1 SAMUEL 1
1
Diona kadadianna Samuel
1:1-28
1Denmi misa’ muane dio mai Ramataim-Zofim, iamotu dio mai buntu Efraim, disanga Elkana, anakna Yeroham, anakna Elihu, anakna Tohu, anakna Zuf, misa’ to Efraim.
2Da’dua tu bainena, misa’ disanga Hana na misa’ disanga Penina; iatu Penina kianak, apa iatu Hana tae’.
3Tae’ nasalai ke taunoi tu tau iato sun lan mai kotana, ma’palurekke, la lao massambayang sia memala’ lako PUANGna mintu’ ma’dandan maritik dio Silo. Indeto dio den to minaanNa PUANG iamotu Hofni sia Pinehas, anakna dua Eli.
4Iato allo nanii Elkana memala’, naben tu taana Penina, bainena, sia lako mintu’na anakna muane sia baine.
5Apa iatu Hana napopanglokkon penduan tu taana, belanna nakamasei tu Hana moi Napatamanangi PUANG.
6Lendu’ duka ia napa’dikkinna sanglentekna, la umpakarede-redei, belanna Napatamanang PUANG.
7Susi bangmo to napogau’ Elkana, ke taunoi; ianna maleomo rekke banuanNa PUANG, napallaiomi tu penaanna Hana, naurunganni tumangi’ sia tae’ namorai kumande.
8Nakuami Elkana, muanena: E Hana, ma’apari ammu tumangi’ra sia ma’apari ammu manokara kumande? Sia apara bannangna anna masussara penaammu? Tang mandu losongra’ka te lako kalemu na iatu pia muane sangpulo?
9Iatonna mangkamo tu tau kumande sia mangiru’ dio Silo, ke’de’mi tu Hana; na iatu to minaa Eli unno’ko’ dao kadera sikandappi’ ampang banuanna PUANG.
10Belanna tarru’ masussa tu penaanna, mengkamoyami lako PUANG, anna unnade-ade tumangi’.
11Mangallonammi, nakua: O PUANGna mintu’ ma’dandan maritik, iake ma’dinni Mitiroi tu kamaparrisanna taummi sia Mikilalaina’ sia tae’ Mipaboko’i penaa tu taumMi, sangadinna la Mikamaseina’ misa’ pia muane, manassa la kusorong lako PUANG lan mintu’ allo katuoanna sia tae’ nala urrumbui piso peku’ku’ tu ulunna.
12Tonna masaimo massambayang dio oloNa PUANG, napemarangami Eli tu pudukna.
13Belanna ma’kada lan bang penaanna tu Hana, pudukna bangri tu ma’nemu-nemu, apa tae’ dirangi tu kadanna, iamoto anna sangai Eli malango.
14Nakuami Eli lako: Sangapa bangporoko la susi to malango? Torroiopi tu kamalangoammu.
15Apa mebali tu Hana nakua: Tae’ nasusito, o tuang, sangadinna aku te misa’ to tarru’ mapa’dik; tae’ angku iru’ uai anggoro’ ba’tu diiru’na tu melangona, sangadinna umbarrakanna’ mintu’ apa lan penaangku dio oloNa PUANG.
16Da nasangai tuang kumua to sala’ kedona’, apa diona kaselangangku sia kamapa’dikanna penaangku, iamoto angku masai kadake ma’kada-kada.
17Mebalimi tu Eli nakua: Male marampa’moko, na Kapenombannamora to Israel ungkamaseangko tu apa mupalaku lako Kalena.
18Nakuami Hana: Podo mitontong ungkamaseina’. Mangkato malemi tu baine iato anna kumande sule sia tae’mo narondon tu lindona.
19Tonna masiangna to millik kale’mi tu tau iato mai anna menomba dio oloNa Puang, anna sule lako banuanna dio Rama. Sangampa’mi Elkana tu Hana, bainena, sia Nakilalai dukamo PUANG.
20Iatonna agi-agimo sangtaun, ma’tambukmi tu Hana, anna dadian misa’ pia muane, nasangai Samuel, belanna, nakua: Iamote tu kupalaku lako PUANG.
21Iatu Elkana, muane iato, malemi ma’palurekke sola mintu’ to lan banuanna la umpennoloan pemala’ pentaunan sia pemala’ pangallonanna lako PUANG.
22Apa iatu Hana tae’ namale rekke, sangadinna nakua lako muanena: ianna sarak susumo te pia, aku la ussolanni, anna mennolo dio oloNa PUANG sia torro tarru’ daa.
23Ma’kadami tu Elkana, muanena, lako nakua: Pogau’mi tu apa musanga melo, torromoko sae lako musarakkinna; na PUANGmora umpasundunni tu kadanNa. Torromi tu baine iato umpasusu anakna sae lako nasarakkinna.
24Iatonna mangkamo ussarakki, nasolammi rekke sia umbaa sapi laki mangura tallu sia ta’pung sangepa sia uai anggoro’ sanggori-gori. Susimo kanasolanna tu pia iato tama banuanNa PUANG dio Silo; tonna tarru’ mangurapa.
25Natunumi misa’ tu sapi laki mangura iato namane umbaai tu pia iato lako Eli.
26Ma’kadami Hana nakua: La messimanna’, tuang, kukua: la lelukraka tuomi, nala lelukra kadangku tuang, kumua aku bangsiamote tu to bendan dolona sikandappi’ tuang, massambayang lako PUANG.
27Kupalaku te pia iate, anNa kamaseanna’ PUANG tu apa kupalaku lako Kalena.
28Iamoto la kusorong duka lako PUANG lan mintu’ allo katuoanna, belanna inang tisorongmo lako PUANG. Tukkumi tu pia iato menomba lako PUANG.
Currently Selected:
1 SAMUEL 1: SDA
Highlight
Share
Copy
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009