Иуда 1

Селямлашув

1 # Мт 13.55; Фаал 12.17; Якъ 1.1 Иуда, Иса Месихнинъ къулу ве Якъупнынъ къардашы, –

Алла Баба севген ве Иса Месих сакълагъан, Алла чагъыргъан адамларгъа:

2 # Дан 3.31; 1 Пётр 1.2; 2 Пётр 1.2 Мерамет, тынчлыкъ-аманлыкъ ве севги сизде чокълашсын!

Яланджы огретиджилер

3 # 1 Тим 6.12; 2 Тим 4.7 Севгилилерим, эр биримизнинъ къуртулышы акъкъында язмагъа чокъ истеген олсам да, бир вакъытта азизлерге берильген иман ичюн курешмеге сизге ялварып язмагъа кереклигини корьдим. 4#2 Пётр 2.1Базы алласыз адамлар сизинъ аранъызгъа гизлиден сокъулып киргенлер. (Оларнынъ джезасы чокътан берли язылгъан эди.) Олар Алламызнынъ эйилигини бозукъ яшамагъа имкянына денъиштирелер ве Иса Месихни, бирден-бир Эфендини ве Раббимизни ред этелер.

5 # Сай 14.36-37; 26.64; 2 Пётр 1.12; Еуд 3.17 Сизлер бунынъ эписини бильсенъиз де, мен сизинъ акълынъызгъа кетирмеге истейим: Рабби Исраиль халкъыны Мысырдан къуртаргъан сонъ, кечче Онъа инанмагъанларны ёкъ этти. 6#2 Пётр 2.4Озь укюмини сакъламагъан, озьлерининъ яшагъан ерини ташлап кеткен мелеклерни де Рабби буюк суд кунюне къадар эбедий зынджырларнен багълап, зифт къаранлыкъта сакълай. 7#Баш 18.20; 19.24; Текр 29.23; Мт 25.41; 2 Пётр 2.6Оларгъа ошап, Содом ве Гомора ве оларнынъ этрафындаки бутюн шеэрлерде яшагъанлар да чокъ ороспуландылар ве башкъа бедени олгъанларнен ятмагъа истедилер. Энди эбедий атеште оларнынъ джезалангъаны адамларгъа орьнек олды.

8 # 2 Пётр 2.10 Бу адамлар да, озь тюшлерине таянып, беденлерини арамлайлар, Раббининъ акимиетини ред этелер ве шуретли коктеки кучьлерни яманлайлар. 9#Текр 34.6; Дан 10.13; 12.1; Зек 3.2; 1 Тес 4.16; Сыр 12.7Лякин баш мелек Микъаиль, Мусанынъ бедени акъкъында Шейтаннен давалашкъанда, оны яманламагъа ве суд этмеге джесарет этмеди, тек: «Рабби сени сёгсюн!» – деди. 10#2 Пётр 2.12Амма бу адамлар анъламагъан шейлерни яманлайлар. Айванлар киби, базы шейлерни табиат ярдымынен анълайлар, бу шейлернен исе озьлерини гъайып этелер. 11#Баш 4.3-8; Сай 16.31-35; 22.5; 25.1-2; 31.16; Текр 23.3-6; 1 Юх 3.12; Еуд 11.4; 2 Пётр 2.15Оларнынъ алы беля! Олар Хаиннинъ ёлундан кетмектелер, Белам киби, акъча къапкъанына тюшелер, Къорахкъа ошап, исьян ичюн гъайып олалар. 12#Мт 15.13; 2 Пётр 2.17Севги акъшамларынъызда бу адамлар – къара лекелердир. Олар сизлернен берабер къоркъмайып ашап-ичелер, лякин тек озьлерини бакъалар. Олар – ельнен алып кетирильген ягъмурсыз булутлардыр, кеч кузьде мейвасыз къалгъан, тамырынен чыкъарылып ташлангъан, эки кере ольген тереклердир. 13#Еш 57.20Олар – денъизнинъ къутургъан далгъалары, озь айып ишлерини, далгъалар озь копюгини киби, этрафкъа сачалар. Олар – бош кезген йылдызлардыр. Оларгъа эбедиен энъ къою къаранлыкъ азырлангъандыр.

14 # Баш 5.21-24; Текр 33.2; Дан 7.10; Зек 14.5; Фаал 7.53; Гал 3.19; 1 Тес 3.13; Еуд 12.22 Адемден сонъ единджи олгъан Ханокъ бу адамлар акъкъында пейгъамберлик япып, шойле деди:

«Мына, Рабби келеята; он бинълер азизлери де келеяталар.

15О, бутюн адамларны суд этеджек, эр бир инсанны – имансыз ишлери ичюн,

алласыз гунакярларны – Онынъ акъкъында бутюн юзьсюз лафлар айткъанлары ичюн джезалайджакъ».

16 # 2 Пётр 2.10 Олар – мырылдагъан адамлар, ич бир шейден разы дегиллер, тек озь истеклерининъ артындан юрелер, агъызларындан къопай лафлар чыкъа, озь файдасы ичюн башкъаларына ялтакъланалар.

Тенбиелер ве огютлер

17 # 2 Пётр 3.2-3 Сизлер исе, севгилилерим, Раббимиз Иса Месихнинъ эльчилери тарафындан эвельден айтылгъан сёзлерни акъылынъызда тутунъыз. 18Олар сизлерге: «Сонъки вакъытта озь алласыз истеклерининъ артындан юрген мыскъылджылар пейда оладжакъ», – дедилер. 19#Рим 8.9Олар адамларнынъ араларыны бозалар, догъма истеклерине коре яшайлар, озьлери – Руху олмагъан адамлардыр. 20#Эф 6.18Сизлер исе, севгилилерим, азизден-азиз иманынъызда осьмеге бири-биринъизге ярдым этинъиз, Мукъаддес Рухнен дува окъунъыз, 21#2 Пётр 3.12озюнъизни Алланынъ севгисинде сакъланъыз, Раббимиз Иса Месихнинъ мераметини, О, береджек эбедий омюрни бекленъиз.

22Шубеленген адамларгъа мераметли олунъыз. 23#Ам 4.11; Зек 3.2; Сыр 3.4Базыларны атештен чыкъарып къуртарынъыз. Башкъаларына къоркъа-къоркъа мераметли олунъыз, оларнынъ гунакяр ишлеринден арам олгъан урбаларындан биле нефрет этинъиз.

Шукюр дувасы

24 # Флп 2.15; Кол 1.22; 1 Пётр 4.11; Рим 11.36; Сыр 1.6; 5.13 Сизлерни йыкъылувдан сакъламагъа, Озюнинъ Шурети огюне сизни къабаатсыз алда буюк къуванчнен къоймагъа Бильгенге, 25Бир Аллагъа, бизни Раббимиз Иса Месихнинъ ярдымынен Къуртаргъангъа асырларнынъ башындан, шимди ве эбедиен шурет ве улулыкъ, къудрет ве акимиет олсун! Амин.

Currently Selected:

Иуда 1: CTB

Highlight

Copy

Compare