YouVersion Logo
Search Icon

METHU 2

2
Danyichaggo Dalyi Hokii ka Nyibo Atañ
1 # Lk 2.4-7; 1.5. Siisi Jisu mi Judia ka Betlehem ho butii Radde Herod ka myodu ho, kato, danyichaggo hokii chiniimiyu atañ Jerusalem ho ahtii, lubiidola, 2#Mk 15.2; Jn 1.49.“Nohna Jew atañ paka Radde lyisa bomi butiinii? Niimpalukoda ngunu mohka takḛr mi danyichaggo ho kappa to, ho ngunu mohmi herii dupa ahdu.” 3Hiimi Radde Herod tapa lala, mo ano henga henkhatii, ho hikha Jerusalem miilañ mohmi hembotii; 4ho hikha nyibu burii atañmi ho miyuatañ paka pagenii atañmi gyokuñtii, mo tahii biido nohyu Kristo mi bukiñ doniiñ. 5#Jn 7.42.Mohlu mohmi lukotii, Judia ka Betlehem ho yuke; niimpalukoda siikasi nyibuhenii ka keniiñ:
6Ho no, Betlehem, Juda ka kiiddi ho,
Juda hoka donii khiima niija lemba kone make;
niimpalukoda niiko hokiike akhoja kone
ngiika Isrel miyu atañmi sangii niipa ahkiñ donii.
7Ho Herod chiniimiyu atañmi gyosila gyokuñtii ho takḛr ka linniiñ myodu jami mohluko hokii tagiitii; 8ho mo mohlumi Betlehem ho kiiniñtii, lubiidola, “Inge ho hempḛr ayapa wiinga mi menge, ho niida mepa talyi ngiimi luko lyape, niimpalukoda ngo miilañ ila mohmi herii talyila.” 9Ho mohlu radde kokii tagiikula mohlu mohluka lemboho intiiku, ho kato, mohluka takḛr danyichaggo hoka kapaniihii mohluka hata dalyi ila dotii, nohna wiinga butola donii ho lohepa tiimo mapa inkañtii. 10Mohlu takḛr mi kappa lala, mohlu hempḛr hempyo biidola sotii; 11#Mt 1.18; 12.46.ho ude uraho ahbiila mohlu wiinga mi mohka annii Mary agiñho kappatii, ho mohlu giihitii ho herii nyatii. Hiika hiibaho, mohluka drih mi khako lala, mohlu ahmiñayiñ bitii, ayyiñ ho narunempyo kutu ho mirr. 12#Mt 2.22; Miin 10.22; Hib 11.7. Ho mohlumi Herod ko ahkur lyaku yo hala emmako lubii lyinii, mohlu lembo byahe yapa atoh ganda ho intiiku.
Egip Hoka Hargiiniiñ
13Siisi mohluka inne kuho, kato, Attoh ka miidopopi Josep ka emmako ahtii ho lutii, “Gurito, wiinga la mohka annii nyimi ingiila, ho Egip ho hargii he, ho ngiika luko menda hemi ho duhe; niimpalukoda Herod wiinga mi mehpa miido ke, mohmi mempa dupa.” 14Ho mo guri biila ho wiinga la mohka annii nyimi ayoh liipa ho gyogiitii, ho Egip ho hargii tii, 15ho Herod ka shiimiñ da hemi ho dutii. Siikasi Attoh ka nyibuhenii mi luna nala luniiñmi lyipe kiine dupa lyitii, “Egip hokii ngo ngiika wiinga mi gyoliñ tii.”
Himme Atañ Mika Menniiñ
16Ho Herod, chiniimiyu atañ mohmi gollutii byomi hiila chila lala, hempḛr hadiitii, ho mo kiiniñtii ho hikha milobo atu budu ronye malo hiimika ajañ yami menge Betlehem ho hikha aruñare hoka dunii hemi, chiniimiyu kokii niihtañpa mo tapa tii hiika myodu jami khiirii biidola miike nentii. 17Ho hii lyipetii nii hiilana nyibuhenii Jeremiah lutiinii:
18“Ramah ho aguñ gonge tapatii,
hempḛr heru ho goro paka kheniiñ mi.
Rachel mohka oho atañpa khetii;
mo myaniiñ mi tama tii,
niimpalukoda mohlu nyiku matii.”
Egip Hokii Ka Ahkur Kuniiñ
19 # Mt 1.20; 2.13. Herod ka shiine kuho, kato, Attoh ka miidopopi Josep ka emmako Egip ho ahtii, lubiidola, 20“Gurito, wiinga la mohka annii nyimi ingii kula, ho Isrel ka kiiddi ho ingeku, niimpalukoda wiinga ka sango mika mehniibo shiine kuke.” 21Ho mo guri tiiku ho wiinga la mohka annii nyimi ingii kula, ho Isrel ka kiiddi ho intiiku. 22Hojalopa mo Arkelas Judia mi sangiigyagii niipa dusi duku mohka aba Herod ka dukoho hiila tapalala, mo hiikoho biisola ahkur nanku matii, ho mohmi emmako luluñ bulyinii mo Galili ka gandachie ho ingu giitii. 23#Lk 1.26; Mk 1.24.Ho mo ila ho Nazaret hiiniiñ citi ho dutii, niimpalukoda nii hiila na nyibuhenii atañ lutii nii hiimi lyipe kiine dupa, “Mohmi Nazarene hiila gyokiñdo.”

Currently Selected:

METHU 2: APATBSI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy