Yohanna 1
1
Buzangna Dna N Wyegma
1N kmisunhi Ɓeda ɓei nyi, Ɓedahi ɓei kunsun n Shekwoyi, Ɓedahi ɓei zhin Shekwoyi nu. 2Kafin a zhin nyaho-nyahoi wo ɓei kunsun n Shekwoyi. 3Owo ɓeda na zhin anya vinya. Nyaho-nyahoi to lon n wonu to zhin m; anya vinya owo nu na zhin. 4Wye-wyeyi nyi nwo mi, wye-wyeyi kwa ko zhin anyi buzangna nu. 5Buzangnahi kwoi kna aba ya n wyegma. Wyegma kwa kwo ta mi kwa gyi kwo sun m.
6Oza ɓo nyi ai yi wo ge Yohanna, Shekwoyi nu ɓo tnu n woi a mawo. 7Wo ɓo ɓe ntu ge wa zhin saida ntu buzangnahi ɓo nu. Wato Yesu nu zhin buzangnahi. 8Yohanna nu to ɓei zhin buzangna m, wo ɓo zhin saida buzangna nya nu kawai. 9Nwo avun, buzangna gaiciya nya kwa ɓe kwa knaya na ʼza vinya aba nɓa fi nanyi.
10Owo nu ɓo zhin anyi ye, Wa ɓe anyi n wa Zhin nyi. Ama anyi ye to ɓei kpe wo yen. 11Wa ɓe a Yahudiyi aba, n wo hin kni, ntu ge ɓa nu zhin wo aza, ama to ɓa gwo won, akpe aza fyewyi kawai n ɓa mi. 12Ama zaho-zahoi nwa gwo wo, wo ɓei la iko ga wo wa ze Shekwoyi ɓi. Onya nyi kawai n za ɓa zhin Wo la gaiciya ga, Yesu ɓa gni wo. 13Aza nɓa ga wo gaiciya ɓa ku zhin aza n na la ɓa shan ma. Toge nayi nami nu, kwokuwa n za ɓemwi m, ama Shekwoyi na ma ɓa dna n wo ɓe ye.
14Yesu ɓo la ze Oza wa dna n anyi ye n yi atasin. Yi ku wo latu gye wye. Latu Shekwoyi ɓi gba nya nu. N nunuyi na alheri n gaiciya yi.
Yohanna La Yesu Gmiwu
15Yohanna ɓo zhin wo saida wa gna aza vinya ge, “Oza nyi n mi ɓo gna fye wo ɓo nyi. Mi ɓo gna fye ge wo ɓe lo n ma avun. Wo hin kwa wo dumi lo kpolo-kpolo, wo ɓei nyi tunyi sapai, wo kwo mi lo. Kafin a ma mi wo ɓo nyi.” 16Eyi vinya yi ku ampariyi bwa, n alheri dnagmayi nwa ɓe yi n cei woi tu yi anabarka mwa-mwayi. 17Gama Musa ɓo ga yi owa n kwo gmanyi yi, ama Yesu ɓei ɓe yi n gafara zhin yeye nya yi ɓedo. Alheri gna owa Musa nya bmiya lo, ntuge owa ɓo gna ɓo dna, n na ɓe yi kpakpeyi gbo-gbo nduwyi. 18Ozaho to shin Shekwoyi wye gyem, sai Yesu gmanyi n wo nu kunsun n Shekwoyi nyi. Yesu, owo ɓi-gba, Shekwoyi zabayi, owo nu gna yi Shekwoyi ɓo.
19A Yahudawayi ɓo tnu na priest yi ɓedo na Levi yi n Urushelima. Ɓa ɓe Yohanna ʼba ntu ge ɓa gye za n wo zhin Yohanna. Ɓa lo ɓa nya Yohanna ɓo ge, Ho zhin Masihu nu?
20Yohanna gna ɓa gaiciya, ge “Mi to zhin Kristi nu m.” 21Ɓa je wo ɓo nya n ge, “Ho zhin Iliya nu?” Wa gna ba ge, “aʼa.” Har saiye ɓa nya wo ɓo, “Ho zhin anabi ho nu?” Wato n Shekwoyi ɓo zhin alkawali nyi, wa cige, “Aʼa.”
22Ɓa nya wo sayi ge, “Ho zhin nyikanu? Yi ye ya gna aza n ɓa tnu yi tnu-tnu nyi. Wu yi hohin ɓo vinya?”
23Yohanna gna ɓa ge, “Mi zhin begye nu kawai dna zhabui. Mi zhin zokwo ga Dagayi nu wa ɓe shi Anabi Ishaya ɓei da nyi.”
24A Yahudiyi n na Farisiyi ɓa nya wo ɓo n jesun ge. 25“Shi ho to zhin Kristi nu nyi m, ko kwa Iliya kwo anabi nyim, Nyika ga ho iko hoi zhin batisma?”
26Yohanna ci ge, “Mi zhin batisma n nuwan nu kawai ama za gni nyin n fye atasin, fye ta kpe wo ye lon. 27Esa to ce lo nkun, wo ɓa ya tnu-tnu n fya ba. Mi to kunce lo ma, ma ze wo baran.”
28A ɓei zhin aɓo deye n Baitanya nu. Kwo nyi n Urdun kma nu, aba n Yohanna ɓo zhin aza batisma nyi.
29Sa n fye ɓei gyi, Yohanna gye Yesu woi ɓe, wa cige, “Fye gye kugya ɓiyi Shekwoyi nya nwo nu la alaifi anyi nya vinya nyi. 30Fye pa lo? Owo nu n mi ɓo gna fye wo ɓo nyi, nge oza ɓelo n ma vun, nwo du mi, ntuge wo ɓei nyi na bye-abye, wo gyi n mi abye. 31Mihin to ɓei kpe wo yem, ama mi zhin batisma n nuwan yi, ma wu a Israilayi wo nu.”
32Yohanna gna, “Ma gye Zafun Gyi-gyi-yi wo gmi n She ngye lukpe, kwa yatu n Yesu.
33“Mihin to ɓei kpe wo yem, sai dai Shekwoyi nu ɓei gna mi nge, ‘Shi ho ɓo gye Zafun woi yatu n zaho, Owo nu. Owo nu zhin aza batisma n Zafun Gyi-gyi yi.’ 34Ma gye Zafun Gyi-gyi yi woi yatu nwo. Ma ga gaiciya ge zeye nu zhin Shekwoyi ɓi.”
Yesu Nla Anugundo Kni
35Of ya gyi, Yohanna yi gni n kun-sun n wa barayi, oɓa aba. 36Wa gye Yesu woi ɓe. Wa shi wa wye daidai, wa cige, “Gye! Shekwoyi Kugya ɓiyi lonu.” 37Yohanna bara ba ya Yesu vi.
38Yesu wa bmiya awye wa gye ɓai viwo, wa nya ɓa ge, “Fye ye kninya?” Ɓa gawo amsa ɓa cige, “Maigida, ho dna lo n na?”
39Wa ciga ge, “Fye ɓe fya gye.” Ɓa ɓe ɓa gye aba n wo ɓei dna. Wyeshe ɓei la she, ntu ce nu ɓa Ku gye wan n woi. 40Zaknayi nɓa, ai yiwo ge Andrawus, wo nu zhin Siman Bitrus mado.
41Andarawus wa lo wa zan Siman shin, wa gna wo ge, “Yi ku gye Kristi wye.”
42Wa ɓe n Siman yi n Yesu aba. Yesu wa ci Siman ge, “Oho nu zhin Siman, Yohanna nugun. Ama aɓa yiho ge Kefas wato apma nu.”
43Ofye a gyi, Yesu wa laka wa ɓe Galili wa gye Filibus wa gna wo ge, “vi mi.” 44Filibus ho ɓo gmi n Basaida nu. Basaida kwa kwo zhin Andarawus ayi nu, edo n Bitrus yi.
45Filibus wa ɓe da Natanailu wa ciwo ge, “Yi la gye gniyi wye, n Musa ɓedo n anabi yi ɓei da wo ɓo, n Alkawali kwo-kwoyi nyi Owo nu zhin Yesu n wo gmi Nazareti. Wo nu zhin Yusufu ʼɓi.”
46Ce ɓei wo Natanailu n gaiciya yi. Wa gna ge, Nazareti! “Enya manayi ɓa gmi n Nazarati?” Filibus wa gna wo ge “ɓe ha gye n hohin yi.”
47Shi Yesu ɓo gye Natanailu ɓai ɓe wa ci ge, “Gyewye, wo nu zhin Israilayi ɓehin-hin nya, wo ta zhin awyebui m.”
48Ce ɓo wo Natanailu n gaiciya yi, wa nya Yesu ɓo ge, “Ha kpe mi ye nna?” Yesu wa ci wo ge, “To na ɓom, sanu n ho ɓei shi n shinwa gna nyi, ma ku gye ho kafin Filibus wo yi ho.”
49Natanailu wa gaiciya ga, wa ciwo ge, “Maigida, Oho nu zhin Shekwoyi nugun, ho nu zhin Esu Israila nya.”
50Yesu wa nyawo ge, “Ho gami gaiciya shi ma gna ho ge, ma ku gye ho n shinwa gna?” Ho ɓa gye aɓo mwa-mwa yi n dudu ɓo. 51Ho ɓa gye eshe kwoi guya, ho gye a mailaika ɓai shin zhi ɓai je gun, dami, Oza nugun.
Currently Selected:
Yohanna 1: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.