San Mateo 5
5
Thi chrjuin kjuaago Jesús ngain jna
(Lc. 6:20-23)
1Are Jesús bikon anto tsjé chujni xrathe, jeꞌe kuani ngain naa jna ko tabeꞌe, kuthejan kunchieꞌen ngain Jesús chujni kuinchieꞌe. 2Ko jeꞌe kuexiꞌin ndache na̱ ko kuague na̱ jaꞌin:
3—Ndo Dio sinchenchaon thi chujni xraxaon ixin rugundeꞌe na̱ ixin Ndo Dio tsjengijna na̱, ixin chujni teꞌi tekininxin na̱ sinthe na̱ thi tsetuꞌan Ndo Dio nthi̱ꞌa̱ ngajni.
4’Ndo Dio sinchenchaon chujni tsjanga, ixin jeꞌe ndo santsjeꞌe na̱ kain juachjaon.
5’Ndo Dio sinchenchaon chujni tainꞌa ñao, ixin jeꞌe na̱ sayée na̱ nunthe ndachro ndo sajon ndo.
6’Ndo Dio sinchenchaon chujni anto rinao ixin chujni sincheꞌe na̱ thi jian inchin jeꞌe ndo rinao ndo, ixin jeꞌe ndo tsjengijna chujni teꞌi sincheꞌe na̱ jamee.
7’Ndo Dio sinchenchaon chujni thiakunueꞌe icha chujni, ixin jeꞌe ndo tsiakunueꞌe na̱ kai.
8’Ndo Dio sinchenchaon chujni xraxaon ngathe anseen sincheꞌe jeꞌo thi jian, ixin jeꞌe na̱ sikon na̱ ndo.
9’Ndo Dio sinchenchaon chujni ncheꞌe ixin tsetoꞌa chujni, ixin ni teꞌi siꞌin na̱ xeꞌen ndo.
10’Ndo Dio sinchenchaon chujni anto dathuꞌe tangi ixin ncheꞌe na̱ thi jian inchin rinao ndo, ixin chujni teꞌi sinthe na̱ nthi̱ꞌa̱ ngajni, thi thetuꞌan Ndo Dio.
11’Ndo Dio sinthanchaon ra are chujni chrjuinꞌa runichja na̱ ixin jaꞌa ra ko nthakinga ra na̱ ko runichja na̱ thi nduaꞌa ixin jaꞌa ra. 12Maski jamee tsuꞌan ra, chaꞌa ra ixin tsjé sayéꞌe ra nthi̱ꞌa̱ ngajni. Ixin kai jañaa bincheꞌe chujni ngain ni bagayée juajnee Ndo Dio are saꞌo.
Chujni dithikaon Jesús inchin xijntha ko inchin xruꞌi nchengasaan
(Mr. 9:50; Lc. 14:34-35)
13’Jaꞌa ra inchin xijntha ngain chujni nunthe jiꞌi. Aro ja̱ xijntha ndarukuxruathe, ¿kexreen nchao sinchegunda chujni? Xijntha mee ixruꞌin xree ko jeꞌo singo xijntha ko tsingachjetheꞌe chujni.
14’Ko jaꞌa ra inchin thi xruꞌi nchengasaan ngain chujni nunthe jiꞌi, ixin naa rajna jii ngataꞌa naa jna chroꞌa sema rajna. 15Ko nchekaonꞌa ni naa xruꞌi ixin tsejanthe ni xruꞌi. Icha jian sakeꞌe ni xruꞌi ngataꞌa naa thi nui ixin nchao singasenxin ni texiꞌin nchia. 16Ko jañaa ncheꞌe ra jaꞌa ra kai ixin thi jian sincheꞌe ra, mee inchin naa xruꞌi nchengasaan ngathexin kon kain chujni. Ko are sikon na̱ thi jian sincheꞌe ra, jeꞌe na̱ sinchesayeꞌe na̱ Ndudaa ná thjen ngajni.
Jesús kjuague chujni keꞌe ruchro ley bayée Moisés
17’Xraxaonꞌa ra ixin jaꞌan juiꞌi ixin rundachrjan ixin ley ko thi nichja ni bayée juajnee Ndo Dio xruꞌin xree; jaꞌan juiꞌi ixin rundathjan chujni keꞌe ruchro ley. 18Jaꞌan ndua rundathjo ixin are xraseꞌe ngajni ko nunthe, xruꞌin sachrjeꞌe ley ko rugunda tsuꞌen kain thi jitaxin ngain ley. 19Mexinxin kexeꞌo chujni sithikaonꞌa nakua thi thetuꞌan ley, maski thi icha tangiꞌa ko xrajeꞌo tsjague chujni ixin sithikaonꞌa ley, chujni jiꞌi rukjan na̱ thi icha rentheꞌa ngain thi thetuꞌan Ndo Dio; aro kexeꞌo chujni sincheꞌe thi ndachro ley ko xrajeꞌo tsjaago ngain chujni ixin sithikaon na̱, chujni jiꞌi icha tsurenthe ngain thi thetuꞌan Ndo Dio. 20Mexinxin jaꞌan ndathjo ra, ja̱ sincheꞌa ra icha jian ke kain xi tjaago ley ko xi fariseo, chroꞌa sinthe ra ngain thi thetuꞌan Ndo Dio.
Jesús tjaago ixin thi tuñaunka ni
(Lc. 12:57-59)
21’Jaꞌa ra ukuiꞌin ra thi bituꞌen ni xrachrjeꞌan ra: “Duenꞌa ra chujni ixin kexeꞌo thi duen chujni rugunda sueꞌen jie̱.” 22Aro jaꞌan rundathjo ra ixin kexeꞌo thi tsuñauꞌe xan choo o chrjuinꞌa nichja ixin jeꞌe xan sueꞌen jie̱ ixin ni judío icha thetuꞌan, ko kexeꞌo thi ndachro ngain xan choo ixin xruꞌin xree xan, chujni jiꞌi jikininxin tsji ngathe xruꞌi dangaꞌa.
23’Mexinxin ja̱ tsjiꞌo ngain niꞌngo thi binchekininxin Ndo Dio, ko are tariꞌi nthi̱ꞌa̱ ruxraxaon ixin xan choo jiduñao xan ngajin, 24nthi̱ꞌa̱ thinthuꞌe thi jaꞌa ridajon ngain Ndo Dio, ko thji ngain xan jiduñao ko tjao xan ko nchethjañeꞌe choo ra. Kuthimejan kjan ko dajon thi binchekininxin Ndo Dio.
25’Ja̱ chrujan chujni sichro jie̱ ixin jaꞌa, icha jian ngatjao nthiꞌá nchetseꞌen ñao sinthatjañaꞌa, ko itsjioꞌa ngain xi ncheꞌe jie̱. Ixin ja̱ tsjiꞌo ko sajon ngain thi ncheꞌe jie̱, ko thi ncheꞌe jie̱ sajon ngain xi soldado jeꞌe xa tsiaxiꞌan xa ngain nduꞌa xiiso. 26Ko jaꞌan ndua rindathjo, ixin sachrjexinꞌa nthi̱ꞌa̱, tsengaja ꞌna kain tumi sanchia na̱.
Jesús tjaago ixin thi chunda xi kuxe o nchri kuxe
27’Jaꞌa ra ukuiꞌin ra thi ndachro: “Dinthechrinkoꞌa ra thi jeꞌa xixiꞌa ra o chriꞌa ra.” 28Aro jaꞌan rindathjo ra ixin kexeꞌo xii sikon ko tsiakuꞌen sejuakao nchra, xii mee ngathe anseen ubejuakaꞌo nchra.
29’Mexinxin ja̱ jmakon jii no rajianxin dikon ko jinthaxraxaon ncheꞌe thi jianꞌa, icha nchao dantsjengi ko danka, ixin icha jian sinchetjaan naa jmakon ko jeꞌa nguixin nthauꞌa tsji ngathe xruꞌi dangaꞌa. 30Ko ja̱ rajianxin sincheꞌe thi jianꞌa, icha jian tunchrijin raa ko danka ra, ixin icha jian sinchetjaan naa raa ko jeꞌa nguixin nthauꞌa tsji ngathe xruꞌi dangaꞌa.
Jesús tjaago ixin thi dachrjendeꞌe ni tekaꞌo choo
(Mt. 19:9; Mr. 10:11-12; Lc. 16:18)
31’Kai ley ndachro: “Thi rinao sachrjendeꞌe chriꞌi rugunda sinchechjieꞌen nchra naa xroon setaxin ixin tabachrjendeꞌe nchra.” 32Aro jaꞌan rindathjo ra ixin jaan nchao sachrjendeꞌe xa chriꞌi xa ja̱ bithja nchra tajijuakaꞌo nchra inaa xii, aro ja̱ jeꞌa ixin jiꞌi, thi xii jitanchrjanda nchra sincheꞌe nchra thi jianꞌa ixin tsjee nchra inaa xii ko xi sekaꞌo nchra rukjan xi kuxeꞌe nchra.
Jesús tjaago ixin sajinꞌa ni Ndo Dio are chrujan sajon ni
33’Ko kai ukuiꞌin ra are ndachro ni ndudachriꞌa ra xrachrjen: “Dajinꞌa ra ixin Ndo Dio sinchexin ra thi ndachro ra ko ncheꞌa ra.” 34Aro jaꞌan rindathjo ra ixin are chrujan sajon ra xruꞌin dajin ra. Dajinꞌa ra ixin ngajni sinchexin ra thi ndachro ra, ixin ngajni thjen Ndo Dio; 35Kai dajinꞌa ra nunthe, ixin nunthe nchejugaxin ruthee Ndo Dio, kai dajinꞌa ra Jerusalén ixin rajna jiꞌi, rajnee Ndo Dio, thi Rey. 36Ko dajinꞌa jaa, ixin jaꞌa chroꞌa sinchethie o sincherua naa xrajaa. 37Mexinxin icha jian jeꞌo ndachro ra “jaan” o “naꞌi” ixin ja̱ runichja ra icha, thi icha runichja ra mee thixin ngain nchiijin.
Jesús tjaago ixin tsjengexinꞌa ni
(Lc. 6:29-30)
38’Jaꞌa ra ukuiꞌin ra thi ndachro thi thetuꞌan ley: “Thi tsunchringa jmakon naa chujni, kai jeꞌe tsuchringeꞌe na̱ jmakon. Ko thi sankeꞌe neno naa chujni, kai jeꞌe sankeꞌe na̱ neno.” 39Aro jaꞌan rindathjo ra ncheꞌa ra jamee. Ja̱ chrujan chujni ruxrangiꞌa ra naa raa ngakon ra no rajianxin ra, dithuaxin ra ruxrangiꞌa ra inaa raa ngakon ra no rakjunxin ra. 40Ko ja̱ chrujan chujni sichro jie̱ ixin jaꞌa ko sinao santsjaꞌa luntho ringaꞌa, kai dithuaxin sasikao thi ritsii. 41Ja̱ chrujan chujni tsetuꞌan tsameꞌe thi jidikao ko rundathjo thjiꞌo naa kilómetro, jaꞌa thjiuꞌe yoo kilómetro. 42Ko kexeꞌo chujni chrujan sanchiaꞌa, chjeꞌe; ko ja̱ chrujan thi jitjaꞌan, nchekjen.
Ruthjueꞌe ni chujni ningakuꞌen ni
(Lc. 6:27-28, 32-36)
43’Kai jaꞌa ra ukuiꞌin ra thi ndachro thi thetuꞌan ley: “Thjueꞌe chujni jian chrjioꞌo ko ningakuꞌen chujni ningakuꞌan.” 44Aro jaꞌan rindathjo ra: Thjueꞌe ra chujni ningakuꞌan ra, ko nchenchaon ra chujni danchia ixin jianꞌa tsuꞌan ra, ncheꞌe ra jian ngain chujni ningakuꞌan ra, ko nchetseꞌen ra ñao Ndo Dio ixin chujni chungiꞌa ra. 45Ko jañaa rukjan ra xeꞌen Ndo Dio ra, ndo thjen ngajni. Ixin jeꞌe ndo dajon ndo juachaxin chriꞌin nchaꞌon nchengaseꞌen chujni ncheꞌe jian ko chujni ncheꞌe thi jianꞌa, ko ruaꞌan ndo chrin ngain chujni ncheꞌe jian ko chujni ncheꞌe thi jianꞌa. 46Ja̱ thjueꞌe ra jeꞌo chujni thjuaꞌa ra, ¿keꞌe jian sayéꞌe ra?, ixin kai chujni thjejo tumii Roma jañaa ncheꞌe na̱. 47Ko ja̱ jeꞌo ni choo ra chjeꞌe ra juajna, ¿keꞌe icha jian tencheꞌe ra?, ixin kai chujni chunxinꞌa Ndo Dio jamee ncheꞌe na̱. 48Xruꞌin thi jianꞌa ncheꞌe ra, jañaa inchin Ndudaa ná thjen ngajni xruꞌin thi jianꞌa ncheꞌe ndo.
Currently Selected:
San Mateo 5: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.