Teev Npe 3
3
Aloos Cov Tub
1Ntawm no yog Aloos thiab Mauxes nkawd tsev neeg, thaum lub sijhawm uas tus TSWV nrog Mauxes sibtham saum Roob Xinais. 2Aloos muaj plaub tug tub: Nadas yog tus tub hlob, Anpihus, Ele-axas thiab Ithamas. #Teev 26:60 3Lawv puavleej raug txhawb meejthawj thiab tsa ua cov povthawj hlob, 4tiamsis Nadas thiab Anpihus nkawd tau tuag thaum nkawd rauv cov taws uas tsis dawbhuv hlawv khoom fij rau tus TSWV tom tiaj suabpuam Xinais. Nkawd tsis tau muaj menyuam, yogli ntawd, Ele-axas thiab Ithamas thiaj tau ua ob tug povthawj hlob nrog nkawd txiv Aloos, uas yog tag Aloos tiam neej. #Levi 10:1-2; Teev 26:61
Tsa Xeem Levis Ua Haujlwm Rau Cov Povthawj Hlob
5Tus TSWV hais rau Mauxes tias, 6“Coj xeem Levis txav los rau tom hauvntej no thiab muab lawv tsa ua Aloos uas yog tus povthawj hlob cov tubtxib. 7Lawv yuav ua tej haujlwm hauv lub Tsevntaub Sibntsib thiab ua cov povthawj hlob lub luag haujlwm thiab ua haujlwm rau cov pejxeem sawvdaws. 8Lawv ua cov saib tagnrho tej khoom siv hauv lub Tsevntaub Sibntsib thiab ua haujlwm rau cov Yixalayees. 9Koj yuavtsum muab cov Levis cob rau Aloos thiab nws cov tub; lawv tagnrho yog cov uas raug xaiv hauv cov Yixalayees los mus ua haujlwm rau Aloos. 10Koj yuavtsum tsa Aloos thiab nws cov tub los ua cov povthawj hlob lub luag haujlwm; yog leejtwg xav txeeb ua, yuav tau muab tus ntawd tua kom tuag.”
11Tus TSWV hais rau Mauxes tias, 12-13“Kuv xaiv cov Levis tawm ntawm cov Yixalayees los hloov tagnrho cov Yixalayees cov tub hlob chaw. Cov Levis yeej yog Kuv tug, rauqhov txhua tus tub hlob puavleej yog Kuv tug. Thaum Kuv tua cov Iziv tej tub hlob, Kuv yeej tshwj tagnrho cov Yixalayees tej tub hlob los ua Kuv tug, tsis hais neeg lossis tsiajtxhu. Lawv yuav yog Kuv tug. Kuv yog tus TSWV.” #Khiav 13:2
Sau Cov Levis Npe
14Tus TSWV hais rau Mauxes tom tiaj suabpuam Xinais 15kom yuavtsum sau cov Levis npe rawsli lawv lub xeem thiab tej tsev neeg, txhua tus txivneej lossis metub uas hnubnyoog ib hlis rov saud, yuavtsum sau npe huv tibsi. 16Ces Mauxes txawm ua rawsli tus TSWV tau hais tseg.
17-20Levis muaj peb tug tub hu ua: Nkawsoos, Kauhas, thiab Melalis; lawv yog cov yawgkoob rau lawv xeem thiab lawv cajces. Nkawsoos muaj ob tug tub hu ua: Linpenis thiab Sime-is; Kauhas muaj plaub tug tub hu ua: Aslas, Ixahas, Henploos thiab Uxiyees; thiab Melalis muaj ob tug tub hu ua: Mahelis thiab Musis. Lawv cov no yog Levis cajces, rawsli lawv cov yawgkoob.
21Linpenis thiab Sime-is cuab kwvtij no yog cajces ntawm Nkawsoos tsev neeg. 22Suav tagnrho cov txivneej uas hnubnyoog ib hlis rov saud muaj 7,500 leej. 23Cuab kwvtij no lawv tsa tsevntaub nyob rau sab hnubpoob ntawm lub Tsevntaub Sibntsib, 24tus thawj uas coj Nkawsoos cajces yog Layees tus tub Eli-axas. 25Lawv lub luag haujlwm yog ua cov tu lub Tsevntaub Sibntsib, tu cov ntaub vov sabhauv, cov ntaub vov nraud, cov ntaub thaiv qhovrooj, 26cov ntaub xov vaj ncig lub Tsevntaub, lub tshavpuam, lub thaj, thiab daim ntaub roojvag uas xov sabnraum lub tshavpuam. Lawv ua cov saib tagnrho txhua yam haujlwm uas siv rau cov khoom ntawd.
27Aslas, Ixahas, Henploos, thiab Uxiyees lawv cuab kwvtij no yog cajces ntawm Kauhas tsev neeg. 28Suav tagnrho cov txivneej uas hnubnyoog ib hlis rov saum muaj 8,600 leej. 29Cuab kwvtij no lawv tsa tsevntaub nyob ntawm lub Tsevntaub Sibntsib sab nrad, 30tus thawj uas coj Kauhas cajces yog Uxiyees tus tub Elixafas. 31Lawv lub luag haujlwm yog tu lub Phijxab Lus Cogtseg, lub rooj, tus ncej txawb teeb, cov thaj, tej khoom uas cov povthawj hlob siv nyob hauv Chav Dawbhuv, thiab daim ntaub thaiv lub qhovrooj uas mus rau hauv Chav Dawbhuv Kawg Nkaus. Lawv ua cov saib tagnrho txhua yam haujlwm uas siv rau cov khoom ntawd.
32Tus thawjcoj ntawm cov Levis yog tus povthawj hlob Aloos tus tub Ele-axas. Nws yog tus saib cov neeg uas ua haujlwm hauv Chav Dawbhuv.
33Mahelis thiab Musis nkawd cuab kwvtij yog Mahelis cajces. 34Suav tagnrho cov txivneej uas hnubnyoog ib hlis rov saum muaj 6,200 leej. 35Cuab kwvtij no lawv tsa tsevntaub nyob rau ntawm lub Tsevntaub Sibntsib sab ped; tus thawj uas coj Melalis cajces yog Anpiha-is tus tub Xuliyees. 36Lawv lub luag haujlwm yog ua cov saib tus lajkab uas xov ncig lub Tsevntaub Sibntsib, tej nqaj lajkab, tej ncej lajkab, tej tiag taw lajkab, thiab txhua yam khoom uas siv rau tej ntawd. 37Lawv kuj tseem ua cov saib tej ncej, tej fab, tej tswg, thiab tej hlua uas xov ncig lub tshavloog huv tibsi.
38Mauxes, Aloos thiab Aloos cov tub tsa lawv tej tsevntaub nyob rau ntawm lub Tsevntaub Sibntsib sab hnubtuaj. Lawv lub luag haujlwm yog ua cov sawvcev ntawm cov pejxeem Yixalayees nyob hauv Chav Dawbhuv. Yog muaj leejtwg lam mus ze Chav Dawbhuv ntawd yuav raug muab tua kom tuag. 39Mauxes suav cov txivneej Levis uas hnubnyoog ib hlis rov saud rawsli tus TSWV tau xaaj rau nws lawm yog muaj 22,000 leej.
Cov Levis Hloov Cov Tub Hlob Chaw
40-41Tus TSWV hais rau Mauxes tias, “Suav tagnrho cov Yixalayees tej tub hlob uas hnubnyoog ib hlis rov saud thiab sau lawv tej npe kom tag huv tibsi. Muab cov Levis los hloov tagnrho cov Yixalayees tej tub hlob chaw rau Kuv! Kuv yog tus TSWV! Thiab muab cov Levis tej tsiajtxhu hloov cov Yixalayees tej tsiajtxhu thawjtug menyuam uas yog tus txiv chaw.”
42Yogli ntawd, Mauxes thiaj sau tagnrho cov Yixalayees tej tub hlob npe, rawsli tus TSWV tau xaaj rau nws lawm. 43Tagnrho txhua tus tub hlob uas hnubnyoog ib hlis rov saud yog muaj 22,273 leeg.
44Tus TSWV hais rau Mauxes tias, 45“Zaumno muab cov Levis fij rau Kuv hloov tagnrho cov Yixalayees tej tub hlob chaw, thiab muab cov Levis tej tsiajtxhu fij rau Kuv hloov cov Yixalayees tej tsiajtxhu chaw. Kuv yog tus TSWV. 46Vim cov Yixalayees cov tub hlob coob tshaj cov Levis 273 leeg lawm, mas nej yuavtsum txhiv cov tshaj ntawd rovqab. 47Ib tug tub twg tau them 5 lub txiajnyiag thiaj txhiv tau rovqab, rawsli nomtswv kevcai, ib choj twg yog hnyav li ntawm 20 nkelas,#3:47: nkelas: 1 nkelas yog hnyav li ntawm 55 nkalas (grams). 48thiab muab cov nyiaj no rau Aloos thiab nws cov tub.”
49Yogli ntawd, Mauxes thiaj ua li tus TSWV hais thiab khaws 501,365 lub txiajnyiag#3:50: 1,365 lub txiajnyiag: Yog hnyav li ntawm 15:5: kilus. 51thiab muab rau Aloos thiab nws cov tub.
Currently Selected:
Teev Npe 3: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
