1 Timoteo 3
3
Kexreen rugunda sincheꞌe chujni thetuꞌan niꞌngo
1Jiꞌi thi ndua: ja̱ chrujan chujni rinao tsethuꞌan ngain niꞌngo, anto jian xra rinao sincheꞌe. 2Aro thi tsetuꞌan ngain niꞌngo jeꞌa naa thi xii ncheꞌe thi jianꞌa ixin jañaa runichjaꞌa chujni ixin thi jincheꞌe, kai tsetuanꞌa naa thi xii jikaꞌo yoo nchrii, kai rugunda ixin xii jiꞌi jian ruxraxaon thi ncheꞌe, tsjanuaꞌa chujni, kai rugunda ruchunxin na̱ ixin jian ncheꞌe, kai rugunda jian sayée chujni thji nchianduꞌa ko ruchunxin jian kexreen tsjaago ngain chujni; 3kai jeꞌa naa xii kuan, jeꞌa naa xii nchexruxiꞌin theto, kai jeꞌa naa xii anto thiakuꞌen tumi, tsuñaunkuaꞌa ko jian ruthjueꞌe chujni ko tsiakuenꞌa tumi. 4Ko kai rugunda tsunuꞌe tsetuꞌan jian ngain nchianduꞌa ko jeꞌe sincheꞌe ixin xeꞌen sithikaon xan ko ruchundeꞌe xan juasaaya. 5Ixin are naa chujni nueꞌa thetuꞌan ngain nchianduꞌa, ¿kexreen tsetuꞌan ngain ningue Ndo Dio? 6Ko kai tsetuanꞌa ngain niꞌngo naa chujni nandaa bithikaon Jesucristo ixin ja̱ tsaꞌin ñao sueꞌen jie̱ inchin bueꞌen jie̱ nchiijin. 7Ko kai rugunda ixin chujni thiꞌa ngain niꞌngo runichja na̱ jian ixin thi thetuꞌan, ixin jañaa xruꞌin juasuaxin setan are runichjee inaa chujni ko nchiijin sincheyeꞌa.
Kexreen sincheꞌe chujni thjengijna ni thetuꞌan ngain niꞌngo
8Jañaa kai ni thjengijna ni thetuꞌan ngain ningue Ndo Dio rugunda ixin chujni runichja jian ixin jeꞌe na̱, kai sincheyeꞌa na̱ chujni, ko rukuanꞌa na̱ ko tsiakuenꞌa na̱ tumi tangiꞌa dacha ni, 9ko kain nchaꞌon sithikaon na̱ thi jian juajnee Ndo Dio ko anseen tsjangiꞌa ixin chrujan thi jianꞌa jincheꞌe. 10Ko ni teꞌi saꞌo dakee ra na̱ sincheꞌe na̱ xra tangiꞌa ko ja̱ nchao bincheꞌe na̱ xra ko xruꞌin jianꞌa bincheꞌe na̱, kuthimejan nchao sincheꞌe na̱ xra ngain niꞌngo. 11Ko chriꞌi ni thjengijna ni thetuꞌan ngain niꞌngo kai rugunda ixin chujni runichja na̱ jian ixin jeꞌe nchra, tsekinꞌa nchra chijni, ko ruxraxaon nchra jian thi ncheꞌe nchra, ko nchao ruchunthia ni nchra. 12Ko chujni tsjengijna ni thetuꞌan ngain niꞌngo ruchunda nakua nchrii ko tsunuꞌe na̱ jian kexreen tsetuꞌan na̱ ngain xeꞌen na̱ ko ngain ni nchianduꞌe. 13Ko thi ni thjengijna chujni thetuꞌan ngain niꞌngo ko jian ncheꞌe na̱ thi xra bikininxin na̱, jikininxin na̱ juasaaya, ko ni mee tsusueꞌa na̱ runichja na̱ ixin Jesucristo.
Thi jian juajna xragua ná
14Jaꞌan rinaꞌo sasutsjaꞌa tuen, aro jaꞌan rikji̱ꞌan kain jiꞌi, 15ixin ja̱ xratsunchrjen na nchin, jaꞌa tsunuꞌa kexreen sincheꞌe thi jian ngaxiꞌin ninguꞌe Ndo Dio, ndo jichon, ixin ni niꞌngo thinxin na̱ jian thi ukuangi na̱ ko tsanchrjandaꞌa na̱ ixin inaa chujni sinchekuꞌen na̱ thi jeꞌa ndua. 16Ko nduaxin juajnee Ndo Dio anto tsjé thi chroꞌa thinxin ni ko juajna mee ndachro:
Ko Ndo Dio juii ngataꞌa nunthe inchin naa xii;
ko Espíritu Santo kjuaago ixin jeꞌe jian,
ko tsjé ángel bikon jeꞌe.
Ko juajnee kuiꞌin chujni jeꞌa judío,
ko nguixin nunthe jii chujni bithikaon ngain Jesucristo,
ko sakjui ngajni ko Ndo Dio binchesayeꞌe.
Currently Selected:
1 Timoteo 3: plsNT
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
