BEGGAR 1
NISS
1
Bvl Pwnam mam Nyirabnam
1Hog mwlwngv beggar maatab Pwnbov swcw-nyodongam pwnum. 2‍Swcw si rulum-rvl tvl asarnum, hoo kanv rulum-rvl boam pulupnum. Hoo Pwnbog Yalv iss aoho jaakarl yvnum.
Aal Loox go Bvl Pwnam
3‍Hoo Pwnbov benum, “Huto,” hoo huto kunum. 4‍Hoo Pwnbo hutongam kaatwl alpa hvnum. Hoo Pwnbo hutongam kan hoqgv mwbwq kunum. 5‍Pwnbov hutongam Aal hoo kanam Ai hvl eminum. Hoo otuq aalwg ariyum mvla arv dooknum.
6‍Hoo Pwnbov benum, “Iss pengko hoqgv kvvc lama iss lywlinto, hoo hoqham iss hoqgv iss luusaq-luusaqb mvpin-mvra mvto.” 7‍Hoo Pwnbo kvvc lama dvb lywnam mam mvnum hoo lywnam niikum hoqg issam la lywnam aog issam asaq-asaqb mwbwq kunum. Hoo hoqhv hvb nyiknum. 8‍Hoo Pwnbov lywn boam Doangv hvl eminum. Hoo aal loonyi deenwg ariyum mvla arv dooknum.
9‍Hoo Pwnbov benum, “Doag niikumho doonbo iss tulungv nyook akin golo hingkum to, hoo pwtw bo kedam lengm to.” Hoo hoqhv hvb nyiknum. 10‍Pwnbov pwtw bo kedam Swcwngv hvl eminum, hoo iss tulungv lvkin gob dook nyookam Sa-svlongv hvl eminum. Hoo Pwnbov hoqham kaatwl alpa hvnum.
11‍Hoo Pwnbo benum, “Swcw so nwmw-nwsinv hojar-jurabto, mvm doonbo svvn lo swwrab to, hoo luuxy cwr aaxy xeenbo svvn lo bulug aaxiam xeel swcw so swwrab mvto.” Hoo hoqhv hvb nyiknum. 12‍Swcwngv nwmw-nwsinam, mvm doonbo svvn tulungam at atwg aaxiam xeelin mvdwb mvnum, hoo luuxy cwr svvn tulungv at atwg aaxiam xeelin kunum. Hoo Pwnbov hoqham kaatwl alpa hvnum. 13‍Hoo aal loum deenwg ariyum mvla arv dooknum.
14‍Hoo Pwnbov benum, “Aalam la aiyam mvpin sudwb, doa nvg lywk ao tolo hutongam doomto. Hoo dwr-dvra moodam, hoo aalam hoo vnywngam kaacin dvb lengm to, 15‍hoo bulam doa nvg lywnam ao tolo hutob nyimto hoo swcw aoso huto huum jito.” Hoo hoqhv hvb nyiknum 16‍Hoo Pwnbov koibo huto vnyi go pwnum—koi yaanbo ak ham aalam huum dvb hoo anyo bo ak ham aiyam huum dvb—hoo takar tulungam kam pwnum. 17‍Hoo Pwnbov hoq tulu ham doa nvg lywnam aoho mvptvl swcw aoho huto huum dvb jinum, 18‍aalam la aiyam huum dvb hoo hutongam la kanam mvpin sudwb. Hoo Pwnbov hoqham kaatwl alpa hvnum. 19‍Hoo aal loopy deenwg ariyum mvla arv dooknum.
20‍Hoo Pwnbov benum, “Iss uraho gwn-xarnbo svdin mwlwngam doomto, hoo swcw nvg aob pvta tulungam doa tolo jarl yvmto.” 21‍Ho Pwnbov sa-svlog koibo svdin tulungam pwnum hoo luuxy cwr gwn-xarnbo swwnbo svdinam iss uraho pwnum, hoo luuxy cwrwg alap gvnbo pvta tulungam pwnum. Hoo Pwnbov hoqham kaatwl alpa hvnum. 22‍Hoo Pwnbov bulug aoho lvqc cil, begamv, “Sa-svlog iss lo mipar-gooiyiql hoo naleqgo swwnka hoo swcw nvg aoso pvtangv naleq nvka.” 23‍Hoo aal loong deenwg ariyum mvla arv dooknum.
24‍Hoo Pwnbov benum, “Swcw soqgv hog luucw-luut swwnbo svdinv bulug at-at dvparv swwlin to—tuun-mee hoo gwn-xarnbo hoo gunggo-nyiiyongv bulug at-at dvparv luuxy cwrv swwlin to.” Hoo hoqhv hvb nyiknum. 25‍Hoo Pwnbo swcw soqgv luuxy cwr gunggo-nyiiyongam bulug at-at dvparam swwlin mvdwb hoo tuun-meengam bulug at-at dvparam swwlin mvdwb pwnum, hoo ked aoso hoolu deed gwn-xarn boam at-atwg dvparam swwm dvb pwnum. Hoo hoqham Pwnbov kaatwl alpa hvnum.
26‍Ho Pwnbov benum, “Kuj ngulv nyi loq ngulam guss dvb, hoo ngulug hvb nyidwb pwtuj. Hoo bulam sa-svlog nguiyam hoo doag pvtangam, swcw nvg ao soqg tuun-meengam hoo gwn-xarnbo mwlwngam rvkil doog mvtuj.”
27Hoqgab Pwnbov nyia koam mwam atam guss dvb pwknum,
Pwnboam guss dvb mwam mwv pwnum;
bulam nyega bvla nyemwb mwv pwnum.
28‍Hoo Pwnbov bulam lvqc cinum. Hoo Pwnbov bulam benum, “Mipar-gooiyiql hoo dumtwq-miilyw gvdwl swcw so bwwr nvka hoo sa-svlog nguiyam hoo doag pvtangam, swcw nvg ao soqg gwl-xarl swwnbo mwlwngam kaol rvkil doogto.” 29‍Hoo Pwnbov benum, “Kaato, swcw nvg aoso aaxy xeenbo nwmw-nwsinam, hoo aaxy xeel mvm doonbo svvnam ngo nulam jipa kun. Hoq tuluhv nulug dvs gob nyitayin. 30‍Hoo swcw nvg ao soqg gunggo-nyiiyongam, hoo doag pvtangam hoo swcw aoso gwn-xarnbo mwlwngam, hoo saql swwnbo mwlwngam, ngo jeenbo nwmw-nwsin svvn tulungam bulug dvs gob jipa kun.” Hoo hoqhv hvb nyiknum. 31‍Hoo Pwnbov kaanum hog mwlwngam mwwg pwnam mam, hoo kaato, hoq tuluhv aljaqnum. Hoo aal loox deenwg ariyum mvla arv dooknum.

Nyishi, DVRWQ PVVB @ Bible society of India 2016

Learn More About DVRWQ PVVB