1 Timoteo 6

1Kain chujni dikuchji ngain naa xi najni sithikaon na̱ kain thi tsetuꞌan xa, ko jamee xruꞌin chujni runichja jianꞌa ixin Ndo Dio ko thi xragua ná ngaxiꞌin niꞌngo. 2Ko thi ni chunda xi najni dithikaon Jesucristo, jiꞌi ruchroꞌa ixin jeꞌe na̱ sincheꞌe na̱ thi jeꞌe na̱ sinao na̱ ixin kai dithikaon xa Jesucristo. Jaꞌan ndachrjan ixin icha ndakua sincheꞌe ra xree xa ixin xra jaꞌa ra tencheꞌe ra sithueꞌe xra ni dithikaon Jesucristo ko ni choo ná ni rinao ná. Ko jiꞌi tjaago ko thetuꞌan sincheꞌe na̱.

Thi anto rinao tumi

3Ja̱ chrujan chujni jitjaago jee ko jeꞌa inchin xragua ná juajnee Jesucristo ko jeꞌa inchin xragua ná ngaxiꞌin niꞌngo, 4chujni mee xraa naa thi dikonꞌa ko xruꞌin nuꞌe ko jeꞌo nchexruxiꞌin thetukaꞌo chujni ixin thi jeꞌa ndua. Mexinxin jii chujni chjueꞌe, chujni tuñauꞌe choo, chujni tuyauthe choo, chujni ichunthiaꞌa choo, 5ko chujni juxon tetuyauthe choo na̱ ixin juaxraxauen na̱ ichroꞌa xraxaon thi jian ko ichroꞌa datsuan na̱ thi jian; ko chujni teꞌi xraxaon na̱ ixin jaꞌan ná anto chunthia ná Jesucristo yaa sachaxin na̱ tsje tumi; jaꞌa tatoꞌa ni yaa. 6Ko ndua ixin dithikaon ni Jesucristo tsjé dacha ni, aro jeꞌo ja̱ ruchee ni ixin thi uchunda ni; 7ixin jaꞌan ná xruꞌin bikoo ná ngataꞌa nunthe ko nduaxin xruꞌin tsjiꞌo ná are ndaseꞌen ná. 8Ko mexinxin ruchaa ná ixin utechunda ná thi junthe ná ko thi luntho tengaa ná. 9Aro thi chujni rinao ruchunda icha tsje tumi, detsingaa na̱ raa nchiijin, ko dayée na̱ juaxraxauen thi jianꞌa ko rujinao na̱ rugechunda icha, ko ixin thi jianꞌa mee tangi tuꞌen na̱ ko ndanchetjaan na̱ kain thi jichunda na̱. 10Ko thi anto thjueꞌe na̱ tumi, yaa thexinxin thi jianꞌa; ko te kanxion chujni icha kuiakueꞌen na̱ tumi ko ndatjañeꞌe na̱ juajnee Jesucristo, ko mexinxin jai anto tangi tedathuꞌe na̱.

Pablo nchexraxaon Timoteo thi jian xree Ndo Dio

11Aro jaꞌa ixin dithikaon Ndo Dio, sathingeꞌe kain thi jianꞌa. Ko ncheꞌe inchin Ndo Dio rinao, ko tjaago ixin jian ncheꞌe xree ndo ko xruꞌin nchaꞌon tjañaꞌa ixin jaꞌa dithikaon Jesucristo, ko thjueꞌe chujni, ko thixiꞌan thi tangi ko tjaago ixin jaꞌa jian chujni. 12Jaꞌa thixiꞌan kain thi tangi ixin dithikaon Jesucristo, ko xruꞌin nchaꞌon tjañaꞌa ixin jaꞌa kjan inaa chujni narua. Ko Ndo Dio chjaa juachaxin biꞌin xeꞌen ndo, ko xraxaon are ndachro ngathexin kon tsjé chujni ixin jaꞌa dithikaon Ndo Dio. 13Ko jai ngathexin kon Ndo Dio, ndo binchechjian nunthe, ko ngathexin kon Jesucristo, thi xrajon ko kjuaago ixin jeꞌe jian nthi̱ꞌa̱ ngathexin kon Poncio Pilato, 14jaꞌan danchiaꞌa ixin dithikaon kain thi bituꞌan, ixin jañaa xruꞌin kensen runichja jianꞌa ixin jaꞌa, tsija nchaꞌon tsii Nchaa ná Jesucristo inaa. 15Ko Ndo Dio sincheꞌe ndo jiꞌi ngain nchaꞌon rundachro ndo ixin jeꞌo ndo thetuꞌan ndo kain thi jii ngataꞌa nunthe, ko jeꞌe ndo Nchee ni thetuꞌan, ko jeꞌo ndo thetuꞌan ndo kain. 16Ko jeꞌo Ndo Dio thi xruꞌin nchaꞌon seꞌen ndo, ko jeꞌe ndo jii ndo ngain thi tungiixin ko xruꞌin chujni nchao tsunchieꞌen. Ko xruꞌin chujni bikon ndo ko xruꞌin ni sikon ndo, ko jeꞌo ndo jikininxin tsusayeꞌe ndo ko tsetuꞌan ndo kainxin nchaꞌon. Jañaa tsuꞌen.

17Ko kain chujni jichunda tsjé tumi, jaꞌa thetuꞌen na̱ ixin tsainꞌa ñao na̱ ko ruchunthiaꞌa na̱ tumii na̱; icha jian ruchunthia na̱ Ndo Dio, ndo jichon ixin jeꞌo ndo chjaa ná ndo kainxin thi nduaxin rugundaa ná. 18Ko thetuꞌen na̱ sincheꞌe na̱ thi jian, ko jañaa icha jian sinthe na̱ ngathexin kon Ndo Dio, ko tsangi na̱ sajon na̱ thi chunda na̱. 19Ixin jañaa icha tsjé ruchunda na̱ ngain Ndo Dio, ko icha chrjuin tsunuꞌe na̱ ixin rukjan na̱ inaa chujni narua ko xruꞌin nchaꞌon tsjexin.

Nthiꞌi juexin thi kuetuꞌan Pablo ngain Timoteo

20Jaꞌa Timoteo, ncheꞌe kain thi kuetuꞌan Ndo Dio, ko dixintheꞌa ngain chijni nichja chujni dithikaonꞌa Jesucristo, ko dixintheꞌa ngain chujni xraxaon ixin anto nuꞌe na̱ ko nduaxin chunxinꞌa na̱ Ndo Dio, 21ko tsjé na̱ ixin xraxaon na̱ ixin anto nuꞌe na̱ takuinthuꞌe na̱ nthiee Ndo Dio.

Jaꞌan danchiaa Ndo Dio ixin sinthanchaon. Jañaa tsuꞌen.

Currently Selected:

1 Timoteo 6: plsNT

Highlight

Copy

Compare