ISAIAH 50

Tengektap Israel

1Mwaei Kamuktaindet ne Toroor kole, mi ano parweetap pesyetap kamenng'ung', ne ki aoone ineendet? Anan ki aaldachok ng'oo ne yaacha? Ki kialdak amu yaitwogikwok, ak ki kioon kamenng'ung' amu pistaosyekwok. 2Kilya si ma piit chii ye ki anyoone? Kinga kuurse koma piit chii ne wolu? Tos kigonwagit eunnyu kot koma imuuch kotyach? Anan ma tinyei kamuget ne asaruunee? Keero, ateenyi nyanjet eng' kergong'yennyu, ayae ainoosyek koek surkwen: poldos njireenikwak, ak kobek eng' melelda, amu ma mi peek. 3Alaakyini kipsengwet tuindo, ak atuge kuniok. 4Ki koono Kiptaiyat Kamuktaindet ne Toroor ng'elyepta ne po icheeget che ki kineet, si kobiit anai ole agimiititoi eng' ng'aleek ineendet ne ng'etat: ing'eetisyei karonet age tugul, ing'eeta si kobiit agas ko uu che ki kineet. 5Ki koyaat Kiptaiyat Kamuktaindet ne Toroor itinnyu, ak ki ma angelel, anan atuktoochi patai. 6#Mat 26.67; Mar 14.65 Ki agoochi kobir patennyu piriik, ak agoochi matang'wekyuk icheeget che kiitut suumeek: ma aung'e togeennyu teweernateet ak che sing'iljino. 7Amu toreto Kiptaiyat Kamuktaindet ne Toroor; ma alilan anyun amu nooto: ki auuiit anyun togeennyu koigei rwandet ne uui, ak angen ale ma lilani. 8#Rom 8.33-34 Neegit ineendet ne iityina imanda; kibortosi ak ng'oo? Ngetononse tuwai: ng'oo punyondennyu? Ingonyo koriikyo. 9Ogeero, toreto Kiptaiyat Kamuktaindet ne Toroor; ng'oo ne igiikyino? Ogeero, osegitu icheek tugul ko uu ngoryeet; amei kiptorotyot. 10Ng'oo eng' okweek ne iywei Kamuktaindet ne Toroor, ne kase iit kutitap otwogindennyi? Ne wendote mesundeito, ama tinyei lapkeiyet, ingomang' kainetap Kamuktaindet ne Toroor ak kotiegei Kamuktaindennyi. 11Ogeero, okweek tugul che olaali maat, che ogermenegei kegenganik: obunote liplibenetap mang'wong', ak eng' kwenutap kegenganik che kaolaal. Onyooru niito kobunu eunnyu; oruitosi eng' arageneet.

Currently Selected:

ISAIAH 50: KAPR

Highlight

Copy

Compare