Roma 16

Tē show hê yɛnɛ mo

1Ma sé nára a yin gwa mot Fibi de a sé mwât fwom ekilisiya e Kɛnkɛrɛya. 2Ma sé ha a yin, na yin a sey ɛ e ji rezâ Darwey e gwong de gwa jam yaga bemât Dagwi. Sɛlɛ hin hɛ e kagwɛ gwong de ê simo yi na yin, yaga yɛ a ga sɛlɛ bemat pyak mwa tanga me arɔng.

3Tang în Piriskila tanga Akwila show. Yɛn a sé besâ fwom hom yaga Kristi Yɛsu. 4Yɛn á kana yong ɛn na be ku yaga me. E me zɔng de me feng a yɛn wɛt, ko mwa be-ekilisiya bemât yére dyuk be feng a yɛn arɔng.

5Tang în bemat-raa de be manas e lɔ mɛn show.

Tang în sâ yey hom Ɛpainɛtus show. E yɛ wɛ de a tānga sey tsak o na Kristi e sevwêl Asiya.

6Tang în Marya show, yɛ de a ra fwom na gap mɛ mwa yaga yin.

7Tang în Andoronikus na Yunyas show. Yɛn a sé cáng hom yemo de yá kana sè e lɔ̂ ngyang tanga me. Yɛn a shǎl e ji betom Yɛsu, ko yɛn a tānga yel e gwông Kristi e ra me.

8Tang în sâ yey hom Ampilyatus show. Wot a sé sangal e ji nesa na Darwey tanga yɛ.

9Tang în Urbanus, sâ fwom mot yaga Kristi, tanga sâ yey hom Istakis show.

10Tang în Apɛlɛs show. Ba mara hɛ, ko a tumal gak na Kristi.

Tang în vemo de ba sé vê lɔ Aristobulus show.

11Tang în Herodyon, cang hom, show.

Tang în vemo de ba sé bemat-raa vê lɔ Narkisus show.

12Tang în Tirifaina na Tirifosa show. Yɛn beha vemo be ra fwom yaga Darwey na gap mɛn.

Tang în sâ yey hom Pɛrsis show, yɛ hwā de a ra fwom na gap mɛ mwa.

13Tang în Rufus, de a dal bwang o e de râ fwom yaga Darwey, tanga neng-gwɔ mɛ show. Neng-gwɔ mɛ mo á sè a me neng hom arɔng.

14Tang în Asinkiritus, na Fɛlɛgɔn, na Hɛrmɛs, na Patrobas, na Hɛrmas, tanga bwang begwa de ba sé tanga yɛn show.

15Tang în Filologus tanga Yulya, na Nɛrɛyus tanga gwa mɛ hwong o, na Olimpas, tanga mwa bemât Dagwi de ba sé tanga yɛn show.

16Tang în bemin show e gwong de gwo dura tɛ̂ yey min. Mwa be-ekilisiyâ Kristi be tang in show.

Neha ne yɛnɛ mo

17À begwa, ma sé shonong e ra yin, na yin a tē naka na vemo de be tɛ̀sɛ hin na yin a gas in na bemin, na be to tɛ̀sɛ pyɛ̂ negbang detidetu e gwông sêy tsak o min. Bemat o be ra repugu na basa de yin a ga basa hɛ. Sangal hin jaram yi na yɛn! 18Yaga yerê bemat vane be ra a Darwey mot Kristi fwom wɛt, ko yɛn e ra a cwey pyɛ́ de babek mɛn be simo fwom zɔng. Yɛn e kwɛlɛng bemat de ba mâk tɔk pyɛ́ wɛt yi na há rat tanga rwâk-nu de be vos ɛn mɛ̀. 19Kawɛ mwat a ga wok, yin e gyeng hâ Yɛgɛt Yat. Yaga ano, ma vɔk yey pyɛng na yin. Me simo yin a sè tsɛng-tsɛng e ra pyɛ́ de ya sé ryat; ko pyɛ min cak ye sè na pyɛ́ de ya sé vyes arɔng wɛt.

20Dagwi de e tɛ̀sɛ neyey bemat ne dyɛng a rɔda vey bagât wey na Shetan, na a tɛ̀ ɛ e nɛ̂n bol min.

Tik na Darwey mot Yɛsu a dura a yin nerat mɛ.

21Sâ fwom hom Timotawus e tang in show, mwa hɛn na Lukiyus, na Yasɔn, tanga Sosipatoros, yɛn de ba sé cáng hom.

22Me, Tɛrtiyus de ma sé mwat jɛ̂k bwok-rwang gwomo, me tang in show, yaga wot mwa wot a wuna nesa na Darwey.

23Gayus de e bɛrɛng me tanga mwa bemat-raa de be manas e lɔ mɛ e tang in show.

Ɛrastus, de a sé mwât bâng dyâm repomo, yɛ tanga gwa mot Kwartus be tang in show.

24[Tik na Darwey mot Yɛsu Kristi a dura a yin mwa nerat mɛ. Ano.]

Somo hê yɛnɛ mo

25Tik na wot a nɔ̂ng Dagwi nerey! Yɛ wɛ de e kyɛm a tɛ̀ yin a tumal gak e ji sêy tsak o min, sede remo de ma ha a yin jeng de ma shara Yɛgɛt Yat e ra Yɛsu Kristi. Ya to sé sede remo de pyɛ neyaang yane de ya sé mwin ya dura a wot wɛshɛrɛk arɔng. Pyɛ yane mo yà kana sè e lɛrɛ neshey pyak de na kwey. 26Ko a remo, bebok-basa de bezarap Dagwi bà kana jɛk ba tɛ̀ be tɔk pyɛ de ya sé mwin wɛshɛrɛk. Ko Dagwi wo neken gbak-gbak a nɔng nu na be dura a mwa yére bemât jey pyɛ mo, yaga na mwa bemat be sey tsak o na Dagwi, na yɛn a gyeng há mɛ arɔng. 27Tik na wot a nɔ̂ng Dagwi nerey, yɛ nju mɛ de a vɔk mwa netsitsɛ̂ng nesheneshey, yi na Yɛsu Kristi! Ano.

Currently Selected:

Roma 16: bomBI

Highlight

Copy