Roma 15

Yesu Wane Kop Okanŋem Ŋei Natne Edo Ŋonbi Menageyake

1Ŋene mali malipze togole pamaike, ŋedo ŋei zonomene midaine set pelek gemami, eŋe qesiŋ one, umatene teweke kau bisi ebukene. Ŋene ŋenzaneka simileze misuk desikene. 2Eya wane turuŋine yemo ŋene bonep bonep kimakopze eŋane dereret ge more, gegeene menageyakane, so kisi maepko togoleu, mali malipene suwayakane mapik onikene. 3Kristo eŋe eninaneka simileine mi detke. Eŋinaneka desiyakane turuŋine yemo Kaisale wane ekapko don mane iwa yale ramaike, eya wane kop okange, “Kaisale, ŋetko liko liko okangangoi, ŋeiwa yewa eŋane ŋetko liko liko, eyaŋo naŋane kutno wamaike.” 4Don kine kine korop Kaisale wane ekapko mo qewarekoi, eŋe eya qekoi yemo ŋene kisi maep wane kine kito ŋedangi detlukkenane. Paki eyaŋo ma togoleŋone more, ma ewek ŋongi, kine kine biŋek qe ŋebonge, eya wane dereret gekenane, qekoi. 5So Kaisale eŋe ma togole ma togole, so ma ewek ma ewek welaine, oŋo maine qesiŋŋungi, ŋine Yesu Kristo wane rokopko, wet dereret weku motpi paki gekei, 6paki ŋine korop maine aŋa weku qeturageu paki, Kaisale so Waomze Yesu Kristo wane Magaine bakomine kitokei.

Kristoŋo Yuda Ŋei So Qelaŋ Ŋei Weneŋ Qesiŋonge

7Eya wane ŋine wetŋineŋo mali malip okan nagu gekei, Kristo eŋe yaleka Kaisale wane qeli ewe zonom qelaŋan wakoniyakane ŋine ŋibuke. 8Na ŋidanmaile, yemo onoka wane Kristoŋo Yuda ŋei eŋane qelit ŋei okangi, eyaŋo kine qeki wakonmaike, yemo Kaisale eŋe qom pesek welaine, paki, eŋe Kaisaleŋo aso ŋabo kisi maep don edange, eya ma togoleki, wele wakoniyakane, yale okange. 9So eŋe yaleka qelaŋ ŋei mapikongi, Kaisale qom borikinane bakomine kitokei wane, yale okange. Eya wane Kaisale wane ekapko don qekoi, eyaŋo iwa yale ramaike,

“Eso eya wane na baŋ qelaŋ eŋane keuweno geŋane bakom kitokale, na baŋ eŋet kito geŋane eŋetŋone mawa ganikale.”

10Koso mane iwa yale ramaike,

“Batne okanbi, qelaŋ ŋei ŋine, Kaisale wane ŋei ŋerep Yuda magu eŋerop!”

11So mane iwa yale,

“Waom mawakau, qelaŋ ŋei korop, eŋe mawakau, ŋei ŋerep korop!”

12So Isaiyaŋo koso ramaike,

“Yese wane komine mane baŋ sariyake, eŋe baŋ ŋei waomŋo birakaki, qelaŋ ŋei ware-oniyake, paki eŋe baŋ wetene eŋano more gekei.”

13Kaisale dereret wane namuŋ, oŋo eŋe detlukka gekeiwane kotoŋino oi bakom so wet pesek, maine qewat-ŋuniyake. Paki Asu Koboboinane zonomŋo baŋ dereretŋine ma togoleki takotke suwa ariyake.

Pauloŋo Urataine Make Eya Wane Wet Pesek Dere Kibi Qeke

14Kimakopne, na noŋom wetneŋo mo more, kine ŋine detwaremaile, ŋinano mauluk maulukŋo mo watke pamaike, ŋine dereretŋo korop qewat ŋunge, eya wane ŋine ŋidomka maine ewekeu paki, kito alat-nagukei. 15Ŋo siluŋ kibi iwa me lalaŋ kaitkoka qe ŋibonmaile, yemo kisi maep wane wetke ŋibone more, wet qelot okan ŋunmaile. Na wet qelot okan-ŋunmaile, yemo onoka wane mida yemo Kaisaleŋo kisi maep urata eya makalane more ninge. 16Eya wane na Kristo Yesu wane qelit ŋei gewe paki, qelaŋ ŋei eŋane urata mamaile. Na pris yale Kaisale wano ŋine kisi maep don maine eya ra qelaŋane edanmaile, yemo qelaŋ ŋei eŋe maine bakom yale okanbi, Asu Koboboineŋo ebuki koboeu, Kaisale wano bakom yale biraongi, onbi menageyake. 17Eya wane na Kristo Yesurop weneŋ urata mamaile, eya wane na maine Kaisale wane urata mamaile, eya wane detpe, wawaine okaniyake. 18Na yeye kine kine natne eya wane don mi raikale, midaka. Na kine kine weku eya wane donka raikale, yemo Kristoŋo na qesiŋnangi, noŋo qelaŋ ŋei iwenonbe, eŋe Kaisale wane kisi maep don dere tewekkei wane, na aŋaneŋo so meteneŋo urata makole. 19Asu zonom ningi, na masi togole kine mane kine mane ma more zonom gorop gekole. Pakiso na kiyeke Yerusalem ŋine Kristo wane don maine eya kepe lolike ra suwa ari magewe Ilirikum rokopkeke. 20Naŋane urata yemo naso baŋem kisi maep don maine eya ra suwawe mat natne Kristo wane don kisi mi det okangoi, edo desikei. Eso yale okane mo, ŋei natne edo urata wele nago nagon mo motkoi, yewao mi makalane nan okanmaike. 21Yale okanbe Kaisale wane ekapŋo don mane iwa yale ramaike, eya wane kop okanmaike,

“Ŋei yewa eŋe eŋane don kisi mane mi rau detkoi, eŋe baŋ kaikei, so yewa eŋe mi detkoi, ŋo baŋ kine detlukkei.”

Paulo Eŋe Roma Matko Ariyakane Rake

22Kine eya wane, na atak loutne ŋinano sarikalane okanbe urataŋo luknangi met okanmaile. 23Na koma loutne ŋinano sari ŋunikalane zok nange, wane ukude iwa yemo kepe iwao uratane mo korop qoe waremaike. 24Na mo ŋinano sari eya ŋonikalane iwa wetkemaile. Na eyaka sari ŋune mo koso numane leleki Spain kepeo arikalane, na ŋinano lotke marat ŋunbe, mere wetne peseki, eya wane ŋadino ŋido qesiŋ nanbi, yewa arikale. 25Naso iwa yemo Kaisale wane ŋei ŋerep yewa gemami, eŋane qelit qe more qesiŋ onikalane, Yerusalem matko arikalane okanmaile. 26Makedoniya so Akaiya doku tau tau magu eŋe Yerusalem matko ŋine Kaisale wane ŋei ŋerep magu eŋane keuwo ŋine aboŋene midaine gemami, eŋe kito qesiŋ okanone more, bakom more ebonikeiwane, done mo au ma togolekoi. 27Eŋe edomka eya okangei wane ongi okanbi menaŋge. Ŋo siluŋ eŋe sotaene pake, eya wane eŋe aboŋene midaine yewa qesiŋongoi, Yuda ŋei eŋe kotoenane moriyan yewa qelaŋ ŋei eŋerop mapoke ama nagukoi, eso eya wane qelaŋ ŋei eŋe yaleka solaenane moriyan yewa Yuda ŋei eŋerop maine mapoke ama naguwi menageyake. 28Na urata iwa ma warewe qoe wareyake. Paki na kaikale, eŋe wesi suwaine eŋane ra qeturaŋgoi, eya wele mo maine wakonmaike, yemo na urata eya mo koboine meteeno mosikale, na Spain arikalane yemo na numane eyaka sari ŋunemo, baŋ arikale. 29Na ŋinano sarikale, eya yemo na mo detmaile, na Kristo wano ŋine mosop kelarop wat watko yewarop ma sarikale.

30Kimakopne, na Waomze Yesu Kristo wane so Asuŋo wet maep ŋibon okanmaike, eya wane wet qelot ŋidanbe. Ŋine naŋano takotkeu paki, Kaisale meŋenka more, naŋane gege uratanane mapik nanikei. 31Mapiknane meŋenkau, Kaisaleŋo Yuda kepeo ŋei mali malipene midaine eŋane meto maineka warenaniyake, paki na Yerusalem matko ŋine Kaisale wane ŋei ŋerep magu yewa gemami, eŋane wet pesek wane bakom ebonbe, eŋe maine maikei, eya meŋen-kaikei. 32Eya wane Kaisaleŋo detki maine okaniyakeo yemo, Na baŋ wet pesekrop ŋinano sarikale, paki ŋinerop metpe wet solane peseyake. 33Kaisaleeŋe ŋenane wet peyam gorop gege eya wane welaine Waom so eŋe Magak, oŋo ŋinerop korop ge wareyake. Weleka.

Currently Selected:

Roma 15: onsNT

Highlight

Copy