apangaka Umisri ulhe, 31ni thoko chaapannge aya uthakoni ulhe. Voonne inyu chenre aya wo ukushani nkwaha wonkhaye, thoko naangoro nlhopwana chinonkusha awe mwaamwanawe, mpaka nkamwaaphiya vaa. 32Nansho inakhalhaka ahopanga yayo onkhaye ayo, inyuva khamwaarumelhenlhe Apwiiya Nlhuku inyu, 33ohoolhenlheni mphironi ni uwaveriani vakittu wo weesha nipuro ninyu. Uhiyu ohoolhenlheni wo nipoto no mooro, ni uthana wo nihute, wiira owooniheni iphiro.
Apwiiya Nlhuku anowaatwarusha attu o Israeli
(Waal 14:20-45)
34“Apwiiya Nlhuku aheewa ichuku chinyu, nkayaathunalha nkayaalhupelha yeeraka, 35‘Khaawo mena ata mmoka inyu o iyari yo uhilhoka ilha nohalha ukelha yeyo ilhapo yorera ilha kilhenhe aka waavaha manyaapwiiya inyu. 36Nakalebu anaaya Nayefune, phi nohalha uphiya wowo, ni mii kihaavaha ilhapo ilha inyikanlhe aya ilha ikhalhe yawaya, yayo ni iyari aya, wo nlhatu no ukhalha ntu o ukhulhuvelhiya uwannyaka.’ 37Ni wo nlhatu winyu, Apwiiya Nlhuku ahokithunalhelha mii, nkayeera, ‘Mena, ata ni inyu Namusa khannokelha mwommo mwiilhaponi mmo. 38Nansho akavihi inyu Nayoshua anaaya Nanuni, phi nohalha ukelha mwommo. Paahi mwaahelheke nrima, ukhalhawaya yayo phi nohalha waaholhelha attu o Israeli arwee akhalhelhe yeyo ilhapo iyo.’
39“Yamalheke, Apwiiya Nlhuku ahoniirelha hii onkaye va wiira, ‘Yayo achishaana inyu nnoovacha inyu wiira anokoovarakachiya ni amalhaponi inyu ayo, eiyo, yayo ashinkani ayo ahinochuwelha ittu yoombone ama ittu yo uhilhoka ayo, yayo phi nohalha ukelha wowo, ni mii kinowaavaha yayo ilhapo iyo ikhalhe yawaya. 40Nansho mwaattiva, nrukunuweke nhokolhieke uthakoni, nlhukameke Ibahari yo Ushamu.’
41“Ni inyu mwaatti nkamwaakakhulha wo wiira, ‘Hii nihaawonya Apwiiya Nlhuku, nansho vano ninoorwaa ni waatakana thoko Apwiiya Nlhuku, Nlhuku ihu, chinilhehenre aya.’ Paahi kila mmoka inyu eechesheke tayari waatakana ikhoto, mwaanyiheraka wiira khayaarika mwaatti ukelhelha yeyo ilhapo yo umiakoni iyo. 42Ni Apwiiya Nlhuku ahokiirelha wiira, ‘Mwaahimerie attu ayo ahirwee uwaatakanani ikhoto, ukhalhawaya akiri vamoka ni ayo. Ahirwee, ahiwe aakottolhiya ni amalhaponi aya.’ 43Paahi mii kahohimeriani chiicho, nansho mwaatti khamwewelhenlhe. Utulhi waya nkamwaakhota uttwara malhehero a Apwiiya Nlhuku, wo itiyamaru inyu nkamwaakelha mwiilhaponi uri miako. 44Vavawo, attu o Uamori yaakhalhacha wowo umiakoni uwo, vaakhuruwilhe aya ni ukelhelhani mwaatti thoko inwii chineera aya, mwahaatakachiya, ukhuma wowo Useiri uwo mpaka Uhorma. 45Phi vavawo vaahokolhelhe inyu ni wonlhelha Apwiiya Nlhuku, nansho Apwiiya Nlhuku, khayewelhenlhe wala ulhohani. 46Paahi, nkamwaahalha Ukadeshi uwo, waakhanlhe inyu wo mahuku menchi.
Currently Selected:
Itorati 1: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
