Luka 11
11
Aduwa Zhin N Gyi-gyi-yi
1Nwyihoi sanu Yesu ɓei lo woi zhin aduwa. Owo abara ɓa ɓe ɓa ciwo ge, “Wu yi shi yi ɓa zhin aduwa nwu shi Yohanna ɓei wu wo abara nyi.”
2Aduwa yi nyi n wo ɓei wu ɓa nyi. “Dada, ala ohoye tu ntuge kwo gyi-gyi yi lo. Ha tnu nho bemi safyewyi. 3Gayi nyagyi fyegyi-gyegyi. 4Ha zhin yi gafara gama yi ku zhin aza nɓa zhin yi laifi nyi. To ye ge ya lo jaraba m.”
5-6 Wa godiya wa wuɓa n misali ye ge, N ha lo oho nugundo puwa n sadu yi ntuge hoi gwo ezhe ho ɓei ciwo ge, “ai miku azhiɓeyi bwa n sai ye mi to nyahoi lo n mi a ga ɓa m.” 7Amma wa dna n nyakun mi wa cige, “Kai to kun mi agyewyi ya m. Ai mi la aba gu, yi ku wagye vinya. Mi ta mi ma bma ho zhin m.”
8Amma ma gna ho gaiciya ko shi ko nyi wo ta ɓe wa gaho ntuge ho zhin wo nugudo m, n ho to fa aba lu ɓo m, sai wa ɓe ntuge ho la wo gyi ce. 9Kwo wu lonu n aduwa yi, Nya ɓo cici, ho ɓa bwa cici ce, zanyi cici, ho ɓa gye wye, lu aba aɓa guho ya. 10Zaho-zahoi n wa nyaɓo wo zhin wa bwa. Oza nwa zanyi wo zhin wa gye wye. Oza n wa lu aba azhin a guwo ya.
11“Ofye adada, n fye aɓi nya fye bredi ɓo fye zhin fya ga ɓa kuta? N wa nya wyesala ɓo, fye zhin fya ga ɓa awa?
12“N wa nya ezhe ɓo, fye zhin fya gawo napisi? Awo.
13“Ngye alaifi da zhin ɓa ga oɓa ɓi enya nɓa ye, ai ofye Dada n wo tu she nyi ɓa zhin lo nu ce, har wa ga aza n ɓa vi wo nyi Zafun Gyi-gyi-yi.”
14Nwyihoi Yesu wa kun alijenu ya n zaho n wo to ɓo mi n ɓedam, Har wa mi woi daɓo, ceʼa wo aza. 15Amma azaho ɓa cige, “Ai wo gwo wo ikwo n Shetam nu n wo zhin alijenu esu nyi.” 16Azaho ɓa nya ge ga tuze ho n she, nabai kwa wu ge wo zhin Kristi nu.
17Wo ɓei kpe zaho-zahoi bugba ye wa cige, Ebe n kwo sun kun n kwohin yi to, kwo ta migni m. Puwa njesun nkwo wu anya cici ko ta migni m. 18Ntucenu ngye ɓo fya da nyi kwo zhin gaiciya nu, ngye mi gwo ikwo n shetam nu, mi kun alijenu ya to, shetam puwa ɓa migni n wuna? 19Amma ngye shetam nu gami ikwo to ofye aviyi ma gama ɓa zhin ɓa kun alijanu ya! Fye gye ge ɓa gwo iko n shetam nu kwo? Fye nyaɓa ngye fye da gaiciya nu. 20Amma ngye mi kun alijenu ya n Shekwoyi ikwo yi nu, to kwa wu nu ge Shekwoyi ʼbe mi la ɓe.
21Gama Shetam zakala da, wo zhin wa zhin owa ba gadi n wohin, nyaho ta to ɓa bwa m. 22Saidai zahoʼa ɓe n du wo na kala, n dabarai du wo nya, wa sun kun n woi har wa gyi wo, wa gwo wo akun kaya vinya.
23Zaho-zahoi n wo to zhin mi nya nu m, wo zhin mi nuwun yi nu. N wo ta bma mi zhin lo m, wo gna mi anya mi nu.
24Sanu na kun alijanu ya kwo zhin kwa lo zhabui koi zan a sun-sun ba zanyi, amma nkwoto bwa m, kwo zhin kwa jeze ɓe aba nkwa gmi nyi. 25Sanu ko gye okwo puwa sapai nya gni n bmiya n tna zaho dna yi, 26Ko zhin kwa lo kwa ɓe n alijenu hoi, ngnu tnaba n dukohin n nukwoyi ɓa lofi n zahi mi. Zahi wonu kwa wo zhin wa gna wunya ndu sapai.
27Sanu wo ɓei gni wo ye da ɓo, nyikwoza ho wa gmi begye ya wa cige, “Shekwoyi wo tu ohoʼya anabarka, nubo n ho ɓei gmi n kwo, ɓedo n ɓeɓe yi n ho ɓei ye nyi.”
28Yesu wa cige, “I amma anabarka gna tulo n aza ɓa wo mi ɓeda ɓai zhin kwo nyi.”
29-30 Sanu aza ɓei ɓe ɓai yece wo, wa zhin ɓa waʼazi ye, Esa nukwoyi nu, aza nukwoyi lo njesun. Ɓa nya ɓo cici ge mi wu ɓa tuze nshe. Amma nya n mi ɓa gna ɓa gmanyi kwonu zhin oɓo wo-woyi, ngye shi kwo ɓo zhin Yunana nyi, kwo ɓei wu a Niniva yi ge Shekwoyi ɓei tnu wo. Emi nya ɓa wu ce ge Shekwoyi nu na tnu mi.
31Amma n wada wyi sarauniya sheba ɓei la aza zunkni nɓa fi n esa ye nyi. Gama wo ɓo ku zan-zan n mwakpa ntuge wa wo Solomon ɓeyekpe. Amma Solomon doduyi gni nyi ya (fye ta wo wo lo m.)
32A Niniva yi kwa ɓei zun aza kni n ɓa fi n esa ye nyi. Gama ɓa ɓei ku abu ye sanu Yunana ɓei zhin ɓa waʼazi nyi. Amma Yunana doduyi gni lo ya (fyei ta wo wo lo m.
33Zahozahoi to lo n wo dna fitila na, wa kwo bwi dna m. Amma a zhi a yakwo tu pei-pei nu, n nabai kwa ga aza buzangna. 34Ofya wye nu zhin ɓa wu bugba buzangna. Awye gyi-gyi-yi zhin ɓa ga buzangna n fye wyewyeyi. Amma awye anukwoyi da zhin ɓa buzangna gu har kwa zhin za wa lo dna wyema. 35Ntu cenu fye to ye ge, ala nyipyeyi buzangna gu fyem. 36N fya bugba n buzangna yilo, aɓa gyekwo n fya wyeba har efya wyeba ɓai bmiyana.
Aɓeda Shanwoyi Ga Akwocednayi
37-38 Sanu wo ɓei gni wo ye daɓo, Farisiyi ho wa yi wo lo owo puwa cei ntuge wa gyi nyagyi. Sanu Yesu ɓei si, wa sase wa gyi nyagyi to woi na bwa m, (ngye shi ɓa zhin ɓa shin zhin) Sai ɓa gyi minagyi nzai n wo ɓei yi wo nyi.
39Amma Yesu wa ciɓa ge, “Ofye a Farisiyi fye zhin fya zhan obmi sarai amma ofye mi tu cegye lo ngye ʼvun. 40Aza gbelo, Shekwoyi nu to zhin omi, wa zhin obmi m? 41Azhin a wu gyigyi, a wu n ye-ye nu. 42Amma aiya nfye aba a Farisiyi, gama kwo shi ko nyi fye zhin fya zhin zakka sosai nya, amma fye ku gaiciya zhin zamwi n Shekwoyi ye-yeyi. Fye zhin zakka amma fye to fa aɓo aje zhi, n tna zhin yi m.
43“Aiya n fyei a Farisiyi, gama fye ye aba manayi n aduwa nyakun, n na zagnaɓi n bmi laɓa du n gnikwo gbe, nkwo ɓe fye n mwamwa nyi. 44I, wada yakwo lo kwoi pmi fye, gama fye wu ngye avingwo nu n ɓa ku bwiwye. Aza laɓa n fyei, to ɓai kpe ɓenukwoyi ye nkwo so dna lo m.”
45Malami dnagmayi ho wa ciwo ge, “Shekwo mwasa, ai ho ku mi kni akmi dna n mi tnu-tnu.”
46Yesu wa cige, “Eh, aiya tulo fye ce, gamafye zhinfya ga az wyidna nɓa ta mi vi m, amm ofyehin ta mi fya vi ko m. 47Aiya n fyei, gama fye wulo dai-dai n fya dada yi, n ɓa ɓei wu anabi laɓa any nyi.
48“Azawu-zawuyi, gama fye ku y nfya dada yi ge, nya n ɓa ɓei zhin nyi Ko ɓei bmiya. Ai fye ɓei ɓa zhi lonu n fyehin. 49Onya nyi Shekwoyi wa da nfye tukwo, ‘Mi ɓa tnu fye n anabi yi ɓedo n aza hoi Amma fye ɓei wu ɓa har fyei ny adoho ya.’
50“Ofye aza esa ye nya kwa Shekwoyi ɓei nyafye dalili kwa zhi fya wu aza tu nyi n anyi zhin sa yi. 51Nyakwa laka n Habila fi h kwalo Zakaria n wo ɓei fi dna n aduwa nyakun nyi, Shekwoyi ɓei nyafye ʼɓa ɓo.
52“Aiya n fyei nfye kpe Shekwoyi ɓeda ye nyi, ntuge ye la gaiciya bwi shi. Fye ta go kwo nfye hi m, amma fye ta ye lo ge azaje ɓa gwo m.”
53-54 A Farisiyi n a loya yi wato aza n ɓa kpe owa, ɓa ku gyi minagyi. Daga sayi ɓa nya wo aɓo barkatai nabai wa zhin kuskure ho har ɓa wan wo.
Currently Selected:
Luka 11: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.