1 Timoteo 4

Chujni tjaago thi nduaꞌa

1Espíritu Santo ndachro ixin are uchiaon tsjexin nunthe thuꞌa chujni sachrjenda na̱ ixin isithikaonꞌa na̱ Ndo Dio ko sithikaon na̱ espíritu ncheyeꞌe chujni ko sithikaon na̱ thi tjaago nchiijin. 2Ko tsununxin chujni jianꞌa ixin xraa tjaago na̱ jian ko ncheꞌa na̱ thi ndachro na̱ ko ncheyaxon na̱, ko ixruꞌin juasuaxin chunda na̱ ko ixruꞌin tunuꞌe na̱ ixin thi jianꞌa ncheꞌe na̱. 3Ko chujni teꞌi rundachro na̱ ixin jianꞌa tsutheꞌe chujni, ko kai rundachro na̱ ixin chroꞌa sine ni kain thi binchechjian Ndo Dio. Aro ni bithikaon Jesucristo ko chunxin na̱ thi ndua tsexruxiꞌin na̱ Ndo Dio ko nchao sine na̱; 4ixin kainxin thi binchechjian Ndo Dio jian, ko jaꞌan ná chroꞌa rundachro ná ixin jeꞌa jian, are ujuinthusayeꞌe ná ndo ixin thi junthe ná. 5Ko thjua dithuꞌe kain ixin banchieꞌe ná ndo, jañaa inchin chro juajnee ndo.

Naa jian ni nchexree Jesucristo

6Ja̱ sinchekuꞌen ni niꞌngo thi jian juajna jiꞌi, jaꞌa rukjan naa jian ni nchexree Jesucristo. Ixin jaꞌa jian tjaago ko dithikaon Xruen Ndo Dio, ko yaa ruchro ixin anto jian kuinxin. 7Aro dithikaonꞌa jaꞌa chijni jianꞌa thi thekin chujni ixin yaa xruꞌin xree, icha nchao ncheꞌe tsjé thi jian. 8Ixin thi tsuntaon ni nchion thjengijna nthauꞌe ni, aro sincheꞌe ni inchin rinao Ndo Dio, mee thi icha tsjengijna ná nthiꞌi ngataꞌa nunthe ko are sunthe ná nthi̱ꞌa̱ ngajni, ngain ndo. 9Ko thi ndachrjan jiꞌi ndua, ko jikininxin sithikaon kain chujni. 10Ko jaꞌan ná nthoꞌo ná xra maski tangi tuan ná, aro chunthia ná ngain Ndo Dio, ndo jichon, ko tsjengijna ndo kainxin chujni, aro icha tsjengijna ndo ni udithikaon ngain ndo.

11Ko kain jiꞌi thetuꞌen na̱ ko tjaguꞌe na̱. 12Ko tanchrjandaꞌa tsjanua na̱ ixin xra chjan. Icha jian tjaguꞌe na̱ ixin jaꞌa jian dithikaon Ndo Dio ixin jian nichja, ixin jian ncheꞌe, ixin thjueꞌe na̱ ixin jian dithikaon Jesucristo ko ncheꞌe inchin jikininxin naa xeꞌen Ndo Dio. 13Ko nguii saso, tjao thi jitaxin Xruen Ndo Dio ngain chujni thji niꞌngo ko nchesuji na̱ ko tjaguꞌe na̱ thi jian juajna. 14Ko thinthueꞌa thi jian juachaxin chjaa Ndo Dio, are ni thetuꞌan niꞌngo kuiin raa na̱ ngataꞌa jaa ixin nichja na̱ juajna bajon Espíritu Santo ixin jaꞌa.

15Ko ncheꞌe kain jiꞌi ko thinthueꞌa thi juajna bayeꞌe ko jañaa sikon na̱ ixin jian ncheꞌe xra ngain niꞌngo. 16Ko tanchrjandaꞌa ixin chujni tsjanua na̱ ixin ncheꞌa thi tjaago. Ko suji dariꞌi kain nchaꞌon, ko Ndo Dio tsjengijna jaꞌa ko kai tsjengijna thi chujni thiꞌin juajna nichja jaꞌa.

Currently Selected:

1 Timoteo 4: plsNT

Highlight

Copy

Compare