Levis Kevcai 27
27
Tej Kevcai Uas Hais Txog Kev Pub Khoom Rau Tus TSWV
1Tus TSWV hais rau Mauxes tias, 2“Koj hais rau cov Yixalayees tias, yog muaj leejtwg muab ib tug twg fij pub rau tus TSWV uas yog ua rawsli nws tau coglus tseg lawm, tus neeg ntawd yuavtsum them nyiaj li nram qab no mas nws thiajli yuav dim tau, 3-7rawsli nomtswv kevcai:
—“Tus txivneej uas muaj hnubnyoog neesnkaum xyoo mus txog raucaum xyoo: them 50 lub txiajnyiag.
—Tus pojniam uas muaj hnubnyoog neesnkaum xyoo mus txog raucaum xyoo: them 30 lub txiajnyiag.
—Tus tub hluas uas muaj hnubnyoog tsib xyoos mus txog neesnkaum xyoo: them 20 lub txiajnyiag.
—Tus ntxhais hluas uas muaj hnubnyoog tsib xyoos mus txog neesnkaum xyoo: them 10 lub txiajnyiag.
—Tus menyuam tub uas muaj hnubnyoog tsib xyoos rov hauv: them 5 lub txiajnyiag.
—Tus menyuam ntxhais uas muaj hnubnyoog tsib xyoos rov hauv: them 3 lub txiajnyiag.
—Tus txivneej uas muaj hnubnyoog raucaum xyoo rov saud: them 15 lub txiajnyiag.
—Tus pojniam uas muaj hnubnyoog raucaum xyoo rov saud: them 10 lub txiajnyiag.
8“Yog tus neeg uas coglus ntawd txomnyem thiab them tsis taus rawsli tus nqi uas kom tseg no, yuavtsum coj tus neeg ntawd mus cuag tus povthawj hlob, thiab tus povthawj hlob mam kom tus nqi kom tsawg zog, rawsli tus neeg ntawd muaj peevxwm them taus.
9“Yog tus neeg ntawd coglus muab tus tsiaj uas tsimnyog coj mus fij rau tus TSWV, mas txhua yam uas muab rau tus TSWV yuavtsum yog yam dawbhuv. 10Nws yuavtsum tsis txhob muab dua lwmtus tsiaj tuaj hloov tus tsiaj ntawd chaw. Yog nws hloov, ces ob tug tsiaj ntawd puavleej yog tus TSWV tug tagnrho. 11Tiamsis yog nws coglus muab tus tsiaj uas tsis huv coj mus fij rau tus TSWV, tus txivneej ntawd yuavtsum coj tus tsiaj ntawd mus rau tus povthawj hlob. 12Ces tus povthawj hlob mamli muab tus tsiaj ntawd los kom nqi rawsli tus tsiaj ntawd qhov zoo lossis qhov phem, thiab tsuas ntaus tus nqi rawsli ntawd xwb. 13Yog nws xav txhiv tus tsiaj ntawd rovqab, nws yuavtsum them neesnkaum feem pua ntxiv rau tus nqi tsiaj ntawd.
14“Yog ib tug twg muab nws lub tsev fij rau tus TSWV, tus povthawj hlob yuavtsum muab ntaus nqi rawsli lub tsev ntawd qhov zoo lossis qhov phem, thiab tsuas ntaus tus nqi rawsli ntawd xwb. 15Yog nws xav txhiv lub tsev rovqab, nws yuavtsum them neesnkaum feem pua ntxiv rau tus nqi tsev ntawd.
16“Yog ib tug twg muab nws daim teb ib feem fij rau tus TSWV, tus povthawj hlob yuavtsum muab ntaus nqi kom tsimnyog rawsli daim teb ntawd yuav tseb tau noobqoob npaum licas rau hauv, qhov uas txaus tseb ib kawm noob nplej ntaus nqi 10 lub txiajnyiag. 17Yog nws muab nws daim teb fij tomqab uas dhau kiag Xyoo Thim xwb, ces tus nqi yeej tseem nyob puvntoob li qub. 18Tiamsis yog twb dhau Xyoo Thim ntev zog lawm, nws mamli muab nws daim teb fij, tus povthawj hlob yuav tau nrog kom tus nqi thiab muab tus nqi txo kom qis rawsli tej xyoo ntawd mus txog Xyoo Thim. 19Yog tus uas fij nws daim teb ntawd xav txhiv rovqab, nws yuavtsum them neesnkaum feem pua ntxiv rau tus nqi ntawd. 20Tiamsis yog nws tsis xav txhiv nws daim teb rovqab lossis nws twb muab muag rau lwmtus lawm, ces nws tsis muaj cai txhiv daim teb ntawd rovqab li lawm. 21Ces thaum rov txog Xyoo Thim, daim teb ntawd dhau mus ua tus TSWV tug, thiab yog cov povthawj hlob tug.
22“Yog ib tug twg muab nws daim teb uas nws yuav los fij rau tus TSWV, 23tus povthawj hlob yuavtsum kom tus nqi rawsli tej xyoo mus txog rau Xyoo Thim, thiab tus neeg ntawd yuavtsum them kiag tus nqi rau hnub ntawd. Cov nyiaj ntawd yog tus TSWV tug. 24Thaum txog Xyoo Thim lawm, yuavtsum muab daim teb ntawd thim rov rau tus tswv qub lossis nws cov xeebntxwv.
25“Txhua yam nqi yuavtsum muab kom, kom rawsli nomtswv txojcai.
26“Thawjtug menyuam tsiaj yeej yog tus TSWV tug li lawm, yogli ntawd, tsis pub leejtwg tseem muab tus tsiaj ntawd fij rau tus TSWV; tsis hais menyuam nyuj, menyuam yaj, lossis menyuam tshis, tej ntawd puavleej yog tus TSWV tug lawm. 27Tiamsis yog cov tsiaj uas tsis huv thawjtug menyuam, tus tswv tsiaj muaj cai txhiv rovqab rawsli tus nqi uas tau kom tseg thiab ntxiv neesnkaum feem pua rau tus nqi ntawd. Yog nws tsis txhiv tus tsiaj ntawd rovqab, ces muab muag rau lwmtus rawsli tus nqi uas tau kom tseg lawm los tau.
28“Txhua yam uas tau coglus muab fij#27:28: coglus muab fij: Txhua yam uas muab fij li no, mas yog tus TSWV tus mus li lawm, thiab siv tsis tau lawm. Yam ntawd yuavtsum muab ua kom puastsuaj mus xwb. rau tus TSWV lawm, txawm yog neeg, tsiajtxhu, lossis teb, tsis pub muab muag lossis txhiv rovqab li lawm. Rauqhov tej ntawd yog yam dawbhuv heev rau tus TSWV lawm. #Teev 18:14 29Yog twb coglus rau tus TSWV lawm hais tias yuav muab ib tug neeg twg ua kom puastsuaj mus, mas tsis pub txhiv rovqab li lawm, tus ntawd yuavtsum raug tua kom tuag lawm xwb.
30“Tagnrho tej qoobloo hauv tej teb, txawm yog txivhmab txivntoo, los ib feem kaum yog tus TSWV tug. #Teev 18:21; 2Kev 14:22-29 31Yog leejtwg xav txhiv qeeyam rovqab, nws yuavtsum them neesnkaum feem pua ntxiv rau tus nqi uas tau kom tseg lawm. 32Tagnrho tej tsiaj nyeg lossis tus tsiaj thib kaum uas nkag los hauv tus tswv yug yaj tus qab pas, yog tus TSWV tug. Thaum suav tej tsiajtxhu, kaum tus twg ib tug yog tus TSWV tug. 33Tus tswv tsiaj tsis txhob xaiv cov tsiaj zoo tawm ntawm cov tsiaj phem, thiab tsis txhob muab tej tsiaj los sib hloov. Yog nws muab tus tsiaj no mus hloov tus tsiaj tod chaw, ces ob tug tsiaj ntawd puavleej yog tus TSWV tug huv tibsi, thiab yuav txhiv tsis tau rovqab li lawm.”
34Nov yog tej lus xaaj uas tus TSWV muab rau Mauxes saum Roob Xinais, kom coj los qhia rau cov Yixalayees.
Currently Selected:
Levis Kevcai 27: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
