ESTHER 2
ADIBSI

ESTHER 2

2
Estherme Ranipe Imoname
1Méélam delo roja delokke marname ansirongku demteng, rojade Bashti bí bím kape ituadín, delokke bí bík legape kape ukum líktodín, dem míítíbomto. 2Dekepeila rojadem bíkke anínna béérang kídíde sikepe poto, “Rojake legape milo kénkímana kampona mimum kídílok mata bimotoka. 3Rojae bík among takamlok kampona mimum kídíem Susa lokke ruutum leríng luuneke mime duupomlo bomadope ami kídíem parlík bitoka. Bulume mime kídíem kaayana, rojaem agér ibina mumbal Hegaike alaglo melíktoka; delokke bulume kampodope leemo líktoka. 4Delo rojake kaabang sunam mimeko Bashtike ayanpe ranipe imotoka.” Sim rojade tatbaala, dekepe bí ito.
5Susa lokke luune leríng delo Benjamin opínlok Jihudi ami Mordekai emnam, Jairke oo ko kadungai; bí Kish kelang Shimeike otíngkuai. 6Babilon lokke roja Nebukadnejjar bí Judah lokke roja Jehoiashin melang bíkkelo laataksunam abíl kídíem Jirusalem lokke bomnyok kunam arang delo Mordekai bí akoníai. 7Mordekai bí bík apanglok Esther, delokke Hibrupe amíne Hadassah emnam omeko kato; bí amíl-amo kamporuna mimekuai. Bíkke ane-abue sirongem, Mordekai bí bím laala, bík agí omepe usato.
8Roja delok ukumem pokan goorongem, mimumem bojéko ruutum leríng Susa delo langaato, delokke Hegaike alaglo bulume melíkto, delokke Esther mekom rojake ekum delo langaala, mime duupomem kaayana, Hegaike kaabom aralo melíkto. 9Hegai Estherme aipe mííto, delo bí bíkke mííbanamem paato. Dekepeila menangpe, bí bím kampomodope ilíklenla, delokke aina donamem bito. Mime duupom delo bí bím aiyalumna dungkolem bito, delokke roja ekum delok apekrupe ullennam mime koo kínídko bím ibi-sabidope lulígto.
10Esther bí bík agí opín emlang erang legangem sékomemte kénkosumato, kapeila dem pokan sumadope Mordekai bí bím poyilto. 11Loodípe Mordekai bí mime duupom gíídang anín delo Esther bí kape idudí dem kénpe emla gíkup-gílat suto.
12Mime kídíem kampomodope iname loodíke ila, dítakko ito; poolo akkéko mirrh téllok, delokke poolo akké konko balsam téllok airupe mollík-nyumlíkto. Delokrongem, mime miyongdem akon méélamlo akonem roja kerang delo aaboyé. 13Edílo mimede mime duupom delok roja ekumlo gíayédí, delo bíkke gepe-bompe míínamem gemo-bommoyé. 14Mimede delo yume dem gíala, delo rohkon dem bíme angukon mime duupom kolo gíbola, rojake éésiri kídíem kaabomna mumbal Shashgajke aralo melíkyé. Mimede lekoda roja delo, bíme mííbala amínlok gogla íngkímadem aalat sukumayé.
15Mordekaike agí omepe usaa sunam, bík apang Abihailke ome Estherke roja delo aadíe edílo píítodín, delo bí abíd komape, mime kídíem kaabomna mumbal Hegaike poyilem matato. Delo Estherme kaana takame mííbato. 16Dekepeila, Jarjes rojape dítak kínídnape ruutum bomdo delokke íyingnana Tebeth poolo delo, roja Jarjes kelo Estherme roja ekumlo aaboto.
17Delo rojade mime abíd kídí dempe mílo Estherme kaabayato, delokke milo kénkímana abíd kídí dempemílo Estherbí roja delok ayangem lang aipe míílíknamem paayato. Delok legape rojade bík dumpolo rani dumlubem lublíkto, delokke Bashtike ayanpe bím ranipe imoto. 18Delo Estherke amínpe bík migom-mite kídíem doman bottenako doboto. Bí among tabudelo nyoman longeko pokan goola, delokke roja bibaanam amanem orto.
Rojalok Yénamem Mordekaike Moturname
19Milo kénkímana mimum kídíde lennyinape dumsu dokuem Mordekaibí rojake lamgé delo duuduai. 20Idola, Esther Mordekaibí bím kape potodí, dekepe bí bík erang legangem demangkom opínem pobisumape mesupto, kapeila Mordekaibí bím usadu delo kape ituadí dekepe bí bík ngiitomem iyarbomto.
21Roja lamgé delo Mordekaike duudoem, rojake eyab aataklo dakbomna mumbal annyi Bigthanah lang Teresh bínyi yagorupe marla, roja Jarjesme petpe emla rusup bosuto. 22Idola Mordekaibí atímape ruubomnam dem gagla, rani Estherme pobito, delo Estherbí roja delo Mordekai ke amínpe pokanbito. 23Pokannam agom dem edílo íngkí-bengkíla arodope gaglentodí, delo mumbal annyi dem sulpom bobelo paksulto. Delokke sim legang takam sim rojake keradelo legang atkumko kitablo atlíkto.

Adi (Re-edited) Bible - Deena Baibél

Copyright © Bible Society of India, 2012.

Used by permission. All rights reserved worldwide.


Learn More About DEENA BAIBÉL (BSI)

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.