THESSALONIAKO KÜNAO 1
1
1Paul mu Silvanus mu Timothy uko khapüh U Kümünupüh u Po mu u Nyepo Jisu Khrista checho baküta Thessaloniako kühu che küsü: 2U Kümünupüh u Po mu u Nyepo Jisu Khrista chelü küpra ngokümüzheo mu thülükumünüo po nüko züta küyio thiyite.
Khrista küprü che thüma müjoküto
3Ha küzüko ha noko na u Kümünupüh swü sühkütsü hazhote: mu süzitsü pütü zoto. Kükrelamoli noko kümülüve küthi satazü mu noko kühopüyi huhu khrü küthi mama prayi zükütsü na. 4Süna ha thozoyi mi neko müswü kütsü khüko lüyi mu kümüzhe kütsü neyo voyoküzho khüko lüyi ne sügü süyhekuzho na ne kümülü lano u Kümünupüh kühuko lü noko na hanüphi tayo. 5Noko kümüzheküzhoko yi u Kümünupüh küde nazo; mu noko po süo ngoyi kütsü thiyiküto na u Kümünupüh müdo-o müzi zolikütsü süko pü zasi pü thipü ba kütsüzo. 6-8Süzo Nyepo Jisu Khrista tho u Kümünupüh seyokümoko mu u Nyepo Jisu dzüyiküve-o dzüzü thiyokümokoyo pü khüpotoli meto zoküba lüno pu küku pü dzüyiko zü sade tüyo numi mhüngo thizo prüküto che, mu tsüdo noko müthimünyi küzhoko müthi laküto na mu noko tsü kümüzhe küzhoko poyi hazü rülütaküto u Kümünupüh mhüdzü zoe müzizo. 9-10Sünha Pu pu kümüsako mhüdzülü uko po pu ngopü ungo zotoli no voküto che dzüyiküveo dzüzü thiyokümoko po Nyepoo dzü mu Pü küku ratsa kerü lüno sazho thide küchothe küka ngoyi to: Noko ha noko che pu zhopo thiküsü dzüo mülüyi tazorü. 11Süna ha u Kümünupüh po noko khapü puphre thiyi küsümi thito, mu nepo nezho veyi künyi khüko mu ne kümülü mhatho khüko ku swüde thiyi küto na hayi noko na chosüh bayo zo. 12Süzi-eno u Kümünupüh mu Nyepo Jisu zao müleyito, mu Khrista Jisu noko yi po pu yolü müleyi to.
Currently Selected:
THESSALONIAKO KÜNAO 1: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.