LUK 4
4
Ibulusa ka Isa manɛɛ
1Nii Sɛniman tora Isa fɛ. Awa, Isa tɛrɛ ye bɔla Juridɛn Ba da la tuma mɛn na Alla la Nii Sɛniman lɔra a ɲɔrɔ ka wa a ri wula kɔndɔ. 2A ka tele binaanin (40) kɛ wula kɔndɔ ye, Ibulusa ye a magbɛrɛn kɛla. A ma foyi si dɔɔn waati wo kɔrɔ. Tele binaanin (40) dafanin, kɔnkɔ gbara a la a ɲa ma. 3Wo rɔ Ibulusa nara ka a fɔ a yɛ ko: «Ni ile le ye Alla Dencɛ ri, i ye a fɔ kaba wo yɛ ko wo ye yɛlɛman ka kɛ buru ri.» 4Isa ka a jabi: «A sɛbɛnin Alla la kitabu kɔndɔ ko: ‹Mɔɔ ti se balola buru gbansan na.›»
5Isa banni wo fɔla Ibulusa yɛ, Ibulusa ka a ta ka wa a ri san ma, ka dunuɲa mansaya bɛɛ yiraka a la waati kelen na. 6Ibulusa ka a fɔ a yɛ ko: «Jamana woilu bɛɛ dini nde ma. N wa sɔn n mɔɔ mɛn dɔ, n di a bɛɛ di wo ma. N di i lasii jamana woilu bɛɛ kun na sa i ri bonya ba sɔrɔn. 7Ni i ka nde bato, i ri woilu bɛɛ sɔrɔn.» 8Isa ka a jabi: «A sɛbɛni Alla la kitabu kɔndɔ ko: ‹I ye i Maari Alla le bato ka baara kɛ ale kelen pe yɛ.›»
9Ibulusa ka Isa ta ka wa a ri Jerusalɛmu wo rɔ. A wara Isa lalɔ Alla batobonba kun na, ka a fɔ a yɛ ko: «Ni ile le ye Alla Dencɛ ri, i ye i gban yan, 10baa a sɛbɛnin Alla la kitabu kɔndɔ ko: ‹Alla ri a la mɛlɛkailu jamari ko ii ye i lakandan, 11ka i mira ii bolo la kosa i sen ti nala latula kaba si la.›» 12Kɔni Isa ka Ibulusa jabi: «A fɔra Alla la kitabu kɔndɔ fanan ko: ‹I kana i Maari Alla kɔrɔbɔ.›» 13Ibulusa banda Isa manɛɛnna, a kaɲara a ma tuma mɛn na, a bɔra a kɔfɛ ka lon gbɛrɛ makɔnɔ.
Isa ka a la baara damira Kalile mara rɔ
14Isa bɔra ye ka wa Kalile mara rɔ Nii Sɛniman na sebaya rɔ. A la ko fɔra mara wo fan bɛɛ rɔ. 15A tɛrɛ ye wala mɔɔilu karanna salibonilu la ye. Bɛɛ tɛrɛ ye a tɔɔ ɲuma fɔla.
Nasarɛtikailu ka i ban Isa rɔ
16Isa wara se Nasarɛti, a makɔlɔra yɔrɔ mɛn dɔ. Ɲɔɲɔ Lon seni, a wara salibon na, ikomin a dorini a kɛla ɲa mɛn ma. A se mɛn kɛni karan diya ye, a wulira ka i lɔ kitabu karan kanma. 17Keladen fisamante Esayi la kitabu lamininnin donda a bolo. A ka yɔrɔ do ɲinin kitabu lamininnin dɔ, yɔrɔ mɛn karan lɔɔ tɛrɛ ye a la. A sɛbɛni yɔrɔ wo rɔ ko:
18«Maari Allabatala la Nii Sɛniman ye n kan,
baa a ra nde ɲenematɔmɔn ko n ye kibaro ɲuma lase fantanilu yɛ.
A ra n kelaya ko n ye a lase mɔɔ miraninilu ma ko ii ra kanhɔrɔya,
ko n ye a fɔ ɲa funyen yɛ ko ii ɲa ri laka.
A ka n kelaya ko n ye mɔɔ tɔrɔninilu kanhɔrɔya,
19ko n ye a fɔ mɔɔilu yɛ ko Maari la san ba ra se,
a la kininkinin di yiraka ii la san mɛn na kɔnin.»
20A banni wo karanna, a ka kitabu lamininnin datuun ka a don a lamara bolo ka a sii. Mɔɔilu bɛɛ ɲa lɔni tɛrɛ a rɔ. 21A ka a fɔ ii yɛ ko: «N da ban kitabu yɔrɔ mɛn karanna, wo kuma ra dafa ai ɲana bi.»
22Ii bɛɛ tɛrɛ ye a tɔɔ ɲuma fɔla, baa ii kabannakoyani a la kuma ɲumailu ma. Wo rɔ, ii ka i ɲɔɔn maɲininka ko: «Yusufu dencɛ tɛ ɲin di wa?»
23Isa ka a fɔ ii yɛ ko: «Sika tɛ a rɔ, ai ri kuma kɔrɔlama ɲin fɔ n yɛ ko: ‹Dandalila, i ka kan ka i jɛrɛ lakɛndɛya fɔlɔ.› Ai ri a fɔ n yɛ fanan ko: ‹I ka ko mɛnilu kɛ Kapɛrinahumu, an ye woilu kalama. I ye woilu ɲɔɔn kɛ i jɛrɛ fanan wara rɔ yan.›» 24A ka a fɔ ii yɛ ko: «Tuɲa le! Keladen fisamante si tɛ jatela a wara mɔɔilu bolo. 25N di misali doilu yiraka ai la. Eliya la tele rɔ, san sawa ni karo wɔɔrɔ dafara sanci ma se nala Isirayɛli jamana duu kan. Wo le ka a kɛ, kɔnkɔ ba donda jamana kɔndɔ. Wo tuma, cɛsamuso ka siya Isirayɛli jamana rɔ yan. 26Kɔni Alla ma Eliya lawa wo si dɛmɛnna. Alla ka Eliya lawa cɛsamuso do wara Sarɛpita so kɔndɔ, mɛn ye Sidɔn mara rɔ. 27Ka la wo bɛɛ kan, keladen fisamante Elisiya la tele rɔ, kunatɔ tun ka siya Isirayɛli jamana rɔ yan. Kɔni wo si ma kɛndɛya Elisiya bolo fɔɔ Naaman kelen Siriyaka.»
28Nba, wo ka mɛnilu siini tɛrɛn ye salibon na, woilu ka kuma wo mɛn ka monɛ kojuuya. 29Ii bɛɛ wulira ka Isa gbɛn ka labɔ so kɔndɔ. Iko so wo lɔni tindi ba kan, ii ka Isa ta ka wa a ri tindi ba wo kun dɔ ko ka a lafili, kosa a ri be ka faa. 30Kɔni a taminda ii tɛma ka wa.
Isa ka jena gbɛn
31Nba, Isa wara Kapɛrinahumu, so mɛn ye Kalile mara rɔ. Ɲɔɲɔ Lon sera, a wara mɔɔilu karan salibon na. 32Ii kabannakoyara a la mɔɔ karan ɲa ma, ka a masɔrɔn a tɛrɛ ye mɔɔilu karanna kuma mɛn na se ba tɛrɛ ye wo rɔ. 33Wo ka kɛ jenatɔ do tɛrɛ ye salibon kɔndɔ ye. Ka Isa to karanna, jenatɔ wo kulera fanka la ka a fɔ ko: 34«Ɛɛ, Isa Nasarɛtika! I ye nfen kɛla andeilu tɛma yan? I nani an halaki kan de ma wa? I ye mɔɔ su mɛn di, n ka wo lɔn. Alla la Mɔɔ sɛniman de i ri.» 35Isa jamanda jena ma ka a fɔ a yɛ ko: «I makun! Bɔ cɛɛ wo fɛ!» Jena ka cɛɛ wo labe duu ma jama bɛɛ ɲana, ka ban ka bɔ a fɛ. Foyi si ma kɛ cɛɛ la. 36Mɔɔilu kabannakoyara a ɲa jɛrɛ jɛrɛ ma wo rɔ. Ii ka a fɔ i ɲɔɔn yɛ ko: «Kuma su ɲuman ye ɲin di? A ragbɛ! A ye jenailu jamarila se ni sebaya la. A wa a fɔ ii yɛ ko ii ye bɔ, ii ri bɔ.» 37Wo rɔ, Isa tɛrɛ ye mɛn kɛla, wo kibaro fɔra fan bɛɛ yɔrɔ wo laminin dɔ.
Isa ka Simɔn biran muso lakɛndɛya
38Isa bɔra salibon na ka wa Simɔn wara. A sera ye ka a tɛrɛn Simɔn biran muso tɔrɔni kosɛbɛ, a muso na kɔnin. A fari kalayani kojuuya. Simɔn wara mɔɔilu ka Isa madiya ko a ye muso dɛmɛn. 39Isa wara se a fɛ, ka i lɔ a kun na. A ka fari makaliya makuma, ko a ye bɔ muso rɔ. A bɔra. Muso wulira i kɔrɔ yɛ, ka dɔɔnnin di ii ma.
Isa ka jankarɔtɔ siyaman nakɛndɛya
40Fitiri waati se mɛn kɛni, mɔɔilu nara jankarɔ tɔilu ri Isa ma. Jankarɔ su siyaman tɛrɛ ye ii la. Isa ka a bolo la a kelen kelenna bɛɛ kanma ka ii lakɛndɛya. 41Jenailu bɔra mɔɔ siyaman fɛ fanan. Ii bɔ waati, ii kulera ka a fɔ Isa ma ko: «Alla Dencɛ le ile ri.» Kɔni Isa ka ii makuma ka ii makun! A ma sɔn ii ye kuma, ka a masɔrɔn ii ka a lɔn ko ale le ye Mɔɔ Ɲenematɔmɔnin di.
Isa wara kawandili kɛ Jude mara rɔ
42Wo duu sa gbɛ jonna, Isa bɔra so kɔndɔ ka wa wula kɔndɔ. Mɔɔilu ka a ɲinin haan ka a sɔrɔn wula kɔndɔ ye. A lɔɔ tɛrɛ ye ii la ka a lasɛ ii wara, baa ii tɛ a fɛ a ye bɔ ye. 43Kɔni Isa ka a fɔ ii yɛ ko: «A fɛrɛ tɛ fɔɔ n ye wa Alla la mansaya kibaro ɲuma lase mɔɔilu ma so ba gbɛrɛilu la. N kelayani wo le la.» 44A tora Jude mara rataamala, wo rɔ, ka mɔɔilu kawandi salibonilu la.
Currently Selected:
LUK 4: AKS
Highlight
Copy
Compare
Share
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/