YouVersion Logo
Search Icon

MATTHEW 2

2
Zingshoshongwui Maheikathembing Kharā
1 # Lk 2.4-7; 1.5. Herod awungawui atamli Judeali khalei Bethlehem kaho keinungli Jishuli pharai. Kala yanglu, zingshoshongwui eina maheikathembing Jerusalemli rālaga ngahāna, 2#Jer 23.5; Zec 9.9; Mk 15.2; Joh 1.49; Mis 24.17. “Pharā kahaia Jihudibingwui awunga chi kali leikhala? Kaja ithumna awui sirā zingshoshong theihaida ali khorum khavai kharāna.”
3Herod awungana tui chi shālaga ningkashaklakhaowa kala Jerusalemli khalei mibing saikoranala chithāhaowa. 4Ana pāngmon akhokabing eina yaruiwui ain kathembingli hokhuiserlaga, “Khrista chi kali pharāki kajikhala?” da ngathinga.
5 # Joh 7.42. Chieina athumna ali, “Judeawui Bethlehemli pharāra” da hāngmi. “Kaja marānna hithada kapihai: 6#Mic 5.2. ‘Judah ngaleili khaleiya O, Bethlehem,
nava Judahwui keinungbingwui ngachaili teomeikap kaje khamunga maningmana;
kaja khamunga akhavā akha nawui eina shokta iwui miyur Israelli mungra.’”
7Chiwui thili Herodna maheikathembingli ngathumda hokhuilaga sirā chi katharān shokkhala da ngahānshingkhuiya; 8laga ana athumli Bethlehemli chihovāda hānga, “Vālu kala angangnao chili ningkachang eina phākhuilu kala nathumna ali phākhui kahai tharān ilila pao unghānglu, chieina inala ali akhorumpaira.”
9Awungana kahāng chi athumna nganākhui kahaiwui thili zathaowa, kala yanglu, athumna zingshoshong theikahai sirā china angangnaona khalei apam chili mavāngasāmranglakha eina tangda athumli rizata. 10Sirā chi kathei tharan athum khamathānna pemtinghaowa. 11#Mat 1.18; 12.46. Athumna shimli kazang eina angangnao chi ava̱ Maryli ngasoda thei, chieina athumna khuktizangda akhoruma. Chiwui thili athumna athumwui otrom pheilaga ali sinā kala nganamkaphā thao frankincense eina myrrh chigata.
12 # Mat 2.22; Ots 10.22; Heb 11.7. Mangshong Herodli malatungluialu da rākasohaoda athumna shongfa khangateishong eina aramli hanunghaowa.
Egyptli Yāmkhavā
13Athum zatkahaiwui thili yanglu, Prohowui kazingrao akhana mangshong Josephli ramahāda hānga, “Ngakarthuilu, angāngnao eina ava̱li khuiphungda Egyptli yāmvaulu, kala ina pao mashirātranglakha eina tangda chili pamsālu; kaja Herodna angangnao chili sāthat khavai phāki jiura.”
14Chieina Josephna ngakarthuida angangnao eina ava̱va̱li thānphungda Egyptli vākhavai ngayāshong zatthuwa. 15#Hos 11.1; Sho 4.22. Herod mathiranglakha eina tangda chili pama. Hi Prohona marānwui khamor eina matuishok kahai, “Inaomayarali Egyptwui eina ina hoshoka” kaji ungshung khavaiwui vangna.
Angangnaobingli Shaokathat
16Chiwui thili maheikathembingna ali awor sākahaina da kathei eina Herod malungvātlakhaowa. Chieina Bethlehemli kala chiwui ruinganaili khalei naomayara kum khani kākahai kala chiwui azingli khalei saikorali shaothat khavai hukhum mida shaothatserhaowa; kashok otshot hi ana maheikathembingwui eina ngahānshingkakhui atam chiwui eina shānkhuilaga kasāna.
17Hithada Jeremiah marānna hānghaikasā chi ungshunghaowa:
18 # Jer 31.15. “Ramahli akhon akha shai,
lungrin chapkhangachākhon.
Rachelna awui naongarābingwui vang chapta hāngkaphanepla makhuisang,
khikhalajila athum thishumhaowa.”
Egyptwui eina Latkhaung
19 # Mat 1.20; 2.13. Herod thikahaiwui thili Prohowui kazingrao akhana mangshong Josephli ramahāda hānga, 20“Ngakarthuilu, angangnao eina ava̱va̱li thānphungda Israelwui ngaleili ungulu. Angangnao chili sāthat khavai kaphā athum thihaira.” 21Chieina ana ngakarthuilaga angangnao eina ava̱va̱li thānphungda Israel ngaleili unghaowa.
22Kha Archelausna avāva̱ Herodwui mahut shinda Judeali mungda lei kaji Josephna kashā tharan apam chili ungzangkida ngacheehaowa, kala ali mangshong rāhāngchitheimihaoda Galilee ngaleivāk unghaowa. 23#Lk 1.26; Isa 11.1; Mk 1.24. Ana Nazareth kaho keinung akhali vāpāna, chi marānbingna “Ali Nazarene hora” da hāngmarānhaikasā chi ungshung khavaina.

Currently Selected:

MATTHEW 2: TANGBSI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy