CORINTHMIKO KÜNAO 3
3
1Hatho ha zhopo thi swudü la tome? Me kropüh thiyo tsübi ha zhopo lüsi püh tsü mori niece püh mozho shü me? 2Nie ha zhopo lüsi ha mülü lü thopüh kütako zo süo thüma mütü po she mu phriyi küto la. 3Mo nie Khrista yolü ha zhopo lüsi, lüsidzü püh rhemo vele rhü tayo küzho Jihova ropü yolü thoyi, kütsüyo mo vele nie mülü lüthoyi te. 4Si kütsü Khrista yo ha kümülü Jihova yo nyiete; 5Süo ha cieco ha küve nyiete sitsüo mo vele ha küve süo Jihova cielü küvo zo. 6Pü ha thipüh dzütsüdzükho küsao yitho thisü; süo lüsikho mo vele ropü lüno; kükrelamole lesikho mha thikhri vayo vele ropü kürhü khasüyo. 7Siyo kha kürüh vaküto küsa yithoo kütsülü tho küsüo thürho vepüh kümüre thi Israelmiko pa Moses zü küveo mürayi kündi küthio, 8Ropü yithoo didüpüh süce thürho nyiepü ta? 9Süla kümüjo chothoo zori u thürho nyie tsüsa, kümatho yithoo sücie thürho nyie küchüh moto me? 10Küra pü thürho küba süo dite kükrelamole süce thürhopü tsüo vo kütala. 11Thimüdi küvao thori pü thürho nyie lezho basüh kütoo sücie thürho nyie rükri. 12Ha saju si kütsü nyie kütsüla mükrü chiemono dzüpo tayo. 13Süo Moses-e no mhapüh püzü yoyi ta no Israelmiko pono külalü thürho küveo di kütsü ngomo kütao bimo. 14Vele uko lü thimürüh vano uko dzükho küvüo phri kütsüce küyo süo thari bayo zo, küyo süo Khrista yo khiva yo. 15Vele tha kütsori Moses küphri ce küyo süo uko mülü yopüh bayo. 16Siri Nyepoo cieco va kütasa küyo süo khiva yo. 17Siyo Nyepoo sü Ropü zo, mu Nyepoo Ropü kübara, u kükha di tayo. 18Mu uko mütü uzü yo mono khriva lü küngo bi Nyepo zale ngo no süo uthi küdepüh pü rhü bi mama thapühlü kükrepühlü payiyo, süo Nyepoo celü vori sü Ropüo.
Currently Selected:
CORINTHMIKO KÜNAO 3: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
