Luka 20
20
1Nwyihoi, esanu Yesu ɓei dna n aduwa nyakun woi wu aza nya woi zhin ɓa waʼazi nabari manayi nya a prist dnagmai, ɓedo n atukwoda yi ɓa ɓe owo aba. 2Ɓa ciwo ge, “Gnayi gaiciya, Nyikado nu nagaho iko nge ho zhin aɓoye pya?”
3Yesu wa ciɓa ge, “To mi cei pma lo ma nyafye ɓoho ce.
4“Fye gna mi Yohanna iko batizma zhin nya mwa, kwo ɓei gmi n Shekwoyi aba nu ko ka n azanyikwoci aba?”
5Ɓa zhin nubo ɓa cige, “N ya ciwo ge n Shekwoyi aba, to, wa nya yi ge kni nu ɓei zhin to ya gawo gaiciya ma? 6Amma n ya ciwo ge n a zan-yikwoci aba nu, to, a zaye n ɓa zhi laɓa nyi, ɓa kniya akuta n sa, ntuge ɓa n gaiciyai galo ge Yohanna ɓei zhin anabi nu.” 7Ntuce nu ɓa ciwo ge, “Yita kpe abalo n wo iko ɓei gmi m.”
8Yesu wa ci ɓa ge, “To mita gnafye ce aba n mi iko gmi mi-i zhin aɓoye pya m.”
9Nsayi Yesu wa gna aza misali ye wa cige, “Ozaho ɓei nufwa wa ga akodogo da nge ɓa zhinwo aba, owohin ce wa laka wa lo ozan n kpai har wa mwasa. 10Shi wo ɓei zhi, wa tnu owo fyenu ho nge wo lo akodog da yi aba, woi gwo ampanyi ɓe n cei n ɓaɓei bwa n ofwayi. Amma akodogo da yi ɓa wan fyenu yi ɓa luwo ɓa jewo zeya ntna nyaho. 11Nsayi maigida yi waje fyenu ho tnu. Amma a kodogo da yi ɓa wan wo ɓa luwo sosai, ɓai zhin wo aɓo nkwoto kamata m, ɓa jewoze ya n tna nyaho. 12Nsayi maigida yi wa tnu n fyenu tahi. Amma a kodogo dayi ɓa jewowan ɓa luwo ɓa shewoya shi lonu n tna nyaho.
13“Nsayi maigida yi wa zhin nubo wa cige, ‘Miɓa zhin wunaʼa? Miɓa tnu nmi ɓiyi. Ai shiɓa ɓo gye wo ɓato ɓei zhin wo nyaho m.’ 14Amma shi akodogo dayi ɓei gye wo, ɓa cige, Owoɓi nu ɓeya sosai nya. Yi la wo wu ntuge n ya wu wo, anyagye vinya ɓaku ze eyi nya nu. 15Ntucenu ɓa wan wo ɓa shewoya shi n of-wagbe ɓa wun wo. Nsayi Yesu wa nyaɓa ge, ‘To Maigida ye ɓa zhin kni nu n akodogodayeʼa?
16“ ‘Ai ko zhin dole nu waɓe wa wu azeye vinya, wa ga zado ofwa ntuge ɓa zhin wo aba.’ ” Shi aza ɓei wo lonu ɓa cige, “Shekwo to ye ya zhin aɓeye pya m”.
17Nsayi Yesu wa shiɓa wye wa cige, “To Littafi da kniɓeyi nu ge, Kuta n anyakun miyi taye m, okonu laze kuta bwakonu nya? 18Ozaho-zahoi wa ce bonyi n kutayi wo ɓa bmaya, amma ozaho-zahoi nkutayi kwa kayatu wo, woɓa viya dugu-dugu.”
19A pirist dnagmai ɓedo n amalami ɓei cei pma ntuge ɓa wan wo, gni nu abayi ntuge ɓa ɓei cei kpe ge aɓo vinya n Yesu ɓei da nyi, wo ɓei datu n ɓa tukwo nu. Amma ɓa wo aza dna n mwa.
20Ntucenu ɓa zhi ɓai dna esa manayi wye. Ɓa tnu azaho ntuge ɓa lo ɓai nya Yesu aɓo, ngye aza manayi n nabai n Yesu ɓa da ɓoho nukwoyi n nabai ɓa lo n woi n a sheria ba. 21Azayi n aɓei tnuɓa nyi ɓa lo ɓa nya Yesu ge, “Malami, yi kpelo ge anya vinya n ho da hoi wu aza nyi gaiciya nu. Yi kpelo ge hota wo oza dna m, amma ho da gaiciya cici. Hoi da nya n Shekwoyi ye ntuge aza ɓa zhin. 22Gnayi kwo bmiya lo ya gba a Romayi godu ko kwa yito gba ma?”
23Amma Yesu wa ku oɓa ɓemwi kpe wa ciɓa ge: 24“Fye wumi agyiwye ho.” She ɓa ɓei wu wo wa nyaɓa ge, “Nyikado hoto ɓedo n eyei nu tuya?” A cige, “Esu Roma nya.”
25Nsayi Yesu wa ciɓa ge, “To, Fye ga Esu Roma nya enya ko zhin owo nya. Nsayi fya ga Shekwoyi enya n kwo zhin Shekwoyi nya.”
26Ɓato ɓei mi ɓa wan wo gniɓo n azaba m, ntu cenu ɓaku ce pi cei wo ɓa shi wo ɓei gaɓa amsa n wu.
27A Sadukiyi ho ɓa ɓe Yesu aba (Eɓanu ɓei zhin ɓai cige, azafi kalaku to lo m.) Ɓa nyawo ge. 28“Mallam, Musa ɓei gayi wyidna ye ge, Nza fi wa fa owo nyikwo gni ntna ɓi, to, owo mado wa la nyikwoyi ntuge wa bwa oɓi n woi ga owo dnagma.
29“To, ko ɓei zhin lonu n aza ngun tnaba. Oɓa dnagma vinya wa la nyikwo amma wa fi to woi bwa oɓi m. 30Ntucenu owo mado n wo ɓei yatu wo nyi, wa la nyikwoyi. 31Har oza tayi har oɓa ngun tnaba lonu, zaho-zahoi nɓa wa ku mula pa n nyikwo yi, aku fi to ɓai bwa ɓi m. 32Nyikwoyi wa ɓe wa wonya fi ce.
33“To, ewyi n aɓei ku azafi kala ma, wo ɓei zhin nyikado nyikwo nuʼa? Gama oɓa vinya ɓei ku mula pa n woi.”
34Yesu kwa wa ciɓa ge, “Aza n ɓa fi n anyimiye nyi, ɓa zhin ɓa pa mula. 35Amma aza nɓa ɓei kuka n vingwo nyi nɓa ku kunce ntuge ɓai bwa wye-wyei n anyi deyi ɓato ɓei pa mula m. 36Ɓa wu ngye amalaika nu ɓa ta mi ɓa shan fi m. Ɓa zhin Shekwoyi aɓi nu ntuge ɓala kuka n vingwo.
37“Amma ntu fye ɓo nya ɓo, ko efi kalaku lo. Musa ɓei ku wufye dei-dei nge aku aza kala vingwo, ntuge ɓa bwa wye-wyei nu. Aba n Musa nabari kafilo woi gni n aba ena ɓei kpe n gbe-gbe amma to koi gyi na nyi m, wa cige Shekwoyi zhin Shekwoyi Ibrahim nyanu ɓedo n Ishaku yi ɓedo n Yakubu yi. 38Deye kwa wu ge wo zhin Shekwoyi aza wye-wyeyi nya nu. Toge aza fifiyi nya m, ntuge aza vinya ɓa n wye-wyei lo n Shekwoyi aba.”
39A malami ho n ɓa ɓei zhi ɓo ɓa cige, “Malam ho la ɓo dnagbe dai-dai.” 40To aza shan wo ɓenya njesun n sayi m.
41Yesu kwa wa nyaɓa ge, “Aɓa mi a ci n wuna ge Masifu wato Kristi wo zhin Dawuda yawyi nuʼa? 42Ntuge Dawuda n wohin tukwo wa ci dna n Zabura ge, Dagayi wa ci omi Dagayi ge, La sase tu n mi bwazhe bwa. 43Sai miku oho anuwuyi ze oho apita kpe ɓa, ɓa ye fi n ho apita sinta.” 44Wato Dawuda ɓei yi wo ge Dagayi nu. To Masihu ɓa zhin Dawuda yawyi n wuna? 45Esanu aza ɓei zhi ɓai knawo ɓeda tnubua waci owo abara ge, 46Fye zhin peceiye n ɓa Yahudawa malami yi n ɓa cei pma ɓa lo n aje dnagmai kpe nyi, ɓa cei pma a ɓi ɓa gna n mwa-mwai gni n gniko gbe. Ɓa zhin ɓa sase kpe n aba manayi nu n aduwa nyakun ɓedo n abai n aza zhi ɓai zhin agmada. 47Ɓa zhin ɓa zhin aduwa n mwakpa, n mwa-mwa gayi, ɓa ngbayi shi ɓa gyi anyigbayi fi, ɓa gwo ɓa duciya. Oɓa ta-ta ɓei la mwa.
Currently Selected:
Luka 20: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.