Zakaráya 4
4
Ọwhulenya, Zakaráya whụru lẹ nke iwhe l'aatukobeje oryọku
1O noo ya, Ojozhi-imigwe ono shi ekfu eyeru mu bya abya ọdo bya etee mu g'ọo onye e teru lẹ mgbẹnya. 2Ọ jịa mu sụ: “?Ọo gụnu b'ị whụru?”
Mu sụ iya lẹ mu leru ẹnya, iwhe mu whụru bụru iwhe e meru lẹ mkpọla-ododo, l'aatukobeje oryọku, iwhe tukoru iya l'eli bụru ochi l'eeyeje mmanụ oryọku, oryọku, a tukoberu iya dụ ẹsaa, oryọku ono nweru ụzo ẹsaa, l'aagajẹ iya oghu. 3Iwhe gvuru lẹ mgboro iwhe ono, l'aatukobeje oryọku ono bụ oshi ólivu labọ; nnanụ bẹ gvuru l'ẹka-ụtara ochi ono, nnanụ gvuru iya l'ẹka-ịcha. 4Mu bya ajịa Ojozhi-imigwe ono shi ekfu eyeru mu sụ iya: “?Ọo gụnu dụ nno onye-nwe-mu nụ?”
5Ojozhi-imigwe ono shi ekfu eyeru mu bya eyeeru mu ọnu sụ: “?Tị madụ iwhe iwhe ono bụ?”
Mu sụ iya: “Mu ta amakwa iwhe ọ bụ onye-nwe-mu nụ.”
6Tọ dụ iya bụ, ọ sụ mu: “Ọ waa bụ okfu Onye-Nwe-Ọha l'ekfu eyeru Zerúbabelu: ‘E te emekwa iya l'ọkpehu, t'e me iya l'ike; ọ kwa Ume mụbe Onye-Nwe-Ọha b'e gude eme iya.’ O nokwa iwhe Onye-Nwe-Ọha bụ Onye-ishi-igwe-ọgu l'ekfu ndono. 7Gụbe eze ugvu ono, nọ-chiru ụzo, ?ị bụ gụnu? L'iwhu Zerúbabelu bẹ l'aa-rwazekota ghu arwaze, gụ abya adụ barịkiti. Zerúbabelu l'e-dobe ẹwhuru mkpochi-ishi iya; a tụlahaa ụzu sụ: ‘Eze-iwhe-ọma emeeru iya-o! Eze-iwhe-ọma emeeru iya-o!’ ”
8Okfu Onye-Nwe-Ọha bya erwua mu nchị sụ: 9“Zerúbabelu bụ iya gude ẹka iya gbube ukfu eze-ụlo Chileke-e ya nụ, ọ bụru iya l'e-gudekwawho ẹka iya tụfu iya l'ishi. Nteke ono unu amarụ l'ọo Onye-Nwe-Ọha, bụ Onye-ishi-igwe-ọgu zhiru mu tẹ mu byakfuta unu.
10“Iwhe l'oo-me ntaa habekwaa nwahabe l'ẹnya ndu madzụ. Ọle ẹhu l'a-tsọ whẹ ụtso mẹ whẹ -whụlewho ẹwhuru, Zerúbabelu gude atụ ụlo ono l'ẹka iya.
“A bya l'oryọku ẹsaa whọ; oryọku ẹsaa ono bụkwa ẹnya Onye-Nwe-Ọha, tụkoru mgboko l'owhu elekota.”
11Mu bya ajịa Ojozhi-imigwe ono sụ iya: “?Ọo gụnu bẹ oshi ólivu labọ ono, gvuru l'ẹka-ụtara mẹe l'ẹka-ịcha iwhe ono, l'aatukobeje oryọku ono fụtaru?” 12Mu jịkwa ọdo sụ: “?Ọo gụnu b'ọ fụtaru mbụ ẹkali oshi ólivu labọ ono dụ lẹ mgboro uji labọ ono, e meru lẹ mkpọla-ododo, mbụ ẹka ono, l'eeshije amịshi mmanụ?”
13O yeeru mu ọnu sụ mu: “?Tị madụ iwhe iwhe ono bụ?”
Mu sụ iya: “Mu ta amakwa onye-nwe-mu nụ.”
14Ọ sụ mu: “Iwhe ono nọ-chiru ẹnya ụmadzu labọ ono a wụru mmanụ l'ishi tẹ whẹ jeeru Onye-Nwe-Ọha, bụ onye nwe mgboko ozhi.”
Currently Selected:
Zakaráya 4: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
