2 Timoteo 1

Pablo chjee juajna Timoteo

1Jaꞌan Pablo na, thi kuinchieꞌe Jesucristo ixin thjiꞌan juajnee, ko juajna mee bayáa ixin juachaxiin Ndo Dio ixin jeꞌe ndo binthakjan ná ndo inaa chujni naruaxin ixin Jesucristo. 2Kji̱n na xroon jiꞌi ixin jaꞌa, Timoteo, jaꞌa thi kjui inchin xanꞌna. Ko Ndo Dio Ndudaa ná ko Nchaa ná Jesucristo sinthanchaon ko tsiakunuaꞌa ko ruchjaa ndo thi chrjuin tsunuꞌe ansean.

Tjaago juajnee Jesucristo

3Are jaꞌan thexruxian Ndo Dio nchaꞌon ko thie ixin jaꞌa, kai thexruxian ndo ixin nthaꞌa xree ndo kunixin naa juaxraxaon jian inchin bincheꞌe xra ni xrachrjenꞌna. 4Ko jaꞌan anto xraxaꞌon are jaꞌa tsjanga ko rinaꞌo sikon. Ko jañaa anto ruchaꞌna. 5Ko kai xraxaꞌon ixin jaꞌa nduaxin dithikaon Jesucristo inchin bithikaon jana chriꞌa Loida ko janaa Eunice, ko jaꞌan nuna ixin jañaa dithikaon jaꞌa kai.

6Mexinxin jaꞌan thetuꞌan ixin nchegunda thi juachaxin chjaa Ndo Dio are jaꞌan kuiin rana ngataꞌa jaa ixin binthanchaon ndo. 7Ixin Ndo Dio chjaa ná Espíritu Santo ixin ruxraonꞌa ná, ixin Espíritu mee chjaa ná juachaxin sinthoꞌo ná xree ndo, ko ruthjueꞌe ná chujni, ko kai chjaa ná jian juaxraxaon. 8Ko tanchrjandaꞌa juasuaxin sinthatenkua ixin rundachro thi jian juajnee Jesucristo, ko tusuaꞌa ixin jaꞌan jiaxinna ixin juajna mee. Icha jian thixiꞌan ngain thi tangi tsuꞌan ixin thi jian juajna ixin Ndo Dio sinthasuji jaꞌa. 9Ko Ndo Dio, thi binthakjan ná inaa chujni narua, ukuinchiaa ná ndo ixin isinthoꞌa ná thi jianꞌa, aro jeꞌa ixin anto jian binthoꞌo ná. Ixin are nakuexinxon beꞌe kain, jeꞌe ndo uxraxaon ndo ixin jaꞌan ná, ko undachro ndo ixin jaꞌan ná rukjan ná xeꞌen ndo ixin Jesucristo. 10Ko jai ukjuagua ná ndo ixin anto thjuaa ná ndo ixin ruaꞌan ndo Jesucristo, thi binthakjan ná inaa chujni narua. Ko Jesús kjuagua ná ixin thi ndadeꞌen ni ichundaꞌa juachaxin ngain ndo ko juajnee ndo kjuagua ná ixin nchao rukjan ná inaa chujni narua ko thi techunxin ná xruꞌin nchaꞌon tsjexin.

11Ko Ndo Dio chjana xra ixin thjiꞌan juajnee ndo ixin sinthakuaan chujni jeꞌa judío. 12Ko ixin jiꞌi anto tangi jitunna, aro jaꞌan tsusuanaꞌa ixin kain jiꞌi ixin jaꞌan nuna jian kensen bithikaꞌon ko kai nuna ixin jeꞌe ndo chunda ndo juachaxin sakueꞌen ndo thi richunxin, sithjaja nchaꞌon are tsjexin kain.

13Ko thetuꞌan ixin kain nchaꞌon ncheꞌe jian ixin thi juajna binthakuaꞌan, ko kain nchaꞌon chunthia Jesucristo ko thjueꞌe chujni ixin jaꞌa dithikaon ngain ndo. 14Ko Espíritu Santo thi jii ngajin ná tsjengijna ixin tsjaago thi jian juajna chjaa ndo ko tanchrjandaꞌa ixin inaa chujni tsjaago thi jeꞌa ndua.

15Ko jaꞌa unuꞌa ixin kain ni nuntheꞌe Asia ndakuinthuna na̱ jaunxinxon. Ko kai Figelo ko Hermógenes ndakuinthuna. 16Ko danchiaa Nchaa ná Jesucristo tsiakunueꞌe ni nduꞌa Onesíforo ixin jeꞌe tsjé nthiꞌa kjuengijna na, ko jeꞌe kusueꞌa ixin jaꞌan are biaxinna. 17Ko are jeꞌe biji nunthe Roma kjuee na kain nchaꞌon ngain kain nchia ko bithja na. 18Ko mexinxin jaꞌan nthatsaan ñao Nchaa ná ixin tsiakunueꞌe Onesíforo are Ndo Dio sincheꞌe jie̱ nguii nunthe. Ko jaꞌa unuꞌa ixin jeꞌe anto kjuengijna ná nthi̱ꞌa̱ Éfeso.

Currently Selected:

2 Timoteo 1: plsNT

Highlight

Copy

Compare