CORINTHMIKO KÜNAO 4

1Ha ngokümüzhie ngoyi mu yitho hio ngokütsüla ha chomüza tayo mo. 2Si kütsüo mole ha kümükhrü kümüvako khave, küdove tsü cholü mo, mori kücejü lü Niepoo dzüko khimo vele küthoo zhopo thi mu mipo sülü ha lüdo ri sheyi küve thi tayo. 3Mhanuü süo küvata tsüsa kata kütoko mhüdzülü zo 4Cedzü hio ropüko süko thülü mhüo thi mücie ve, zale küthi Khrista dzüyiküve Nyepoo Jihova rhü thi küpüo po uko vamve mo kütola. 5Ha hatho ha zhopo thiyo mo vele Khrista u Nyepoo zhopo thiyo mo ha pü cieta zo. 6Süo Jihova “küveo po küzüo va mveyite” si küsüo Khrista zülü ha mülü vamve sü. 7Vele cienyie hio rünyo püh küthi büh yolü ta, süo ve lotsü kütsü kükuo Jihova yo mu hayo bamo kütsü thasü kütola. 8Lucohico ha dzü kümüzhie yo, süla halü thathi tamo; halü dzü kühokürü thisü yo, vele hathipüh ha vedi vamo. 9Ha müthimünyi, vele ha khava mo; hatsahavü, vele ha müka vamo; 10Utü mütülü Khrista süh sü püh tayo, süo mipo hayo Khrista kürhü kübao sheyi kütola. 11Ha rhüküba hio Khrista la mipo püh küsa choco süsüyo, süo thimüshü vayiküve mo hio lü Khrista yo kürhü küba tha mika sü kütola. 12Sino küsao hayo mhathiyo vele kürhüo nieyo mha thiyo. 13Uko kümülülü u ropü kürhüte thadzü thopüh kümüta “I mülü süla I po” hari sü mülü süla poyo. 14Nyepoo Jisu thi mürhü küsüo Khrista yo hari thimürhüyito hapüh nie sa uko züpüh voto. 15Mha hiko mütü nieko la zo, süo ngokümüzhie po kükremi tso mükro mama küyi zü Nyepoo zale chuh küchü mamayi kütola. 16Süla halü thathi yomo si kütsüo mole ha chozou mao thi katazü zori thülü mao tüsonha küsa mama züzo. 17Kümüzhie za kütsüo hi pütü dopüh la küchothe zalethi küto müshio thipüh müdeyi kündi thi tazüe, 18Kükrelamole hano küngoko whuzü mo vele ngokümoko whuzüe: küngoko sü pütü dopüh lazo vele ngokümoko küchothe zhü.

Currently Selected:

CORINTHMIKO KÜNAO 4: NAG5BSI

Highlight

Copy