THESSALONIAKO KÜNAO 3
3
Hana cho bate
1Tsüsa ha küzüko, Nyepoo dzüo po nüko dolü thiyoküzho kümhai kükreko dolü yi thi sazo voyi mu thürho pühyi. 2Tsü ha poyi thüma mha lükümo mu küruzhümi belü yi ta prayi küto na nüko hana cho sayite: thüma mütüko kumülümi zo morü. 3Süyi Nyepoo sü küdzüthoo zo; pu na thi kümütükusü mu kürüzü belü noko külasüto. 4Süzo ha noko che mha poküsüko nüko süko thiyi mu tsüsayi, thito ikütsü nüko dzüh zoe ha Nyepoo mülü bayo zo. 5Süzo Nyepoo po noko lü rükhüpü u Kümünupüh chelü küpra kükhrüo mu Khrista chelü küpra sügüsühe küzhoo lü voküyi thite.
Mhakam kühopüyi veli kütsüko thiyi no kütsü
6Süzo ha küzüko, ha noko po ne küzümia kühopüyi kühulü tayo kümo mu ne ha chelü kümütha dzü se küyiko züyo kümomi zü kümokro mo küto u Nyepo Jisu Khrista zalü ha dzü kha nüko che süho. 7Noko ha doreyi dzü zotsü netho zoyi se bate rü; kükrenamoli ha thadzü nüko dolü küba cheyi miyi zü mo de lhü mozo kütsü na. 8Süzomoli ha süchesü mipü belü yi püma thi mo de mha yiketsü moli ha noko mipü lüyi thi kütsakhunyi kümona thathava yi küswüyi mhathi kümüzhe rükharüli zo. 9Süosü ha va yiküti putü mo mu süzino moli ha tho thakapü thisü noko ka sünyi kütsü zo 10Sizomoli ha noko zü küba cheyi thüma kühopüyi mhathi kümütsü mi, pu po pu lüvayi ti hi süzi ha noko che dzü khasüyo. 11I dzü hio küpo kükrenamoli ha noko dolü humi u tho u mhatho püyi thi mo no mi küyhu kho mu ki no mire lüyi tayo mokütsü se kütsü nazo. 12Süna ha thüma süzi kütsümi po rüba no utho uva krati tano kütsü Nyepo Jisu Khrista za sü dzü khasü mu tarho sasü züho. 13Eli a küzüko, nüko zoe mhakam kühopüyi thi lizo velikütsüko thi ne süsi tahi. 14Tsüo thüma kühopüyi lüsi ha yolü thoküsü hadzü züyokümomi, nüko thüma sümi sepü bayi; süzü pu po müngayi küto na neko puzü kümükroyihi. 15Süzoyi pu khapü ne ngomumi kümha zotahi no ne küzümi kümha no pu tahitarho ta zoyi.
Thüzho kücho
16Süzo thülü thi kümünüyoküzho Nyepo po kühopüyi, kühopülüyi putho nune süo khapü miprü taküyio thiyite. 17I Paul tho ne külüküsü a tho a be pü thosü ho; hiyohi a lüsi khoko lü a chelü zoli kütsü zasi pü zo; I hizi de thoyo. 18U Nyepo Jisu Khrista chelü küpra ngokümüzheo po noko mütüko zü baküyio thiyite.
Currently Selected:
THESSALONIAKO KÜNAO 3: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
