Egvu-ọma 18
18
Egvu, Dévidi, bụ onye ozhi Onye-Nwe-Ọha deru nụ onye ishi egvu
Egvu-a b'ọ gụru gude kele Onye-Nwe-Ọha mbọku, ọ nafụtaru iya l'ẹka ndu ọhogu iya swịikpamu, ọ kagezhia nke Sọlu
1Mu yeru ghu obu, gụbe Onye-Nwe-Ọha.
Ọo ghu bụ ike mu.
2Ọo Onye-Nwe-Ọha bụ
eze-ẹwhuru nkemu,
bụru ụlo-ozeru-ndzụ mu,
bụkwaru iya whọ l'anafụtaje mu.
Ọo Chileke mu bụ oke-ẹwhuru mu,
mu l'agbabajẹ je ezeeru ndzụ.
Ọo ya l'egbochitaje mu, bụru iya
l'egudeje ọkpehu iya dzọo mu.
Ọo ya bụ ụlo, shihuru ike, mu
l'agbabajẹ je edomia onwomu.
3Ọo Onye-Nwe-Ọha ono, bụ onye
ọ gbarụ t'a jaa ajaja bẹ mu
l'akpọ-kuje, ya adzọfuta mu l'ẹka ndu ọhogu mu.
4Anwụhu bẹ tụwaru mu kpakparị l'olu.
Ọ-la-l'iswi sọ-kputawaa mu g'ọo utso.
5Alị-maa bẹ tụwaru mu kpakparị l'olu.
Anwụhu gbabẹwaru mu ọnya.
6Nteke mu l'eje iwhe-ọtsulanu
bẹ mu kpọ-kuru Onye-Nwe-Ọha.
Mu ryakuru Chileke mu t'ọ gbatarụ mu.
Ọ nọdu l'eze-ụlo iya nụa olu mu.
Mkpu-ẹkwa, mu chikuru iya rwua ya lẹ nchị.
7O noo ya, mgboko tehu nmẹkenmeke, nmahụ jijiji.
Ọkpa ugvu nọnu nmawokota
anmawo, tekota nmẹkenmeke,
nkele Onye-Nwe-Ọha bẹ ẹhu l'eghu eghu.
8Ẹnwuru ọku shi iya l'imi l'ekpo tụtutu.
Ọku, shi iya l'ọnu l'enwu tawhutawhu.
Icheku-ọku, shi iya nụ l'ata kfụkfukfu.
9Ọ dọjahu akpamigwe tarakata, gbazeta.
Urwukpu, gbarụ tsụrikiti nọdu iya lẹ mkpula ọkpa.
10Ọ nọdu l'eli cherubu whefu.
Ọ bụru l'akwẹka whẹrewhere b'o begoru ewhe pẹepee.
11O gude ẹkpuroochi kpuchia onwiya,
mbụ l'urwukpu, mini jiru ejiji
bẹ nọ-wheru iya mgburumgburu.
12Urwukpu mẹe aka-mini
mẹe icheku-ọku, l'ata
kfụkfukfu shi l'ogbu-zaazaa ya agụshihu.
13O noo ya, Onye-Nwe-Ọha shi l'akpamigwe gbaa
egbe-igwe tarara, a nụa olu onye ono, bụ
Ọkalibe-Kangokotaru-Nu, bya
awhụa aka-mini mẹe icheku-ọku, l'ata kfụkfukfu.
14Ọ gbarụ akfụ iya gude chịkaa ndu ọhogu iya.
Ọo ebemu-igwe b'ọ waru whoo,
whẹ tsu l'ọso gbakashịhu.
15Gụbe Onye-Nwe-Ọha zhiru
ume whaa baarụ ndu ọhogu
ghu mba, eze ẹnyimu kekahu
ẹbo, a whụkota akpakpamara alị iya ẹnya,
ntọlali mgboko daburu ebedere-badara.
16Onye-Nwe-Ọha shi l'imigwe tụfu ẹka zụ mu gburumu,
gụfuta mu l'ogbu-mini.
17Ọ nafụtaru mu l'ẹka ọhogu mu, ọkpehu l'anya kfụukfuu,
nafụta mu l'ẹka ndu mu dụ ashị,
o noo nkele whẹ kariru mu ẹka.
18Mbọku ono, mu nọ
l'iwhe-ọtsulanu bẹ whẹ yebutaru mu,
ọle Onye-Nwe-Ọha bụ agbarike mu.
19O kutaru mu dobe l'ẹka ẹhu l'a-bụru mu whororo.
Ọ nafụtaru mu l'ọgu nkele mu dụ iya l'obu.
20Onye-Nwe-Ọha buru mu obunggo nkele mu dụ chịriri.
O buru mu obunggo nkele ẹka mu dụ ọcha.
21O noo nkele ọ lẹwho ụzo,
Onye-Nwe-Ọha tọru bẹ mu l'anọje etso;
mu ta agbẹjeduru Chileke azụ, shi nno mee ejo-ememe.
22Nsọ Onye-Nwe-Ọha g'ọ ha bẹ mu
nwụbekotaru ẹnya eme iya ememe;
mu ta agbẹjedu azụ l'iwhe ọ sụru t'e mee.
23Ọ tọ dụ-zhidua ẹka ụta dụ mu l'ẹhu l'iwhu iya.
Mu sefukotaru ẹka mu l'iwhe dụ ẹji.
24Ọo ya bụ lẹ Onye-Nwe-Ọha buru
mu obunggo nkele mu dụ chịriri.
O buru mu obunggo nkele ẹka mu dụ ọcha l'ẹnya nkiya.
25Ndu yeru ghu obu bẹ l'iigoshije l'i yeru whẹ obu.
Ndu ụta l'adụa l'ẹhu bẹ l'iitii
mejedu iwhe l'aa-ta gụbe Onye-Nwe-Ọha ụta.
26Ndu obu whẹ gụru iwhoro bẹ l'iidobejeru obu iwhoro.
Ọle ndu ntuwhu bẹ l'iigbagbuje l'akọ.
27Ndu wozeru onwowhe alị bẹ l'ịinafutaje,
ọle ndu l'eku onwowhe gẹ whẹ l'ahaa bẹ l'iiwozeje alị.
28Ọo gụbe Onye-Nwe-Ọha l'eyejeru mu ọku l'oryọku mu.
L'iimeje t'iwhoro dụru mu l'ẹka gbarụ ẹkpuroochi.
29Mu l'a-dụ ike shi l'ẹka l'iiyeru mu tso ikpoto ndu ojọgu ọgu.
Mgbodo e gude tuwhee
mkpụkpu whẹ mgburumgburu
bẹ mu l'a-dụ ike nyia,
nkeshi ọwhu
ọbu mu lẹ Chileke bẹ lị nụ.
30Chileke-e, mu l'etso bẹ iwhe l'oome dụkota ree.
Okfu yẹbe Onye-Nwe-Ọha bẹ ntụpo l'adụdua ilile.
Oogbochitaje ndu gbabaru l'ime iya je anọdu ezeru ndzụ.
31?Oo onye ole ọdo bụbaa Chileke, m'a gụfu Onye-Nwe-Ọha?
?Oo onye ole ọdo bụbaa eze-ẹwhuru, m'a gụfu Chileke anyi?
32Ọo Chileke l'emeje t'ike dụ mu.
Ọ bụru iya l'emeje tẹ ntụpo ba adụ l'ụzo, mu l'eshi.
33Oomeje, mu eme kọrokoro g'ọo mgbada,
mbụ l'oomeje, mu akfụru kfụshia ike l'eli ugvu.
34Ọ zụru mu, mu marụ ẹnya ọgu,
nke ọwhu bụ l'ọ tọ dụdu m'o beru
ọ bụru akfụ, e kweru l'igwe, mu l'ẹte adụje ike gbaa.
35Ọo ghu Onye-Nwe-Ọha
l'egbochitaje mu, shi ẹgube ono adzọ mu.
Ọ bụru ike ghu bẹ l'iigudeje gbẹe mu ọkpu-ike.
Ọo ẹka, l'iiyeru mu meru, mu bụru oke amadụ.
36Iimeje ụzo mu, ya aha ọsa
nke ọwhu ọkpa l'ete echifu mu.
37Mu chịru ndu ọhogu mu jeye ẹka mu kfube whẹ.
Mu ta atsuwhudu azụ jeye nteke mu lakọtaru whẹ l'iyi.
38Mu chiru whẹ pyaapyaa, nke bụ
lẹ whẹ te nwedu agbashi ọdo.
Whẹ dashịru gbaagbaa lẹ mkpula ọkpa mu.
39Ọo ghu kwarụ mu ike l'ẹhu, mu gude jee ọgu.
I mee tẹ ndu ọhogu mu huaru mu ọnu l'alị.
40Ndu ọhogu mu b'i meru, whẹ
chee iwhu ichewhu gbalaa.
Ndu kpọru mu ashị b'i meru, mu gbushikota.
41Whẹ chiru mkpu t'a gbatarụ whẹ, tọ dụ onye dzọru whẹ nụ.
Whẹ ryakuru Onye-Nwe-Ọha, t'o yeru whẹ ọnu.
42Mu gweru whẹ ryaaryaa
mee whẹ, whẹ dụ g'ọo udzu-ẹja, whẹrewhere whekashiru.
Mu gude ọkpa nmaa whẹ
agbịdigba g'ọo ẹpoto, dụ l'echi-ụzo.
43Ị nafụtaru mu l'ẹka ndu l'etso
mu ọgu, mee mu, mu bụru
onye ishi mba lile, nke ọwhu ndu
mu l'eshia marụ bya alwakọta mu lẹ mkpula.
44Ọo anụnu, whẹ gude nchị whẹ nụa mẹka mu,
whẹ watalẹkwawho ome iwhe mu kfuru.
Ndu shi eshishi wata anọ ewhuzeru mu ishi l'alị.
45Meji bẹ tọfuru ndu ono, shi
eshishi, whẹ l'eshije l'ẹka whẹ
kwamiru onwowhe ezeru ndzụ,
whụru kwekwekwe byakfuta mu.
46Onye-Nwe-Ọha nọkwa ndzụ,
t'ọja-ama bụru nke yẹbe eze ẹwhuru mu ono.
T'e kutsee Chileke, bụ onye ono, l'adzọfutaje mu nụ.
47Ọo Chileke l'agwatajẹ ụgwo iwhe ndu ọhogu mu meru mu.
O meru, ụnwu eliwhe nọdu mu lẹ mkpula.
48Ọonafutaje mu l'ẹka ndu ọhogu mu.
Oowolije mu eli, woghaa ndu ọhogu mu.
Ọonafutaje mu l'ẹka ndu l'eme iwhe kpanganga.
49O noo g'o gude mu je l'a-kfụru l'iwhu mba gẹ mba ha
jaa gụbe Onye-Nwe-Ọha ajaja,
Mu l'e-gude egvu jaa ẹwha ghu ajaja.
50Onye eze, ọ họtaru bẹ l'oomeje t'ọ lwụ-gbua l'ọgu.
N-yemobu iya bẹ l'ọonoje egoshi onye ọ wụru mmanụ l'ishi,
bụ Dévidi mẹe eri iya jeye lẹ tututu-mịmimi.
Currently Selected:
Egvu-ọma 18: Ezaa
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
