Egvu-ọma 22
22
Egvu-ọma, Dévidi deru nụ onye ishi egvu, t'e gude olu egvu, l'eekuje “Ele Ishi-ụtsu” gụa ya
1Chileke mu, Chileke mu,
?ọo gụnu meru g'o gude ị haa mu nkụnyi mu?
?Ọo gụnu meru g'o gude i je anọdu
mu otẹnya, haa mu adzọfuta?
I je anọdu t'ị ba anụ ude, mu l'atsụ?
2Gụbe Chileke mu, eswe l'ẹnyashi bẹ mu l'aryakuje ghu,
ole ị tịi zajẹdu mu, obenu lẹ mu ta
anọnyajedua dobe ọnu ndoo.
3Ị dụlekwaa nsọ g'ị dụ iya,
mbụ gụbe onye eze, ndu Ízurẹlu l'anọje aja ajaja.
4Ọo ghu bẹ nna anyi whẹ dakoberu,
Whẹ dakoberu ghu, ị nafụta whẹ.
5Whẹ ryakuru ghu, ị dzọo whẹ.
Whẹ dakoberu ghu, ti kpu whẹ iwhu lẹ ntụ.
6Ọle mbẹdua bụ mgbashiride, mu ta abụdu madzụ.
Ụnwu eliwhe l'egudeje mu eme iwhe ọchi,
t'ọ dụ iwhe madzụ gụberu mu.
7Iwhe bụ ndu whụru mu nụ l'anọje aja mu ewenu,
anyarụ mu eze, ekwe l'ishi l'ishi achị mu ọchi, sụ:
8“Ọ kwa l'ọ sụru l'ọo Onye-Nwe-Ọha bẹ ya dakoberu.
Ngwa, tẹ Onye-Nwe-Ọha ọbu nafụtanu iya.
T'ọ gbafụtanu iya, eshi-ọwhu ọ sụru
lẹ ya dụ Onye-Nwe-Ọha l'obu.”
9Ọle ọ kwa ghu-a kufutaru mu
l'ẹwho ne mu, bụru ghu meru, mu
dakobe ghu, nkeshi nteke mu l'angụkwadu ẹra.
10A nwụru mu bya ekuru mu ye ghu l'ẹka.
Eshi nteke mu nọ l'ẹwho ne mu b'ị bụhawaa Chileke mu.
11Ba anọdukwa mu otẹnya nkele nsogbu nọkwa mu ndẹende.
Mu te enwe onye l'a-gbarụ mu mkpu.
12Ndu ọhogu bẹ nọ-wheru mu
mgburumgburu g'ọo igweligwe oke-eswi.
Whẹ gbarụ mu mgburumgburu g'ọo
oke-eswi ndu Báshanu, l'eme ẹnu.
13Whẹ sageeru mu ọnu whalaa
l'abyakfuta mu g'ọo oduu, l'agbọ
ụja ejekfu anụ, l'oo-gbu taa.
14Nke mu gvụakwaru g'ọo mini, a wụshiru awụshi.
Ọkpu mu gbụghashihu, tọ dụ ọwhu dzekfuru l'ibe iya.
Ntaa bẹ meji tọfuwaru mu, ọ zawaru nza g'ọo ẹ̀bà-eke.
15Ike gvụwaru mu; ụvo ta adụhe mu.
Ire nyakụwaru mu l'akpo.
Ị tọgbowaru mu l'ivovonyi tẹ mu nwụhu.
16Nkụta nọ-whewaru mu mgburumgburu.
Ikpoto ndu l'eme
ejo-iwhe gbawhewaa mu
mgburumgburu, kpọ-fushia mu ẹka yẹle ọkpa.
17Ntaa bẹ ẹgara l'agụwa mu ọgu.
Ndiwhe tụkowaa chịru ẹnya wụbe mu, ele mu shishishi.
18Whẹ l'eke uwe mu l'onwowhe l'onwowhe,
a bya l'ọwhube uwe ọwhu mu l'eyeje l'ẹhu,
whẹ l'atụ ido tẹ whẹ marụ onye l'a-chịta iya nụ.
19Byiko, gụbe Onye-Nwe-Ọha, ba anọdukwa mu otẹnya.
Gụbe mkpakọ ike, mu nweru,
bya ẹgwegwa bya agbaarụ mu mkpu.
20Nafụta ndzụ mu t'e be egude
ogu-ịgba whụa mu awhụwhu.
Nafụtaro mkpakọ iwhe ono,
mu nweru ono, bụ ndzụ mu, tẹ nkụta ba atakashị iya.
21Jiko, dzọfutanu mu l'ọnu oduu-gburu-agụ,
mẹe lẹ mgbaku mpu atsụ.
Eshi-ọwhu ị zawaru mu oku,
22bẹ mu l'a-rya ẹwha ghu aryarya
t'ụnwunna mu whẹ nụ-dzuru iya.
Mu anọdu l'edzudzu-ọha jaa ghu ajaja.
23Unubẹ ndu l'atsụ egvu
Onye-Nwe-Ọha, unu jaa ya ajaja!
G'unu ha bụru ẹpa Jékọpu, unu kwabẹje iya ugvu!
Unubẹ ẹpa Ízurẹlu l'owhu, unu bajẹru iya ẹja!
24Nkele onye iwhe-ọtsulanu byarụ
bẹ l'ooto legbujedu l'ẹnya,
ọ tọo gbangojedu onye
iwhe-ọtsulanu byakfutaru, tọ gbẹjeru iya azụ,
ọonuje-chia olu, o gude chiku
iya lẹ mkpu t'o yeru iya ẹka.
25Mu l'a-nọdu l'edzudzu-ọha jaa
ghu ajaja nke iwhe i meru.
Ọo l'iwhu ndu l'atsụ egvu ghu bẹ
mu l'a-nọdu mekota iwhe mu riburu lẹ nte ememe.
26Ndu ụkpa bẹ l'e-riji ẹwho.
Ndu l'achọ Onye-Nwe-Ọha bẹ l'a-ja iya ajaja.
“Tẹ ndzụ unu bụkwaru ojeru-ojeru!”
27Mgboko l'owhu jeye ẹka o jeberu
l'e-megee nyata iwhe nwụru nụ.
Whẹ adakọbe lwakfuta Onye-Nwe-Ọha.
Mbụ, l'iwhe bụ ikfu, dụkota
lẹ mba gẹ mba ha bẹ l'e-megee bya abakọtaru iya ẹja.
28O noo nkele ọo Onye-Nwe-Ọha
bẹ iwhe lile kụru ishi l'ẹka,
ọ bụru iya l'achịkota ndu mba lile.
29Iwhe bụ ndu nweru iwhe lẹ
mgboko-o bẹ l'e-bechakwaa bakwaaru iya whọ ẹja.
Madzụ l'owhu, bụ ẹja mmaanụ
l'e-megee gbua ikpere l'atatiwhu
iya, mbụ madzụ ono, l'a-nwụhu anwụhu.
30Ọgbo, nọ l'iwhu l'e-jeru iya ozhi.
Ọgbo, l'a-bya nụ bẹ l'aa-kọru akọ Onye-Nwe-Ọha.
31Aa-ryarụ iya ndu l'ẹteke anwụa
lẹ Onye-Nwe-Ọha dụ chịriri.
Ọ bụru iya bẹ tụkoru iwhe ono g'ọ ha mekota.
Currently Selected:
Egvu-ọma 22: Ezaa
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
